VJ អាណូ លាតត្រដាងខ្សែជីវិតដ៏លំបាកនាពេលកន្លងមក
- ភ្នំពេញ
រាជធានីភ្នំពេញ៖ អតីតតារាសម្តែង និងពិធីការិនីអ្នកនាងសួន ភក្តី ហៅ vj អាណូ កំពុងចង់បានឱកាសចាប់អាជីពសិល្បៈជាថ្មី បន្ទាប់ពីនាងឃ្លាតឆ្ងាយជាច្រើនឆ្នាំ ។ នាងបានរំឭករឿងជីវិតដ៏លំបាកដែលលាក់បាំងភ្នែកមហាជនផងដែរ ។
កាលពីពេល ថ្មីៗកន្លងមក តាមរយៈសំណេរបង្ហោះលើបណ្តាញសង្គម vj អាណូ លើកឡើងថា «ចង់មានចម្លើយជូនទៅដល់បងប្អូនដែលបានសួរថា ហេតុអ្វីមិនចូលធ្វើការ ។ សម្រាប់ ខ្ញុំផ្ទាល់ ខ្ញុំចង់ធ្វើការណាស់បងប្អូន បើមានឱកាស ហើយឱកាសនោះ នឹងផ្តល់ពេលវេលាឱ្យខ្ញុំបាន ធ្វើការផង លក់បាយផង និងមើលកូនផង ហើយសង្ឃឹមថា ឆាប់ៗខាងមុខនេះ ខ្ញុំអាច ធ្វើការជាអ្នកដឹកនាំកម្មវីណាមួយ ឬក៏ជាពិធីការិនីណាមួយដែលសក្ដិសមនឹងអាយុខ្លួនឯង ឱ្យបងប្អូនបានទស្សនាផងចុះ(ខ្ញុំពិតជាចង់ណាស់)» ។
តាមរយៈវីដេអូមួយបង្ហោះលើបណ្តាញសង្គម vj អាណូ អះអាងបន្ថែមថា កន្លងមកអំឡុងពេលកូនរបស់នាងមិនទាន់ឈឺ នាងបានព្យាយាមទាក់ទងគេសុំធ្វើការងារដែរ ប៉ុន្តែនាងតែងតែទទួលបានចម្លើយពីគេ គឺអវិជ្ជមាន ។
«ពេលទៅសុំការងារគេធ្វើ គឺយើងទទួលបានចម្លើយមកថា ខ្ញុំមិនដឹងត្រូវទទួលមកធ្វើអ្វី ហើយណាមួយនាងខ្ញុំក៏មានវ័យក៏កាន់តែជ្រេ ប៉ុន្តែពេលហ្នឹងយើងដឹងថា យើងនៅមានសម្រស់ និងអាចធ្វើការងារនេះបាននៅឡើយ» ។
កន្លងមកចាប់តាំងពីឃ្លាតឆ្ងាយពីសិល្បៈ អាណូ មិនមានបំណងវិលចូលវិញទេ ព្រោះនាងមិនចង់បង្ហាញមុខជាសាធារណៈ ។ នាងចង់មានជីវិតបែបសាមញ្ញប៉ុណ្ណោះ ប៉ុន្តែក្រោយកូនធ្លាក់ខ្លួនឈឺ នាងចាំបាច់ត្រូវប្រឹងប្រែងរកប្រាក់មើលថែកូន ទើបនាងចេញមុខលក់អាហារតាមអនឡាញរហូតមកទល់នាពេលនេះ ។
ខ្សែជីវិតដ៏លំបាករបស់អាណូ គឺមានមនុស្សតិចណាស់ដែលបានដឹង ព្រោះនាងមិនបានបើកបង្ហាញរឿងនេះតាមបណ្តាញសង្គមឡើយ ព្រោះតែខ្លាចពាក្យគេថា នាងបំពុលសង្គម ។
ចាប់ពីពេលនោះមកនាងបានរៀបចំថតជា Review មុខម្ហូននានាដើម្បីលក់ ហើយអ្នកគាំទ្រជាច្រើនបង្ហាញការគាំទ្រ និងលើកទឹកចិត្ត ពិសេសនោះនៅមានគេស្គាល់ថានាងគឺជា vj អាណូ ដដែល ។
Vj អាណូ បញ្ជាក់ថា ការវិលចូលសិល្បៈវិញនេះ គឺនាងមិនមានបំណងប្រកួតប្រជែងជាមួយអ្នកណាទេ ព្រោះពេលនេះនាងមានវ័យច្រើនហើយ ។ នាងទទួលតែកម្មវិធីណាដែលសក្ដិសមសមត្ថភាពរបស់នាងប៉ុណ្ណោះ ។
ដោយសារចិត្តចង់ចូលសិល្បៈវិញ អាណូបានទាក់ទងទៅតារាសម្តែងឌី សូនីតា ហើយមានឱកាសបានថតសម្អាងការរបស់ឌី សូនីតា តែម្តង ។ នាងថា «គាត់(ឌី សូនីតា) ពិតជាចិត្តបាន គ្រាន់តែដឹងយើង គឺគាត់ទទួលយើង និងថ្នមយើងណាស់ ហើយក៏ផ្តល់ឱកាសឱ្យយើងថត និងសូម្បីតែនាងខ្ញុំដេកឈឺ ក៏គាត់បានជួយយើងដែរ» ។
ក្រោយពេលថតសម្អាងឌី សូនីតា មក មានក្រុមហ៊ុនផ្សេងទៀតហៅថតជាបន្តបន្ទាប់ ប៉ុន្តែនាងនៅមិនទាន់ទទួលការងារនេះនៅឡើយទេ ដោយសារនាងនៅជាប់មើលកូនឈឺ ។
អាណូ រំពឹងថា នាពេលខាងមុខនាងនឹងអាចទទួលការងារសិល្បៈជាបន្តឡើងវិញ ដើម្បីមានលទ្ធភាពដោះស្រាយជីវភាព និងមើលថែកូន និងបានប្រូម៉ូដហាងម្ហូបអាហារផ្ទាល់ខ្លួនរបស់នាងសព្វថ្ងៃនេះផងដែរ ៕
ចែករំលែកព័តមាននេះ