រាជធានីភ្នំពេញ ៖ សិក្ខាកាមចំនួន២៤នាក់ មកពីតាមបណ្តាខេត្ត-ក្រុង ក្នុងនោះមានស្ត្រី២នាក់ បានឆ្លងផុតវគ្គបណ្តុះបណ្តាលគ្រូបង្ហាត់បាល់ទាត់កម្រិត C របស់សហព័ន្ធបាល់ទាត់អាស៊ី។ វគ្គបណ្តុះបណ្តាលនេះបានធ្វើឡើងចាប់ពីថ្ងៃទី១ និងបញ្ចប់នៅថ្ងៃទី១៣ សីហា នៅមជ្ឈមណ្ឌលបាល់ទាត់ជាតិ ស្ថិតនៅភូមិចែងមែង សង្កាត់កាកាប
រាជធានីភ្នំពេញ ៖ សិក្ខាកាមចំនួន២៤នាក់ មកពីតាមបណ្តាខេត្ត-ក្រុង ក្នុងនោះមានស្ត្រី២នាក់ បានឆ្លងផុតវគ្គបណ្តុះបណ្តាលគ្រូបង្ហាត់បាល់ទាត់កម្រិត C របស់សហព័ន្ធបាល់ទាត់អាស៊ី។ វគ្គបណ្តុះបណ្តាលនេះបានធ្វើឡើងចាប់ពីថ្ងៃទី១ និងបញ្ចប់នៅថ្ងៃទី១៣ សីហា នៅមជ្ឈមណ្ឌលបាល់ទាត់ជាតិ ស្ថិតនៅភូមិចែងមែង សង្កាត់កាកាប ខណ្ឌដង្កោ ដែលបានរៀបចំធ្វើឡើងដោយសហព័ន្ធកីឡាបាត់ទាត់កម្ពុជា ក្រោមកិច្ចសហការពីសហព័ន្ធកីឡាបាល់ទាត់អាស៊ី (AFC) ។
គ្រូឧទ្ទេសក្នុងវគ្គនេះមានលោកប្រាក់ សុវណ្ណារ៉ា និងគ្រូជំនួយមានលោកអៀង សក្តនិដា។ លោកម៉ិល កាដូ អគ្គនាយករងនៃក្រសួងអប់រំ យុវជន និងកីឡា ដែលបានអញ្ជើញចូលរួមជាគណៈអធិបតីនៅក្នុងពិធីបិទវគ្គនាឱកាសនោះបានថ្លែងថា វគ្គបណ្តុះបណ្តាលនេះ ពិតជាមានសារសំខាន់ណាស់ ព្រោះថា អាចធ្វើឱ្យសហព័ន្ធកីឡាបាល់ទាត់កម្ពុជា សម្បូរទៅដោយធនធានមនុស្ស ជាពិសេសក្នុងការបណ្តុះបណ្តាលវិស័យកីឡាបាល់ទាត់។ ជានិច្ចកាលសហព័ន្ធកីឡាបាល់ទាត់កម្ពុជាតែងតែបានធ្វើកិច្ចសហប្រតិបត្តិការជាមួយសហព័ន្ធកីឡាបាល់ទាត់អាស៊ី ក៏ដូចជាសហព័ន្ធបាល់ទាត់អន្តរជាតិ FIFA ផងដែរ។
ក្នុងនាមលោកជាមន្ត្រីក្រសួងអប់រំ យុវជន និងកីឡា តែងតែចូលរួមគាំទ្រជានិច្ចរាល់សកម្មភាពរបស់សហព័ន្ធកីឡាបាល់ទាត់កម្ពុជា ហើយលោកតែងតែសង្ឃឹមថា វិស័យបាល់ទាត់នៅកម្ពុជាមានការរីកចម្រើនយ៉ាងឆាប់រហ័ស ដោយសារតែបានសហការ ពីមន្ត្រីសហព័ន្ធបាល់ទាត់ ក៏ដូចជាស្ថាប័នពាក់ព័ន្ធនានា។ ម្យ៉ាងទៀត ដើម្បីសម្រេចបានតាមវត្ថុបំណងរបស់យើងស្របតាមពាក្យមួយឃ្លាលើកឡើងថា «បាល់ទាត់សម្រាប់ទាំងអស់គ្នា ទាំងអស់គ្នាដើម្បីបាល់ទាត់»។ លោកសង្ឃឹមថា សិក្ខាកាមទាំងអស់ នឹងយកចំណេះដឹងទាំងនេះទៅបង្ហាត់បង្រៀនបន្តដល់អ្នកផ្សេងទៀត ដើម្បីជាប្រយោជន៍នៅក្នុងវិស័យបាល់ទាត់របស់ជាតិយើង ៕
ចែករំលែកព័តមាននេះ