ខេត្តកំពង់ចាម ៖ កាលពីថ្ងៃទី១៣ សីហា ឆ្នាំ២០១១ នៅសាខាសាកលវិទ្យាល័យគ្រប់គ្រងនិងសេដ្ឋកិច្ចខេត្ត (UME) មានរៀបចំពិធីការពារសារណារបស់និស្សិតថ្នាក់បរិញ្ញាបត្រជំនាន់ទី៦ នៃមហាវិទ្យាល័យគ្រប់គ្រងពាណិជ្ជកម្មនិងទេសចរណ៍ ដែលមាននិស្សិតសរុបចំនួន ១៥៤នាក់ ក្រោមអធិបតីភាពលោកមួន
ខេត្តកំពង់ចាម ៖ កាលពីថ្ងៃទី១៣ សីហា ឆ្នាំ២០១១ នៅសាខាសាកលវិទ្យាល័យគ្រប់គ្រងនិងសេដ្ឋកិច្ចខេត្ត (UME) មានរៀបចំពិធីការពារសារណារបស់និស្សិតថ្នាក់បរិញ្ញាបត្រជំនាន់ទី៦ នៃមហាវិទ្យាល័យគ្រប់គ្រងពាណិជ្ជកម្មនិងទេសចរណ៍ ដែលមាននិស្សិតសរុបចំនួន ១៥៤នាក់ ក្រោមអធិបតីភាពលោកមួន វាសនា ប្រធានគណៈកម្មការនាយក នៃសាខាសាកលវិទ្យាល័យគ្រប់គ្រង និងសេដ្ឋកិច្ចខេត្ត។ កម្មវិធីនេះត្រូវបានចាប់ផ្តើមតាំងពីវេលាម៉ោង៧ព្រឹក រហូតដល់ម៉ោង៦និង១៥នាទីល្ងាច។ ដោយមានការអញ្ជើញចូលរួមពីលោកសាស្រ្តាចារ្យមួយចំនួន ដែលធ្វើការនៅក្រសួងអប់រំយុវជន និងកីឡាក្រសួងការងារនិងសាស្រ្តាចារ្យ ដែលបំពេញការងារ នៅតាមស្ថាប័នរដ្ឋ និងឯកជនជាច្រើនទៀត។
លោកស្រ៊ុន សារក្សនាយកប្រតិបត្តិបានមានប្រសាសន៍ថា និស្សិតជំនាន់ទី៦នេះ មានការៀបចំការពារបានល្អដោយបានទទួលជោគជ័យរហូតដល់លើសពី៩៥ភាគរយ ហើយសាកលវិទ្យាល័យ នឹងរៀបចំពិធីប្រគល់សញ្ញាបត្រសម្រាប់និស្សិតថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ក្នុងខែតុលាខាងមុខ ដោយគោរពតាមគោលការណ៍ថា សាកលវិទ្យាល័យនឹងរៀបចំពិធីនេះរៀងរាល់ពីរឆ្នាំម្តង។
បន្ទាប់មកលោកមួន វាសនា បានឡើងមានប្រសាសន៍បិទកម្មវិធីនេះ ដោយមានការបង្ហាញជា Video Clip ពីសកម្មភាពរបស់ក្រុមនីមួយៗ និងមានការប្រកាសលទ្ឋផលរបស់ក្រុមនីមួយៗ នាពេលនោះតែម្តង។ លោកបានបន្តថា សាកលវិទ្យាល័យនឹងមានការលើកទឹកចិត្ត ពិសេសចំពោះនិស្សិត ដែលមានបំណងបន្តការសិក្សាយកកម្រិតថ្នាក់បរិញ្ញាបត្រជាន់ខ្ពស់ ដើម្បី ពង្រីកចំណេះដឹងឱ្យកាន់តែទូលំទូលាយសមស្របតាមទំហំការងារ ដែលនិស្សិតជាច្រើនទទួលបានរូចហើយតាំងតែពីពេលដែលពួកគេនៅសិក្សា។
លើសពីនេះទៀតសាកលវិទ្យាល័យ នឹងផ្តល់ជូនតម្លៃពិសេសចំពោះនិស្សិតថ្នាក់បរិញ្ញាបត្ររង និងបរិញ្ញាបត្រនាឆ្នាំសិក្សា ២០១១-២០១២ នេះក្នុងឱកាសអបអរសាទរក្នុងដំណើរការសាងសង់អគារសិក្សាថ្មីមួយខ្នងកំពស់ពីរជាន់ ដើម្បីបំពេញតម្រូវការនៃកំណើនរបស់និស្សិត ដែលមានបំពាក់ឧបករណ៍ទំនើបៗស្របតាមស្តង់ដាជាតិនិងអន្តរជាតិ ធានាឱ្យនិស្សិតបពា្ចប់ការសិក្សាប្រកបដោយគុណភាព ដើម្បីប្រកួតប្រជែងលើទីផ្សារការងារ។
ក្នុងឱកាសនោះ ដែរលោកបានប្រកាសថា សិស្ស-និស្សិតអាចដាក់ពាក្យ ដើម្បីប្រឡងអាហារូបករណ៍ថ្នាក់ដឹកនាំ ដែលនឹងប្រព្រឹត្តទៅនៅថ្ងៃទី២៨ សីហាខាងមុខនេះ។ ជាទីបញ្ចប់លោកសូមថ្លែងអំណរគុណចំពោះគណៈកម្មការនានា គណៈគ្រប់គ្រង នាយកនិងសហការីទាំងអស់ជួបតែសេចក្តីសុខសាន្ត៕
ចែករំលែកព័តមាននេះ