រាជធានីភ្នំពេញ ៖ កាកសំណង់ជាសារធាតុគីមីនៅក្នុងរោងចក្រខ្មែរប្លាស្ទិចបានផ្ទុះឡើងបញ្ចេញសំឡេងលាន់ឮសូរដូចជាគេបាញ់កាំភ្លើង AK និងបំភាយក្លិនដ៏អាក្រក់ចេញមកក្រៅបង្កការភ្ញាក់ផ្អើលទាំងកណ្តាលយប់។ ហេតុការណ៍នោះបានកើតឡើងកាលពីវេលាម៉ោងជាង១២រំលងអធ្រាត្រឈានចូលថ្ងៃទី៧ វិច្ឆិកា នៅក្នុងរោងចក្រខ្មែរបា្លស្ទិកដែលមានទីតាំងស្ថិតនៅក្នុងភូមិស្រែជំរៅ សង្កាត់ចោមចៅ ខណ្ឌដង្កោ។
រោងចក្រប្លាស្ទិកនោះផលិតធុងជ័រ និងធុងចំរោះទឹករបស់លោកកុយ ធុយ អាយុជាង៥០ឆ្នាំ ដែលដំណើរការយូរឆ្នាំមកហើយ ប៉ុន្តែគេពុំដឹងថា មានច្បាប់អនុញ្ញាតត្រឹមត្រូវដែរឬអត់នោះទេ ម្យា៉ងក៏មិនដឹងថា អ្នកគ្រប់គ្រងមានបទពិសោធន៍ និងបច្ចេកទេសកម្រិតណាដែរ។ តាមប្រភពព័ត៌ មានពីប្រជាពលរដ្ឋបានឱ្យដឹងថា កាកសំណល់ដែលផ្ទុកដោយសារធាតុគីមីនៅក្នុងរោងចក្រនោះត្រូវគេជីកដីជម្រៅប្រមាណជាង១ម៉ែត្រកប់ចោលនៅក្បែររបងខាងត្បូងក្នុងបរិវេណរោងចក្រ ហើយវាចាប់ផ្តើមផ្ទុះចេញមកក្រៅនៅវេលាពាក់កណ្តាលអធ្រាត្រ ។ ការផ្ទុះនោះបានបញ្ចេញសំឡេងលាន់ឮឡើងដូចជាគេបាញ់កាំភ្លើង AK ធ្វើឱ្យមានការភ្ញាក់ផ្អើលពេញភូមិ បន្ទាប់មកទៀត បានជះក្លិនសាយភាយចេញក្រៅ ដែលក្លិននោះអាក្រក់ខ្លាំងណាស់ស្ទើរទ្រាំពុំបានមានអ្នកខ្លះថប់ដង្ហើមក្អួតចង្អោរស្ទើរសន្លប់បាត់ស្មារតីទៀតផង ។
អាជ្ញាធរខណ្ឌដង្កោ បន្ទាប់ពីទទួលព័ត៌មាននោះភ្លាមក៏ចុះទៅកាន់ទីតាំងរោងចក្រហើយបានរកឃើញសារធាតុគិមីម្យា៉ងដែលកំពុងពុះ និងផ្ទុះចេញពីក្នុងដី ប៉ុន្តែគេមិនទាន់ដឹងប្រាដកថា ជាសារធាតុគីមីឈ្មោះអ្វីនៅឡើយទេ ។ ដោយឡែកមន្ត្រីការិយាល័យបរិស្ថានខណ្ឌដង្កោបានឱ្យដឹងថា ក្លិនដែលភាយចេញមកក្រៅវាធ្វើឱ្យប៉ះពាល់បរិស្ថាន និងសុខភាពមនុស្សសត្វដែលនៅជុំវិញនោះ។ ទោះបីជាបែបណាអាជ្ញាធរដែលចុះទៅពិនិត្យ ពេលនោះមានសង្កាត់ និងខណ្ឌបានធ្វើការណែនាំឱ្យម្ចាស់រោងចក្រឱ្យធ្វើការសំអាតជាតិគីមីនោះឱ្យបានស្អាត ព្រមទាំងបិទផ្អាកដំណើរការរោងចក្រនោះជាបណ្តោះអាសន្នមួយរយៈពេលសិន រង់ចាំស្រាវជ្រាវជាបន្តទៀត៕
ចែករំលែកព័តមាននេះ