ខេត្ត​កំពង់​ចាម ៖​  នៅព្រឹកថ្ងៃទី៣ ធ្នូ ឆ្នាំ​២០១១ មានកម្មវិធីសម្ពោធដាក់ឱ្យប្រើប្រាស់   ​ធនាគារវឌ្ឍនៈអាស៊ីចំកាត់សាខាកំពង់ចាម ស្ថិតនៅភូមិទី៧ សង្កាត់កំពង់ចាម ក្រុងកំពង់ចាម​ ក្រោមអធិបតីភាពលោកប៉ាល់ ប៊ុយ បុណ្ណាង អគ្គនាយក​នៃ​អគ្គនាយកដ្ឋាន​ត្រួត​ពិនិត្យ នៃធនាគារជាតិនៃកម្ពុជា តំណាងឱ្យ​លោកជា ចាន់តូ ទេសាភិបាល​ធនាគារ​ជាតិនៃ​កម្ពុជា និងលោកលន់ លឹមថៃ អភិបាលរង​ខេត្ត តំណាងឱ្យលោកហ៊ុន ណេង អភិបាលខេត្ត ។

លោក MADI AKMAMBET អគ្គនា យកធនាគារវឌ្ឍនៈអាស៊ីចំកាត់ (ABA Bank) បានថ្លែង​ថា សាខាខេត្តកំពង់​ចាម គឺជាសាខា​តាម​បណ្តាខេត្តទី៣របស់ ABA Bank ដែល​បាន​ដំណើរការក្រៅពីរាជធានីភ្នំពេញ​ដោយ​មានសកម្មភាពពាណិជ្ជកម្មដ៏កុះករ និងផ្តល់​សេវា​កម្មហិរញ្ញវត្ថុគ្រប់​​​ប្រភេទ​ប្រកប​ដោយ​គុណ​ភាព​ខ្ពស់ និងបណ្តាសេវាកម្មផ្សេងទៀតដូចជាប្រាក់​បញ្ញើ ប្រាក់កម្ចី ការផ្ទេរប្រាក់ ការផ្តល់នូវការទូ​ទាត់ ដោយប្រើប្រាស់កាត ដែលឆ្លើយតប​ទៅ​នឹង​តម្រូវ​ការ និងការរីកចម្រើន​យ៉ាង​ឆាប់​រហ័ស​របស់​សកម្ម​ភាពអាជីវកម្មនៅក្នុងប្រទេស។

លោក​ថ្លែងបន្តថា ការបើក​សម្ពោធ​សាខា​ខេត្តកំពង់ចាម​នាឱកាស​នេះបានបង្ហាញពីការ​លូត​លាស់យ៉ាងខ្លាំងរបស់​ធនាគារ ហើយ​ទន្ទឹម​ភាពជោគជ័យស្រប​ពេលនឹង​គម្រប់​ខួប​ទី​១៥​ឆ្នាំ​របស់ធនាគារ ហើយថ្មីៗនេះ​​ទទួល​បាន​ពានរង្វាន់​ក្នុង​ក្រប​ខណ្ឌនៃពានរង្វាន់ «Retail Bank of the year»ក្នុងប្រវត្តិនៃពានរង្វាន់ «Asian Banking and Finance Retail Banking» នៅ​ក្នុងប្រទេសសិង្ហបុរី។ បច្ចុ​ប្បន្ន​ធនាគារ​វឌ្ឍនៈអាស៊ីចំកាត់ (ABA BANK) មានសាខា​បម្រើ​សេវាកម្ម​ចំនួន១០ នៅក្នុងរាជ​ធានី​ភ្នំពេញ សៀម​រាប បាត់ដំបង និង​ខេត្ត​កំពង់​ចាម​ ​ហើយ​នឹង​បន្ត​​បើកសម្ពោធ​សាខា​នៅ​តាម​បណ្តា​ខេត្ត​​ផ្សេងៗ​ទៀតក្នុង​ពេល​អនា​គត។

លោកប៉ាល់ ប៊ុយបុណ្ណាងថ្លែង​​ថា ក្នុង​នាម​ធនា​គារ​​ជាតិនៃកម្ពុជារូបលោកសូមសម្តែង​ការអប​អរ​សាទរនិងកោតសរសើរចំពោះកិច្ច​ខិត​ខំ​ប្រឹង​​ប្រែង​របស់ថ្នាក់ដឹកនាំធនាគារវឌ្ឍនៈ​អាស៊ី​ចំកាត់ សម្រាប់​ទស្សនៈអនាគតដ៏ឈ្លាសវៃដើម្បី​ពង្រីក​បណ្តាញសាខានៅតាមទីក្រុង ទីរួម​ខេត្ត​និង​នៅ​តាមតំបន់ដែល​មាន​សក្តា​នុពល​សេដ្ឋកិច្ច     ជាពិសេស​ការបើកសាខាកំពង់ចាមនាពេលនេះ  ជាសក្ខីកម្មមួយបញ្ជាក់ពីការបង្កភាពងាយស្រួល​ជូនអតិថិជនរួមមានវិនិយោគិន អ្នក​ដាក់​ប្រាក់​សន្សំ អ្នកខ្ចីប្រាក់។

លោក​អគ្គនាយកត្រួត​ពិនិត្យ​នៃធនាគារ​ជាតិនៃកម្ពុជា ​បន្តថា រូបលោកមានជំនឿ​ថា​ធនា​គារវឌ្ឍ​នៈ​អាស៊ីចំកាត់ នឹងបន្តភាពជាដៃគូ​អភិវឌ្ឍ​ន៍​របស់​រាជ​រដ្ឋាភិបាលកម្ពុជាតាម​រយៈ​ការ​​ជួយ​បង្កើត​ការងារកាត់បន្ថយ​​ភាព​ក្រី​ក្រ​របស់ប្រជាពលរដ្ឋស្របតាម​យុទ្ធ​សាស្រ្ត​ចតុ​កោណ​របស់រាជរដ្ឋាភិបាលក្រោ​ម​ការដឹក​នាំ​ដ៏ឈ្លាស​​វៃប្រកប​ដោយ​គតិ​បណ្ឌិតរបស់​សម្តេច​អគ្គ​មហាសេនាបតីតេជោហ៊ុន សែន នាយក​រដ្ឋ​មន្រ្តី​នៃព្រះរាជាណាចក្រ​កម្ពុជា និងបន្ត​ជា​ប្រតិ​បត្តិករល្អជាមួយ​ធនាគារ​ជាតិនៃកម្ពុជា​ក្នុង​ការ​អនុ​វត្ត​បទប្បញ្ញត្តិយ៉ាងខ្ជាប់​​ខ្ជួន និង​ជា​អ្នក​ផ្តល់​សេវា​កម្មហិរញ្ញវត្ថុល្អ​ជាមួយ​អតិថិជន​ទូទៅ​ក្នុង​ការ​ពង្រីកប្រតិបត្តិការរបស់​ខ្លួនឱ្យ​មាន​ប្រសិទ្ធ​ភាពថែមទៀត។

លោកលន់ លឹមថៃ អភិ​បាល​រង​ខេត្ត ​លោក​ប៉ាល់ ប៊ុយបុណ្ណាង អគ្គនាយក​ត្រួត​ពិនិត្យ​នៃធនាគារជាតិនៃកម្ពុជា និងលោក​MADI AKMAMBET អគ្គនា​យកធនាគារ​វឌ្ឍនៈ​អាស៊ី​ចំកាត់បាន​កាត់​ខ្សែបូ​ដាក់ឱ្យ​ប្រើ​ប្រាស់​​ធនា​គារ ABA Bank សាខា​កំពង់ចាម​ចាប់ពីពេល​នេះ​ត​ទៅ៕