រាជធានីភ្នំពេញ ៖ លោកឯក ថា អ្នកនាំពាក្យនិងជាអនុប្រធាននាយកដ្ឋានព័ត៌មាននៃអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីបានប្រាប់ឱ្យដឹងថា ក្នុងជំនួបពិភាក្សាការងាររវាងលោកបណ្ឌិតសភាចារ្យសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជាមួយលោក POKSAK NILUBOL ប្រធានសមាគមមិត្តភាពកម្ពុជា-ថៃ នាល្ងាចថ្ងៃទី២ វិច្ឆិកា នៅទីស្តីការគណៈរដ្ឋមន្ត្រី បានផ្តោតទៅលើកិច្ចសហប្រតិបត្តិការវប្បធម៌រវាងប្រទេសទាំងពីរ ។
ក្នុងកិច្ចពិភាក្សានោះ លោកបណ្ឌិតសភាចារ្យសុខ អាន បានរំលឹកឡើងវិញពីការបង្កើតគណៈកម្មាធិការសម្រាប់សហប្រតិបត្តិការវប្បធម៌នៅឆ្នាំ២០០៣-២០០៤ ក្រោយពីមានការបកស្រាយរបស់តារាភាពយន្តថៃ នាងផ្កាយព្រឹក ខុសពីការពិតថា ប្រាសាទអង្គរវត្តជារបស់ថៃ។ នៅពេលនោះគណៈកម្មាធិការដែលបានបង្កើតឡើងបានដើរតួនាទីសំខាន់ក្នុងវិស័យ៣ មានវប្បធម៌ ប្រវត្តិសាស្ត្រ និងទេសចរណ៍ ។ នៅក្នុងកិច្ចពិភាក្សានេះ ភាគីថៃបានស្នើសុំភាគីកម្ពុជាឱ្យបន្ថែមចំណុចមួយចំនួនទៀតមានវិស័យសុខាភិបាល អប់រំ សេដ្ឋកិច្ច ។
លោកបណ្ឌិតសភាចារ្យសុខ អាន បានស្នើឱ្យរាជបណ្ឌិត្យសភាកម្ពុជាធ្វើការជាមួយសមាគមមិត្តភាពកម្ពុជា-ថៃ និងជ្រើសរើសមន្ត្រីជំនាញឱ្យធ្វើការទៅតាមវិស័យដែលបានលើកឡើងខាងលើ ។ លោកបណ្ឌិតសភាចារ្យក៏បានបញ្ជាក់ផងដែរថា ការដែលកម្ពុជាបង្កើនសហប្រតិបត្តិការវប្បធម៌ជាមួយថៃ គឺក្នុងគោលបំណងរួមចំណែកកសាងសហគមន៍អាស៊ានមួយនៅឆ្នាំ២០១៥ ដែលសហគមន៍នេះមានគោលដៅបើកចំហពាណិជ្ជកម្មព្រំដែន នយោបាយ និងវប្បធម៌សង្គម ដើម្បីជួយសម្រួលលំហូរពាណិជ្ជកម្មតាមព្រំដែន ។
ទន្ទឹមនឹងនេះដែរ សមាគមមិត្តភាពកម្ពុជា-ថៃ នឹងដើរតួនាទីសំខាន់ក្នុងការជួយសម្រួលការងារក្នុងបរិបទនៃសហគមន៍អាស៊ាន ដែលនឹងលេចចេញជារូបរាងឡើងនៅឆ្នាំ២០១៥ ខាងមុខនេះ។ ជាប្រទេសជិតខាងគ្នា យើងចង់ឱ្យមានកិច្ចសហប្រតិបត្តិការបន្ថែមទៀតលើគ្រប់វិស័យ ដើម្បីធ្វើយ៉ាងណាឱ្យប្រជាជាតិ និងប្រទេសយើងទាំងពីរទទួលបានផលប្រយោជន៍កាន់តែច្រើនឡើងបន្ថែមទៀត ពីវិស័យសេដ្ឋកិច្ច ពាណិជ្ជកម្មទេសចរណ៍ ក៏ដូចជាវិស័យឯទៀត ៕
ចែករំលែកព័តមាននេះ