ខេត្តព្រះវិហារ ៖ ឧបទ្ទវហេតុផ្ទុះលើមេឃ បានបន្លឺសំឡេងយ៉ាងកក្រើកនៅលើតំបន់មុខប្រាសាទព្រះវិហារ និងបានធ្វើឱ្យមានការផ្អើលជាខ្លាំងដោយសារជាតំបន់ធ្លាប់ប្រឈមមុខគ្នារវាងកងទ័ពកម្ពុជា-ថៃ ។ ទោះបីជាបែបណា សំឡេងផ្ទុះកក្រើកមេឃលើតំបន់ប្រាសាទព្រះវិហារនោះមិនមែនជាការផ្ទុះគ្រាប់ផ្លោងឬគ្រាប់ដែលបាញ់នោះទេ តែជាហេតុការណ៍ផ្ទុះលើលំហមេឃ ហើយបន្ទាប់មកក៏មានបំណែកផ្សេងៗបានធ្លាក់នៅរាយប៉ាយក្នុងតំបន់នោះ ដែលមិនខុសពីការផ្ទុះធ្លាក់កាលពីខែសីហា កន្លងទៅ នៅស្រុកគូលេន និងត្រូវប្រកាសថាជាបំណែកយន្តហោះគ្មានមនុស្សបើក ។
ហេតុការណ៍ថ្មីនេះត្រូវបានរាយការណ៍ឱ្យដឹងថា នៅវេលាម៉ោង១០ និង៣៥នាទីព្រឹកថ្ងៃទី២២ ធ្នូ នៅលើផ្ទៃមេឃភាគខាងជើងគោបុរៈទី៥នៃប្រាសាទព្រះវិហារ មានហេតុការណ៍គួរឱ្យភ្ញាក់ផ្អើលមួយ ដោយសារមានស្នូរសំឡេងផ្ទុះលាន់ឮកក្រើកមេឃជាច្រើនដង ដែលមានកម្ពស់ប្រហែលជាងមួយគីឡូម៉ែត្រ ហើយក៏មានផ្សែងខ្មៅងងិតពេញផ្ទៃអាកាសដែរ ។ ឧបទ្ទវហេតុផ្ទុះនៅលើអាកាសនេះក៏មានការធ្លាក់បំណែកផ្សេងៗមកលើភូមិសាស្ត្រតំបន់ប្រសាទព្រះវិហារដែលក្រោយមកបានរកឃើញបំណែកដែកប្រហាក់ប្រហែលគ្នានិងលើកមុនដែរ។
ករណីផ្ទុះខាងលើនេះតាមមន្ត្រីយោធាកម្ពុជា ដែលប្រចាំការតំបន់នោះបានឱ្យដឹងថា បន្ទាប់ពីបានឃើញឧបទ្ទវហេតុនេះ កងកម្លាំងយោធាទាំងពីរភាគី ទាំងខាងកម្ពុជា ទាំងខាងថៃមានការភ្ញាក់ផ្អើលយ៉ាងខ្លាំង ។ បន្ទាប់ពីការផ្ទុះនោះ កងកម្លាំងកម្ពុជាដែលឈរជើងក្នុងទឹកដីរបស់ខ្លួននៅតំបន់នោះបានរកឃើញនៅលើបរិវេណប្រាសាទមានបំណែកដែលធ្លាក់មានចំនួន៧ផ្ទាំង ។ ភ្លាមនោះមានសេចក្តីរាយការណ៍ពីប្រជាពលរដ្ឋក្នុងភូមិធម្មជាតិថា ក្រោយពីការលាន់ឮសំឡេងផ្ទុះនោះក៏គេឃើញមានធ្លាក់បំណែកនៅក្នុងភូមិដែរ ។
លោកស ថាវី អភិបាលរងខេត្តដែលប្រចាំការនៅស្រុកជាំក្សាន្តបានដឹកនាំសមត្ថកិច្ចចម្រុះទៅធ្វើការត្រួតពិនិត្យឃើញបំណែកមួយប្រវែងប្រហែល៧តឹក រាងមូលមានទម្ងន់ប្រហែលជាង២០គីឡូក្រាម ដែលធ្លាក់ក្នុងដីឡូត៌ប្រជាពលរដ្ឋលេខ២ស៨១ ក្នុងភូមិធម្មជាតិចម្ងាយប្រមាណ១១គីឡូម៉ែត្រពីប្រាសាទព្រះវិហារ ។ ចំណែកនៅបរិវេណប្រាសាទព្រះវិហារគេបានរកឃើញនៅចំណុចគោបុរៈទី៥ ឆៀងខាងជើងចម្ងាយប្រហែល៨០ម៉ែត្រចំនួន១បំណែក មានទំហំ ០,៨០x៨០ស.ម នៅខាងត្បូងជណ្តើរបុរាណក្បាលនាគខាងកើតចម្ងាយប្រហែល៥០ម៉ែត្រ បានឃើញប្រអប់មួយមានខ្សែភ្លើងទំហំប៉ុនអាគុយ៥០អំពែរ ។ នៅភាគខាងលិចគោបុរៈទី៥ចម្ងាយប្រហែល៦០ម៉ែត្រ រកឃើញចំនួន១បំណែកមានទំហំប្រហែល០,២០x០,៥០សង្ទីម៉ែត្រ និងមួយបំណែកទៀតរកឃើញចម្ងាយ៩០ម៉ែត្រមានទំហំប្រហែល០,២០x ០,៥០ស.ម ។
ជុំវិញបញ្ហាខាងលើនេះមន្ត្រីក្រុមការងារសង្កេតការណ៍បទឈប់បាញ់នៅប្រសាទព្រះវិហារបានឱ្យដឹងថា ឧបទ្ទវហេតុនេះភាគីកម្ពុជាបានរកឃើញសរុបចំនួន១០បំណែក ហើយត្រូវបានយកទៅរក្សាទុកនៅទីបញ្ជាការអគ្គបញ្ជា ការចំណុច L៨ នឹងធ្វើរបាយការណ៍រួចនិងបញ្ជូនទៅក្រសួងការពារជាតិដើម្បីឱ្យអ្នកឯកទេសធ្វើកោសល្យវិច័យ ។
គួររំលឹកថា រហូតមកដល់ពេលនេះបំណែកដែលប្រមូលបានកាលពីខែសីហា បន្ទាប់ពីមានការផ្ទុះធ្លាក់ដូចគ្នានៅស្រុកគូលេននោះមិនមានរបាយការណ៍ណាមួយត្រូវបានប្រកាសជាផ្លូវការថា បំណែកនោះជាអ្វីទេគ្រាន់តែមានការប្រកាសថា ជាយន្តហោះគ្មានមនុស្សបើក តែក៏មិនបានបញ្ជាក់ថា របស់ប្រទេសណាទេ ។ ជាការកត់សម្គាល់កន្លងមកដែរ ក៏មានការដាក់មន្ទឹលទៅលើយោធាថៃ តែការសង្ស័យនោះត្រូវបានភាគីថៃបដិសេធ ។
នេះមិនមែនជាឧបទ្ទវហេតុលើកទី១ ទេ តែវាបានកើតមាន៣លើកមកហើយនៅឯខេត្តព្រះវិហារគិតទាំងលើកនេះផង។
តាមសេចក្តីរាយការណ៍របស់ទីភ្នាក់ងារថៃ កាលពីថ្ងៃទី២២ ធ្នូ ក៏បានផ្សាយឱ្យដឹងដែរថា នៅឯបរិវេណវាលស្រែក្នុងភូមិស្រល់ ក្បែរសាលាភូមិស្រល់ ក្នុងខេត្តស៊ីសាកេត ព្រំដែនកម្ពុជា-ថៃ បណ្តាអ្នកស្រុកនាំគ្នាភ្ញាក់ផ្អើលដោយសារបានប្រទះឃើញវត្ថុចម្លែកអណ្តែតនៅលើមេឃ ស្ថិតពីលើបរិវេណភូមិប្រហែល៣០ម៉ែត្រ និងមិនយូរប៉ុន្មានក៏មានការផ្ទុះបានធ្លាក់នៅពាសពេញបរិវេណព្រំដែនកម្ពុជា-ថៃចំនូនជាង២៣ចំណុច ។
ក្រោយពេលផ្ទុះ លោកភើមសក្តិ ឆាវីរ៉ាក ចៅហ្វាយស្រុកកាន់ថាឡាក់ រួមជាមួយមន្ត្រីជំនាញក្នុងកងទ័ពឈុតខ្មៅកងពល២៣បានដើរប្រមូលវត្ថុចម្លែកខាងលើ និងដាស់តឿនដល់ប្រជាជនមិនឱ្យប៉ះពាល់ ព្រោះខ្លាចកើតគ្រោះថ្នាក់ ដោយបច្ចុប្បន្នមិនទាន់ប្រាកដក្នុងចិត្តថា ជាវត្ថុអ្វីនោះទេ ។
លោកភើមសក្តិ ឆាវីរ៉ាក បានថ្លែងបន្តទៀតថា វត្ថុចម្លែកដែលប្រទះឃើញជាវត្ថុមានរាងមូលខ្នាតធំប៉ុនធុងប្រេងចំណុះ២០០លីត្រ ពណ៌ លឿង មានខ្មៅមួយនៅជុំវិញ និងមានអក្សរអង់គ្លេសរួមជាមួយតួលេខ “AZCE37-4-4B21” ។ វត្ថុខាងលើជាវត្ថុដ៏ពិសេសស្រដៀងនឹងវត្ថុច្នៃជាស្លាបយន្តហោះ និងមានទម្ងន់ស្រាល ។
គួរបញ្ជាក់ថា ការផ្ទុះនៃវត្ថុចម្លែកលើកនេះមិនបានបង្កការខូចខាតដល់អ្នកស្រុក និងប្រជាជននៅតាមព្រំដែនទេ ។ តាមសេចក្តីរាយការណ៍របស់កាសែតថៃថា មន្ត្រីជំនាញផ្នែកគ្រឿងផ្ទុះនៃកងទ័ពភូមិភាគ២ បានធ្វើការប្រមែប្រមូលវត្ថុចម្លែកខាងលើទៅទុកធ្វើការពិសោធន៍ ៕ ត្បែងមានជ័យ
ចែករំលែកព័តមាននេះ