រាជធានីភ្នំពេញ ៖ កាលពីរសៀលថ្ងៃសុក្រ ទី២៦ សីហា ហាងការ៉េមស្វិនសិន ដែលជាហាងការ៉េមល្បីមានប្រភពពីសហរដ្ឋអាមេរិក និងពេញនិយមបំផុតសម្រាប់មនុស្សសម័យថ្មី ត្រូវបានរៀបចំកម្មវិធីជួបជុំយ៉ាងពិសេសមួយហៅថា Celebrate with Star សម្រាប់អតិថិជនរបស់ខ្លួន ដែលសុទ្ធតែជាយុវវ័យមកជួបជុំគ្នាញ៉ាំកា
រាជធានីភ្នំពេញ ៖ កាលពីរសៀលថ្ងៃសុក្រ ទី២៦ សីហា ហាងការ៉េមស្វិនសិន ដែលជាហាងការ៉េមល្បីមានប្រភពពីសហរដ្ឋអាមេរិក និងពេញនិយមបំផុតសម្រាប់មនុស្សសម័យថ្មី ត្រូវបានរៀបចំកម្មវិធីជួបជុំយ៉ាងពិសេសមួយហៅថា Celebrate with Star សម្រាប់អតិថិជនរបស់ខ្លួន ដែលសុទ្ធតែជាយុវវ័យមកជួបជុំគ្នាញ៉ាំការ៉េមដោយឥតគិតថ្លៃ និងចូលរួមរីករាយជាមួយកម្មវិធីកម្សាន្តផ្សេងៗ ដោយមានការអព្ជើាញចូលរួមពីតារាចំរៀងស៊ីម ថៃណា ជាតារាកិត្ដិយស និងបង្កើតភាពស្និទ្ឋស្នាលជាមួយអតិថិជនរបស់ខ្លួន។ ហាងការ៉េម ស្វិនសិន ដែលត្រូវបានរៀបចំ ឡើងនៅ សាខាថ្មី មានទីតាំងនៅផ្សារទំនើបផារ៉ាហ្គនជាន់ផ្ទាល់ដី។
នៅក្នុងកម្មវិធីដ៏សប្បាយមួយនេះ បានផ្ដល់ឱ្យយុវវ័យដែលបានអព្ជើាញមកចូលរួមទាំងអស់ នូវភាពសប្បាយរីករាយជាមួយនឹងការលេងហ្គេម ព្រមទាំងការបកស្រាយនូវបទចំរៀងរបស់កញ្ញា ស៊ីម ថៃណា និងមានការថតរូបអនុស្សាវរីយ៍ររវាងអតិថិជនស្វិនសិន រួមជាមួយតារាម្រៀងដែលឋិតក្នុងចិត្ដរបស់ពួកគេហើយមិនតែប៉ុណ្ណោះ ថែមទាំងបានទទួលនូវវត្ថុអនុស្សាវរីយ៍ពីតារាកិត្ដិយសផងដែរ។
ក្នុងឱកាសជួបផ្ទាល់ជាមួយតារាចម្រៀងស៊ីម ថៃណា កញ្ញាបាននិយាយថា នាងក៏ជាអតិថិជនមួយរូបរបស់ស្វិនសិនដែលតែងតែមកញ៉ាំការ៉េមនៅទីនេះជាញឹកញាប់ព្រោះតែការជាប់ចិត្ដទៅលើរសជាតិនៃការ៉េមស្វិនសិន និងបរិយាកាសក្នុងហាង ម្យ៉ាងវិញទៀតគឺវាមិនធ្វើអោយធាត់នោះទេ។ ស៊ីម ថៃណា បានបង្ហាញនូវអារម្មណ៍សប្បាយរីករាយក្នុងការចូលរួមកម្មវិធីនេះ ជាមួយអតិថិជនរបស់ស្វិនសិន និងក្រុមអ្នកគាំទ្ររបស់កញ្ញា។
ស្វិនសិន ត្រូវបានទិញសិទ្ធិផ្ដាច់មុខនាំចូលមកប្រទេសកម្ពុជាដោយក្រុមហ៊ុន អ៊ី អេហ្វ ជី នៅឆ្នាំ២០០៧ ហើយអាចរក្សាភ្ជាប់ជានិច្ចនូវគោលការណ៍៣សំខាន់ៗរបស់ម្ចាស់ដើម គឺលោកអៀល ស្វិនសិន ដែលជាអ្នករកឃើញរូបមន្ដពិសេស តាំងពីឆ្នាំ ១៩៤៨ មានគុណភាព បរិមាណ និងតម្លៃ។ ទាំងនេះបានធ្វើឱ្យស្វិនសិនទទួលបានភាពជោគជ័យដូចសព្វថ្ងៃ៕
ចែករំលែកព័តមាននេះ