រាជធានីភ្នំពេញ ៖ នៅលើសង្វៀនស្ថានីយទូរទស្សន៍ CTN ថ្ងៃសុក្រ ទី២ កញ្ញា គឺជាការប្រកួតដណ្តើមខ្សែក្រវាត់ខារ៉ាបាវ ប្រភេទទម្ងន់៥៤គីឡូក្រាម វគ្គជម្រុះក្នុងពូលA ដែលមានទាំងអស់ចំនួន២គូត្រូវជួបគ្នា ។ ធា រិទ្ធី មកពីក្លឹបអេភូថងកីឡា ជួបជ័យ វណ្ណៈ មកពីក្លឹបឃ្លាំងមឿងកីឡា ។ អ៊ឹង បូរ៉ា មកពីក្លឹបសិង្ហកីឡាជួប ហ៊ុល ដារ៉ា មកពីក្លឹបសាលវ័ន្តកីឡា ។
នៅក្នុងពូល A នេះ ធា រិទ្ធី ប្រកួតបាន២លើកហើយ គឺលើកទី១បានចាញ់សន្លប់ក្រោមកណ្តាប់ដៃអ៊ឹង បូរ៉ា មកពីក្លឹបសិង្ហកីឡានៅក្នុងទឹកទី៤ ប៉ុន្តែសម្រាប់ការប្រកួតជាលើកទី២ គេបានវាយផ្តួលហ៊ុល ដារ៉ា មកពីក្លឹបសាលវ័ន្តកីឡាឱ្យសន្លប់នៅទឹកទី២ វិញម្តង ។ ដូច្នេះបានសេចក្តីថា ការប្រកួតទាំង២លើកមកនេះ ចាញ់១ ឈ្នះ១ មាន៤ពិន្ទុ ប៉ុន្តែគេនៅសល់៣ប្រកួតទៀតរាប់ទាំងជួប វណ្ណៈ លើកនេះផង ហើយបើសិនជាគេមានសំណាងយកឈ្នះរហូតនោះអាចគេចផុតពីការហាលខោបាន ។ ប៉ុន្តែសម្រាប់វណ្ណៈវិញ ក៏ត្រូវការឈ្នះដូចគ្នា ហើយការប្រកួត២លើកមកនេះគេឈ្នះទាំង២លើកជាប់គ្នា និងមាន៦ពិន្ទុហើយ ។ ដូច្នេះជ័យជម្នះ លើកនេះ សម្រាប់រូបគេពិតជាមានសារសំខាន់ខ្លាំងណាស់ តែអត់មានអ្នកណាហ៊ានធានាទេ ព្រោះរិទ្ធីក៏ជាជើងខ្លាំងម្នាក់មិនងាយនឹងយកឈ្នះឡើយ ។
អ៊ឹង បូរ៉ា មកពីក្លឹបសិង្ហកីឡា ជួប ហ៊ុល ដារ៉ា មកពីក្លឹបសាលវ័ន្តកីឡា ។ បូរ៉ា ពេលនេះបានក្លាយជាអ្នកដែលមានពិន្ទុនាំមុខគេក្នុងពូលរួចទៅហើយ ព្រោះអីការប្រកួតទាំង៣លើកកន្លងមកអត់ទាន់ស្គាល់ចាញ់ម្តងណាឡើយ និងមាន៩ពិន្ទុ ។ ចំណែកហ៊ុល ដារ៉ា វិញ ប្រកួតបាន៣លើកដូចគ្នា ប៉ុន្តែឈ្នះ១ ចាញ់២ មានត្រឹម៥ពិន្ទុប៉ុណ្ណោះ ។ លើកនេះគេក៏ត្រូវការឈ្នះដែរ ប៉ុន្តែទំនងបែបមិនសូវជាមានសង្ឃឹមប៉ុន្មានឡើយ ព្រោះថាការមកប៉ះបូរ៉ា ដែលជាកំពូលអ្នកមានល្បិចប្រយុទ្ធដ៏សម្បូរបែបម្នាក់នេះក៏ពិបាកណាស់ដែរ ។
ទឹម សាន មកពីក្លឹបអាស៊ីកីឡា ជួបថៃ ប៊ុន ហាន មកពីក្លឹបបុរីនាគរាជជាលក្ខណៈមិត្តភាព។ រវាងគូនេះជាអ្នកប្រដាល់ចាស់វស្សាដូចគ្នា តែល្បិចប្រយុទ្ធនៅលើសង្វៀនរវាងគេទាំង២ មិនសូវជាខ្លាំងណាស់ណាទេ ហើយស្បែកមុខ ក៏អន់ដូចគ្នាទៀត ។ ប៉ុន្តែប៊ុនហាន ចិត្តសឿងជាង និងអាចមានជំនឿចិត្តក្នុងការយកឈ្នះច្រើនជាងទៀត ។
ពុទ្ធ ឆាយដារ៉ូ មកពីក្លឹបពុទ្ធសេរីវង្សព្រែកតាទែន ជួបម៉ាក់ សាមុត មកពីក្លឹបខេត្តរតនគិរី ។ កែវ ម៉ាន់អើយ មកពីក្លឹបយុវកីឡាខេត្តកណ្តាលជួប ធឿន សាវឌី មកពីក្លឹបអេភូថងកីឡា ៕
ចែករំលែកព័តមាននេះ