រាជធានីភ្នំពេញ ៖ ក្លឹបបាល់ទាត់ភ្នំពេញក្រោនបានក្លាយជាក្រុមដែលនាំមុខគេក្នុងតារាងយ៉ាងរឹងមាំ បន្ទាប់ពីយកឈ្នះគិរីវង់សុខសែនជ័យ ២-០ សម្រាប់ការប្រកួតកាលពីរសៀលថ្ងៃសៅរ៍ ទី១៣ សីហា ខណៈពេលដែលក្រសួងការពារជាតិលត់អគ្គស្នងការដ្ឋាននគរបាលជាតិឱ្យចាញ់ ៥-១ ។ កីឡាករស៊ុន សុវណ្ណារិទ្ធី ពាក់អាវលេខ១៤
រាជធានីភ្នំពេញ ៖ ក្លឹបបាល់ទាត់ភ្នំពេញក្រោនបានក្លាយជាក្រុមដែលនាំមុខគេក្នុងតារាងយ៉ាងរឹងមាំ បន្ទាប់ពីយកឈ្នះគិរីវង់សុខសែនជ័យ ២-០ សម្រាប់ការប្រកួតកាលពីរសៀលថ្ងៃសៅរ៍ ទី១៣ សីហា ខណៈពេលដែលក្រសួងការពារជាតិលត់អគ្គស្នងការដ្ឋាននគរបាលជាតិឱ្យចាញ់ ៥-១ ។
កីឡាករស៊ុន សុវណ្ណារិទ្ធី ពាក់អាវលេខ១៤ ខ្សែប្រយុទ្ធរបស់ភ្នំពេញក្រោនជាអ្នកនាំសំណាងឱ្យក្រុមរបស់គេបាន១គ្រាប់មុន គ្រាន់តែចាប់ផ្តើមលេងបាន៥នាទីប៉ុណ្ណោះ ។ បន្ទាប់មកកីឡាករ សញ្ជាតិនីហ្សេរីយ៉ា NJOKU KING SLEY EETU ពាក់អាវលេខ២០ រកបាន១គ្រាប់បន្ថែមទៀតនៅនាទី១៩ ។ ចូលដល់តង់ទី២ គិរីវង់ សុខសែនជ័យព្យាយាមលេងវាយបកសងវិញយ៉ាងខ្លាំងក្លាបំផុត ប៉ុន្តែទីបំផុតនៅតែមិនអាចរកបានគ្រាប់បាល់សងវិញឡើយ ។ ភ្នំពេញក្រោនលេងបាន១៤ប្រកួតឈ្នះ១១ ស្មើ ២ ចាញ់១ មាន៣៥ពិន្ទុ ។ រីឯគិរីវង់សុខសែនជ័យលេងបាន១៤ប្រកួតដូចគ្នាមានែ២៣ពិន្ទុ ។
ក្រសួងការពារជាតិឈរនៅលេខរៀងទី៣ក្នុងតារាងជាមួយការរកបាន២៨ពិន្ទុ ។ ជ័យ ជម្នះរបស់ក្រសួងការពារជាតិលើអគ្គស្នងការដ្ឋាននគរបាលជាតិលើកនេះកាន់តែធ្វើឱ្យក្រុមរបស់គេមានលំនឹងស្ថិតស្ថិរនៅលេខរៀងទី៣ ក្នុងតារាង ។ ប្រកួតបាន១៧នាទីដំបូងកីឡាករឈិន ឈឿន ពាក់អាវលេខ១៧របស់ក្រសួងការពារជាតិនាំសំណាងឱ្យក្រុមរបស់គេបាន១គ្រាប់មុន ។ ចំណែកប្លុង ចន្ធូ ពាក់អាវលេខ១០បន្ថែមបាន១គ្រាប់ទៀតនៅនាទីទី១៩ ។ ភួង សុខសាណា ពាក់អាវលេខ២១ រកបាន១គ្រាប់ទៀតនៅនាទីទី២៨ ។ ចំណែកអគ្គស្នងការដ្ឋាននគរបាលជាតិតាម សងបាន១គ្រាប់វិញ នៅនាទីទី៤៣ ដោយកីឡាករម៉ាន រីតាវ៉ាន់ ពាក់អាវលេខ១៥ ។
ចូលដល់តង់ទី២ ក្រសួងការពារជាតិបន្ថែមបាន២គ្រាប់ទៀត ដោយប្លុង ចន្ធូ រកបាន១គ្រាប់ទៅនាទីទី៥០ និងឈិន ឈឿន រកបានគ្រាប់បន្ថែមទៀត នៅនាទីទី៧០ ។
អគ្គស្នងការដ្ឋាននគរបាលជាតិ ទើបតែមាន២០ពិន្ទុប៉ុណ្ណោះ ស្ថិតនៅលេខរៀងទី៧ក្នុងតារាង ៕
ចែករំលែកព័តមាននេះ