រាជធានីភ្នំពេញ ៖ ការប្រកួតកីឡាមហាជនជ្រើសរើសជើងឯកភូមិភាគរាជធានីភ្នំពេញដែលបានដំណើរការអស់រយៈពេល១៤ថ្ងៃបានបញ្ចប់ជាស្ថាពរហើយនៅព្រឹកថ្ងៃអាទិត្យ ទី២១សីហា កន្លងមកនេះ ។ លោកហ៊ុន សាមុត ប្រធានគណៈកម្មការរៀបចំការប្រកួតបានឱ្យដឹងថា
រាជធានីភ្នំពេញ ៖ ការប្រកួតកីឡាមហាជនជ្រើសរើសជើងឯកភូមិភាគរាជធានីភ្នំពេញដែលបានដំណើរការអស់រយៈពេល១៤ថ្ងៃបានបញ្ចប់ជាស្ថាពរហើយនៅព្រឹកថ្ងៃអាទិត្យ ទី២១សីហា កន្លងមកនេះ ។
លោកហ៊ុន សាមុត ប្រធានគណៈកម្មការរៀបចំការប្រកួតបានឱ្យដឹងថា វិញ្ញាសាដែលដាក់ឱ្យប្រកួតមានបាល់ទាត់ បាល់ទះ បាល់បោះ និងអត្តពលកម្ម ។ សម្រាប់លទ្ធផលបញ្ចប់ជាផ្លូវការ គិតជាចំណាត់ថ្នាក់ក្រុមលើវិញ្ញាសាអត្តពលកម្ម ក្រុមសាកលវិទ្យាល័យធនធានមនុស្សរកបានមេដាយមាសច្រើនជាងគេគឺមានរហូតដល់៦ មេដាយប្រាក់១ សំរឹទ្ធិ៣ សរុប១០មេដាយ ។ ចំណាត់ថ្នាក់លេខ២ បានទៅលើក្រុមអគ្គស្នងការដ្ឋាននគរបាលជាតិមានមេដាយមាស៤ ប្រាក់៥ និងសំរឹទ្ធិ២ សរុប១១មេដាយ និងលេខ៣ បានទៅលើក្រុមរាជធានីភ្នំពេញបានមេដាយមាស១ ប្រាក់៣ សំរឹទ្ធិ៥ សរុប៩ មេដាយ ។
វិញ្ញាសាបាល់បោះលេខ១ បានទៅលើក្រុមរាជធានីភ្នំពេញ លេខ២ បានទៅក្រុមអគ្គស្នងការដ្ឋាននគរបាលជាតិ ។ វិញ្ញាសាបាល់ទាត់លេខ១ បានទៅក្រុមអគ្គលេខាធិការដ្ឋានព្រឹទ្ធសភា លេខ២ បានទៅក្រុមក្រសួងព័ត៌មាន និងលេខ៣ បានទៅក្រុមមជ្ឈមណ្ឌលសកម្មភាពកម្ចាត់មីនកម្ពុជា ។ វិញ្ញាសាបាល់ទះ លេខ១ បានទៅក្រុមគណៈកម្មាធិការជាតិគ្រប់គ្រងគ្រោះមហន្តរាយ លេខ២ ក្រុមរាជធានីភ្នំពេញ និងលេខ៣ បានទៅក្រុមមជ្ឈមណ្ឌលសកម្មភាពកម្ចាត់មីនកម្ពុជា ។
លោកហ៊ុន សាមុត បានបន្តឱ្យដឹងទៀតថា លើវិញ្ញាសាបាល់ទាត់ បាល់ទះ និងបាល់បោះត្រូវជ្រើសរើសយកលេខ១ និងលេខ២ សម្រាប់ឡើងទៅប្រកួតជ្រើសរើសជើងឯកទូទាំងប្រទេសនៅខេត្តកំពង់ចាមខែកញ្ញាខាងមុខនេះ ។ ដោយឡែកសម្រាប់វិញ្ញាសាអត្តពលកម្ម ក្រុមដែលទទួលបានមេដាយមាសមានសិទ្ធិអាចធ្វើការជ្រើសរើសយកកីឡារបស់ខ្លួនដែលជាប់ចំណាត់ថ្នាក់ទៅធ្វើការប្រកួតជាបន្តទៀតបាន ។ រីឯវិញ្ញាសាដែលតម្រូវដាក់ឱ្យប្រកួតទូទាំងប្រទេសមានរហូតដល់ទៅ១៨ប្រភេទខុសប្លែកពីការប្រកួតតាមមណ្ឌលកន្លងមកដែលមានតែ១២ប្រភេទប៉ុណ្ណោះ ៕
ចែករំលែកព័តមាននេះ