រាជធានីភ្នំពេញ ៖ សាកលវិទ្យាល័យហ្សាម៉ាន់បានធ្វើការអញ្ជើញសាធារណជនមកទស្សនា អគារសិក្សារបស់ខ្លួននាថ្ងៃទី២៧ សីហា នេះ ។
សិស្ស និស្សិត និងអាណាព្យាបាលទាំងអស់មានឱកាសបានដើរមើលសាលប្រជុំទំនើប និងធំទូលាយដែលអាចទទួលភ្ញៀវចូលរួមបាន២៣២នាក់ និងថ្នាក់រៀន
រាជធានីភ្នំពេញ ៖ សាកលវិទ្យាល័យហ្សាម៉ាន់បានធ្វើការអញ្ជើញសាធារណជនមកទស្សនាអគារសិក្សារបស់ខ្លួននាថ្ងៃទី២៧ សីហា នេះ ។
សិស្ស និស្សិត និងអាណាព្យាបាលទាំងអស់មានឱកាសបានដើរមើលសាលប្រជុំទំនើប និងធំទូលាយដែលអាចទទួលភ្ញៀវចូលរួមបាន២៣២នាក់ និងថ្នាក់រៀនផ្សេងៗដ៏ថ្មីស្រឡាងដែលសុទ្ធតែបំពាក់ទៅដោយបរិក្ខារទំនើបៗ ដូចជាឧបករណ៍បញ្ចាំងស្លាយ (Projector) ម៉ាស៊ីនត្រជាក់ និងក្តារខៀនអេឡិចត្រូនិក (Smart Board) ដែលបង្កលក្ខណៈងាយស្រួលដល់ការសិក្សារបស់និស្សិត ។
បន្ទាប់មកភ្ញៀវទាំងអស់បានអញ្ជើញទៅទស្សនាបណ្ណាល័យរបស់សាកលវិទ្យាល័យហ្សាម៉ាន់ដែលមានសៀវភៅជាង៥.០០០ក្បាល និងធនធានសិក្សាអេឡិចត្រូនិកដ៏សម្បូរបែបដែលសម្រួលដល់ការសិក្សាស្រាវជ្រាវរបស់និស្សិត និងសាស្ត្រាចារ្យរបស់សាកលវិទ្យាល័យហ្សាម៉ាន់ ។
ភ្ញៀវកិត្តិយសទាំងអស់ក៏បានទទួលព័ត៌មានអំពីក្លឹបនិស្សិតនានានៅសាកលវិទ្យាល័យហ្សាមា៉ន់ដែលបានបង្កើនចំណេះដឹង និងជំនាញសង្គមក្រៅមុខវិជ្ជាសិក្សាដល់និស្សិតរួមមានក្លឹបហ្គីតារ ក្លឹបវីហូយូឡុង ក្លឹបរៀបពាក្យអង់គ្លេស (Scrabble) ក្លឹបរាំ ក្លឹបភាសាខ្មែរ ក្លឹបភាសាចិន ក្លឹប Sudoku ក្លឹបពិភាក្សាដេញដោល ក្លឹបភាពយន្ត និងក្លឹបសិល្បៈ និងចំអិន ។
ក្នុងចំណោមនិស្សិតទាំងអស់ដែលកំពុងសិក្សានៅសាកលវិទ្យាល័យហ្សាម៉ាន់ គឺ មាន២៥% ជានិស្សិតអន្តរជាតិមកពីប្រទេសជាង១០នៅក្នុងសាកលលោក ។ ទាំងនិស្សិត និងសាស្ត្រាចារ្យទាំងអស់នៅសាកលវិទ្យាល័យហ្សាម៉ាន់ សុទ្ធតែទទួលបានបទពិសោធន៍ដ៏ល្អក្នុងការប្រាស្រ័យទាក់ទងនៅក្នុងមជ្ឈដ្ឋានមួយដែលមានវប្បធម៌ចម្រុះ ហើយជាពិសេសគឺនិស្សិតទាំងអស់មានឱកាសប្រើប្រាស់ភាសាអង់គ្លេសដោយពេញលេញក្នុងការសិក្សា និងទំនាក់ទំនងទូទៅរបស់ពួកគេ ។
ទន្ទឹមនឹងនេះភ្ញៀវទាំងអស់ក៏បានទៅពិនិត្យមើលបន្ទប់កុំព្យូទ័រដែលមានកុំព្យូទ័រទំនើបជាង៤០គ្រឿង សម្រាប់បង្កើនចំណេះដឹងសិក្សាទូទៅ ក៏ដូចជាការអនុវត្តផ្ទាល់នូវចំណេះដឹងផ្នែកព័ត៌មានវិទ្យារបស់និស្សិតនៅសាកលវិទ្យាល័យហ្សាម៉ាន់ ។ គួរបញ្ជាក់ផងដែរថា អគាររបស់សាកលវិទ្យាល័យហ្សាម៉ាន់ក៏មានប្រព័ន្ធអ៊ីនធើរណេត សម្រាប់និស្សិតប្រើប្រាស់នៅគ្រប់ទីកន្លែង នៃអគារសិក្សាដែរ ។
សាកលវិទ្យាល័យហ្សាម៉ាន់ មានផ្តល់ជូនមុខជំនាញសិក្សាចំនួន៨ គឺវិស្វកម្មសំណង់ស៊ីវិល វិទ្យាសាស្ត្រកុំព្យូទ័រ គ្រប់គ្រងប្រព័ន្ធព័ត៌មានវិទ្យា រចនាក្រាហ្វិក និងពហុប្រព័ន្ធផ្សព្វផ្សាយគ្រប់គ្រងជំនួញ ធនាគារ និងហិរញ្ញវត្ថុ ទំនាក់ទំនងអន្តរជាតិ និងភាសាអង់គ្លេស ។
ក្នុងឱកាសនេះដែរ ភ្ញៀវទាំងអស់ក៏បានទទួលព័ត៌មានលំអិតអំពីកម្មវិធីសិក្សារបស់សាកលវិទ្យាល័យហ្សាមា៉ន់ និងបានជួបសំណេះ សំណាលជាមួយនឹងសាស្ត្រាចារ្យដែលមានគុណវឌ្ឍន៍ខ្ពស់ គឺ សញ្ញាបត្របរិញ្ញាបត្រជាន់ខ្ពស់ និងបណ្ឌិត ក៏ដូចជាព័ត៌មានលំអិតអំពីកម្មវិធីសិក្សាថ្នាក់ឆ្នាំមូលដ្ឋានសម្រាប់ឆ្នាំសិក្សា២០១១-២០១២ និងសៀវភៅសម្ភារសិក្សានានាផងដែរ ។
ថ្មីៗនេះសាកលវិទ្យាល័យហ្សាម៉ាន់ បានចុះកិច្ចព្រមព្រៀងជាមួយនឹងសាកលវិទ្យាល័យមួយនៅសហរដ្ឋអាមេរិក គឺ North American College ។ កិច្ចព្រមព្រៀងនេះ នឹងអនុញ្ញាតឱ្យនិស្សិតរបស់សាកលវិទ្យាល័យហ្សាមា៉ន់ទៅបន្តការសិក្សានៅ North American College នៅឆ្នាំទី៣ និងទី៤ នៅឯសហរដ្ឋអាមេរិក ដោយនឹងទទួលបានសញ្ញាបត្រ២ គឺពី North American College ផង និងពីសាកលវិទ្យាល័យហ្សាមា៉ន់ផង ។ សាកលវិទ្យាល័យហ្សាម៉ាន់ ក៏ បានជួបពិភាក្សាជាមួយគណៈគ្រប់គ្រងរបស់សាកលវិទ្យាល័យ Texas A&M នៅសហរដ្ឋអាមេរិក ដែលផ្នែកមួយនៃ កិច្ចព្រមព្រៀងនេះ និស្សិតឆ្នាំទី៤ នៃមហាវិទ្យាល័យអប់រំរបស់សាកលវិទ្យាល័យ Texas A&Mនឹងត្រូវធ្វើទស្សនកិច្ចមកកាន់ព្រះរាជាណាចក្រកម្ពុជា ហើយក៏ត្រូវចុះធ្វើកម្មសិក្សាក្នុងថ្នាក់ត្រៀមភាសាអង់គ្លេសនៅសាកលវិទ្យាល័យហ្សាមា៉ន់រយៈពេលបីសប្តាហ៍នៅអំឡុងពេលថ្ងៃបុណ្យណូអែលនាពេលខាងមុខនេះដែលជាពេលវិស្សមកាលនៅសហរដ្ឋអាមេរិក ។ និស្សិតក៏នឹងមានឱកាសរៀនភាសាខ្មែរនៅអំឡុងពេលដែលពួកគេស្នាក់នៅប្រទេសកម្ពុជាផងដែរ ។ បន្ថែមពីនេះទៀត វិទ្យាសា្ថន Norman Borlaug របស់សាកលវិទ្យាល័យ Texas A&M ក៏នឹងមានកិច្ចសហប្រតិបត្តិការជាមួយសាកលវិទ្យាល័យហ្សាមា៉ន់សម្រាប់គម្រោងអភិវឌ្ឍន៍ទាក់ទងនឹងបញ្ហាសំណង់សីុវិលនៅប្រទេសកម្ពុជា ។
សាកលវិទ្យាល័យហ្សាម៉ាន់ក៏ផ្តល់ផងដែរ នូវវគ្គសិក្សាភាសាអង់គ្លេសនៅពេលល្ងាចដែលវគ្គសិក្សានេះ មានចំនួន៤ដងក្នុងមួយឆ្នាំ ។ នៅខែតុលាខាងមុខនេះ សាកលវិទ្យាល័យហ្សាម៉ាន់ក៏នឹងមានបើកវគ្គបង្រៀនភាសាចិនផងដែរ ។
សម្រាប់ឆ្នាំសិក្សា២០១១-២០១២ នេះសាកលវិទ្យាល័យហ្សាម៉ាន់នឹងផ្តល់ជូនអាហារូបករណ៍ដល់សិស្ស និស្សិតកម្ពុជាចំនួន៣០០នាក់។ ការប្រឡងអាហារូបករណ៍នេះនឹងធ្វើឡើងនៅថ្ងៃទី៣ កញ្ញា នាវេលាម៉ោង១០ព្រឹកនៅអគារសាកលវិទ្យាល័យហ្សាមា៉ន់ ។ សិស្ស និស្សិតទាំងអស់ដែលមានចំណាប់អារម្មណ៍សូមទាក់ទងទៅកាន់ទូរស័ព្ទលេខ០២៣ ៩៩៦ ១១១ ។ សាកលវិទ្យាល័យហ្សាម៉ាន់នឹងចាប់បើកបវេសនកាលនៅថ្ងៃទី១០ តុលា ខាងមុខនេះ ៕
ចែករំលែកព័តមាននេះ