ខេត្តកណ្តាល ៖ គណៈកម្មាធិ​ការ​គណ​បក្ស​ប្រជា​ជន​កម្ពុជា ឃុំម្កាក់ ស្រុកអង្គស្នួល​ ខេត្ត​កណ្តាល បានរៀបចំសន្និបាតប្រចាំឆ្នាំរបស់​ខ្លួន​នា​ព្រឹកថ្ងៃ​ទី១២ កុម្ភៈ នៅទីស្នាក់ការគណ​បក្ស​ប្រជា​ជន​កម្ពុជា​ឃុំ​ ក្រោមវត្តមានចូលរួមពី​លោក​រស់ វណ្ណា ទីប្រឹក្សា​ផ្ទាល់សម្តេចអគ្គមហា​ធម្ម​ពោធិ​សាលជា ស៊ីម អនុប្រធានទី១ គណៈ​អចិន្ត្រៃយ៍​គណៈពង្រឹងមូលដ្ឋានស្រុកអង្គស្នួល និងជា​ប្រធាន​ក្រុមការងារថ្នាក់កណ្តាល​ចុះ​ជួយ​មូលដ្ឋាន​ឃុំចំនួន២ គឺឃុំ​បែកចាន និងឃុំ​ក្រាំង​ម្កាក់, ​លោក​រស រេន អនុប្រធាន​គណៈពង្រឹង​មូល​ដ្ឋាន​ស្រុកអង្គស្នួលព្រមទាំងលោក លោក​ស្រី​ជា​ក្រុមការងារចុះជួយមូលដ្ឋានថ្នាក់កណ្តាល និង​ថ្នាក់ខេត្ត-ស្រុក និងសមាជិកបក្សមកពីបណ្តា​ភូមិ​ទាំង២៩ ក្នុងឃុំប្រមាណជិត៨០០នាក់។

អង្គសន្និបាតបានដំណើរការរយៈពេលពេញ​១ល្ងាច ដោយបានតាមដានស្តាប់នូវខ្លឹមសារ​ព្រាង​របាយ​ការណ៍បូកសរុបវាយតម្លៃលទ្ធផល​នៃ​ការអនុ​វត្តគោលនយោបាយរបស់គណ​បក្ស​សម្រាប់​ការអភិវឌ្ឍឃុំឆ្នាំ២០០៧ដល់ឆ្នាំ២០១២ និង​ទិសដៅភារកិច្ចអនុវត្តបន្តពីឆ្នាំ២០១២ដល់ឆ្នាំ​២០១៧។ ជាមួយគ្នានេះដែរ អង្គសន្និបាត​បាន​ឯក​ភាពទៅលើរបាយការណ៍បូកសរុបវាយតម្លៃ​​លទ្ធ​ផលនៃការអនុវត្តគោលនយោបាយរបស់​គណ​បក្សរយៈពេលកន្លងទៅ និងខ្លឹមសារព្រាង​កម្ម​វិធី​នយោបាយរបស់គណបក្សសម្រាប់​ការ​អភិ​វឌ្ឍឃុំបន្តពី​ឆ្នាំ២០១២ដល់ឆ្នាំ២០១៧។ អង្គ​សន្និបាតក៏បានរៀបចំដំណើរការបោះឆ្នោត ដើម្បី​​ជ្រើសរើសបេក្ខភាពសមាជិកក្រុមប្រឹក្សាឃុំ​សម្រាប់អាណត្តិទី៣ ដែលទូទាំងឃុំមានបេក្ខ​ភាព​ឈរឈ្មោះចំនួន២៩រូប ដោយធ្វើការជ្រើស​រើសតែ២០រូប ក្នុងនោះមាន៩រូបជា​បេក្ខភាព​ក្រុម​ប្រឹក្សាឃុំ ៩រូបជាសមាជិកក្រុមប្រឹក្សាឃុំ និង២រូបជាក្រុមប្រឹក្សាបម្រុង។

មានមតិ​សំណេះ​សំណាល​ លោក​រស់ វណ្ណា បានវាយតម្លៃចំពោះលទ្ធផលការងារដែលគណ​បក្សឃុំរួមគ្នា​សម្រេច​បាន​នាពេលកន្លងមក និង​បានធ្វើការណែនាំទៅ​លើផែនការសកម្មភាពការ​ងារ​ដែលត្រូវអនុវត្តបន្ត ព្រមទាំងលើក​ឡើង​ឆ្លុះ​បញ្ចាំងពីចំណុចខ្លាំង និងខ្សោយ និងបទ​ពិសោធន៍​​សំដៅឈាន​ទៅ​ទទួលបានជោគជ័យ​នា​អំឡុងពេលបោះឆ្នោត​ជ្រើសរើសក្រុមប្រឹក្សា​ឃុំ-សង្កាត់នាពេលខាង​មុខ។ លោក​បានក្រើន​រំលឹកដល់​សមាជិកបក្ស​តាំងពីថ្នាក់ស្រុករហូត​ដល់ក្រុមបក្សទូទាំងឃុំ ​ត្រូវបន្តធ្វើបច្ចុប្បន្នភាព​បញ្ជីក្រុមឲ្យបានច្បាស់​លាស់ និងបន្តរក្សាឲ្យ​បាននូវចលនារបស់បក្ស​ក្នុងមូលដ្ឋានដែលធ្លាប់​ធ្វើសកម្មភាពជាប្រចាំ​កន្លងមកដោយនិរន្តភាព ព្រមទាំងបន្តពង្រីកនូវសមាជិកថ្មី និងធ្វើសកម្ម​ភាពឆ្ពោះទៅមូលដ្ឋាន​សំដៅបម្រើផល​ប្រយោជន៍​ប្រជា​ពលរដ្ឋប្រកប​ដោយភាពទទួល​ខុសត្រូវខ្ពស់ ពិសេសទាក់​ទាញ​នូវទំនុកចិត្តលើ​ការ​ដឹក​នាំអភិវឌ្ឍន៍ប្រទេសរបស់​គណបក្ស ក៏​ដូច​ជារាជរដ្ឋាភិបាល។

ក្នុងឱកាស​នោះ​ដែរ គណៈអធិបតីក៏បាន​ចែក​ជូនអំណោយ​អនុស្សាវរីយ៍ដល់សមាជិកបក្ស​ដែល​បានចូលរួម​ទាំងជិត៨០០នាក់ ក្នុងម្នាក់ៗអាវ​១ មួក១ និង​សារុង​១ ៕