រាជធានីភ្នំពេញ ៖ ម៉ន សាម៉េត មកពីក្លឹបព្រែកឯងកីឡាគេចមិនផុតពីហាលខោឡើយ បន្ទាប់ពីបានប្រកួតចាញ់ពិន្ទុ ឯម លីថូ មកពីក្លឹបគ្រុឌមានជ័យដោយពិន្ទុ កាលពីថ្ងៃសុក្រ ទី១២ សីហា ដែលជាការប្រកួតដណ្តើមខ្សែក្រវាត់ខារ៉ាបាវទម្ងន់៥៤គីឡូក្រាមនៅលើសង្វៀន CTN។ សម្រាប់ពូលBសាម៉េតបានចាញ់២លើករួចមកហើយ
រាជធានីភ្នំពេញ ៖ ម៉ន សាម៉េត មកពីក្លឹបព្រែកឯងកីឡាគេចមិនផុតពីហាលខោឡើយ បន្ទាប់ពីបានប្រកួតចាញ់ពិន្ទុ ឯម លីថូ មកពីក្លឹបគ្រុឌមានជ័យដោយពិន្ទុ កាលពីថ្ងៃសុក្រ ទី១២ សីហា ដែលជាការប្រកួតដណ្តើមខ្សែក្រវាត់ខារ៉ាបាវទម្ងន់៥៤គីឡូក្រាមនៅលើសង្វៀន CTN។
សម្រាប់ពូលBសាម៉េតបានចាញ់២លើករួចមកហើយ ដូច្នេះគេទើបតែរកបាន២ពិន្ទុប៉ុណ្ណោះ។ ចំណែកឯម លីថូ ឈ្នះ២ប្រកួតជាប់គ្នាមាន៦ពិន្ទុនៅក្នុងដៃរួចទៅហើយ។
ពុទ្ធ សំអូន មកពីក្លឹបពុទ្ធសេរីវង្សព្រែកតាទែនទំនងគេចមិនផុតពីហាលខោដែរ ខណៈពេលដែលប្រកួតចាញ់ពិន្ទុលាប សំណាង មកពីក្លឹបកងពលតូចលេខ៧០ដោយពិន្ទុលើកនេះទៀត។ ពុទ្ធ សំអូន ប្រកួតបាន៣លើកអត់ដែលឈ្នះ មាន៣ពិន្ទុ រីឯលាប សំណាង ប្រកួតបាន២លើកអត់ដែលចាញ់មាន៦ពិន្ទុ ដូច្នេះគេសង្ឃឹមច្រើនក្នុងការឡើងផុតពីវគ្គជម្រុះនេះ។
គូប្រកួតមិត្តភាពឆាំ រ៉ែម មកពីក្លឹបសិង្ហកីឡាប្រកួតឈ្នះម៉ៅ រិទ្ធី មកពីក្លឹបកងរាជអាវុធហត្ថរាជធានីភ្នំពេញដោយពិន្ទុ។ ម៉ាត់ ឆ្វេង មកពីក្លឹបក្រសួងកសិកម្មយកឈ្នះហ៊ុន ឈុនហេង មកពីក្លឹបសម្រែករាជសីហ៍បង្ក្រាបគ្រឿងញៀនដោយពិន្ទុ។
ឈិត ង៉ុយ មកពីក្លឹបកីឡាប្រដាល់ក្រសួងកសិកម្មយកឈ្នះរស់ ស៊ីណាត មកពីក្លឹបនិរោធមានជ័យបានដោយពិន្ទុប្រកួតនៅលើសង្វៀនប៉ុស្តិ៍បាយ័នកាលពីរសៀលថ្ងៃសៅរ៍ ទី១៣សីហា។ ឈិត ង៉ុយ ពូកែស្នៀតកណ្តាប់ដៃ និងកែងបានបើកការវាយសំរុកទៅលើរស់ ស៊ីណាតតាំងពីទឹកទី២ម្ល៉េះ។ ចំណែកស៊ីណាតក៏មិនអន់ប៉ុន្មានដែរ ប៉ុន្តែចិត្តគេអន់បន្តិច ហើយចាញ់ប្រៀបឈិត ង៉ុយ ត្រង់មិនហ៊ានចូលកៀក។ ទឹកទី៤ និងទី៥ឈិត ង៉ុយ ធ្វើឱ្យស៊ីណាត ដកថយអែបខ្សែរេញរហូត តែទោះជាយ៉ាងណាក្តីស៊ីណាតធ្វើឱ្យឈិត ង៉ុយ ឈ្នះទាំងវេទនាបន្តិច។
ឌុន រដ្ឋា មកពីក្លឹបអេភូថងអត់សមត្ថភាពត្រូវអាជ្ញាកណ្តាលបញ្ឈប់ការប្រកួតនៅត្រឹមទឹកទី៤សម្រាប់ការមកប៉ះសូយ វីរៈ មកពីក្លឹបអូដឹមកីឡាលើកនេះ។ ផល ប៊ុនម៉ៅ មកពីក្លឹបបូរីរាជសីហ៍មានរឹទ្ធិ យកឈ្នះសូយ សុផាត មកពីក្លឹបអូដឹមកីឡាដោយពិន្ទុ។ ឃឹម បូរ៉ា មកពីក្លឹបរស្មីភូមិគាប ខេត្តបន្ទាយមានជ័យវាយផ្តួលឃុន រ៉ាត់ មកពីក្លឹបពហុចំរើនវិទ្យាឱ្យសន្លប់ធំក្នុងទឹកទី៣។
ឡុង សុវណ្ណឌឿន មកពីក្លឹបសាលវ័ន្តកីឡាធ្វើឱ្យអូត ភូថង អ្នកប្រដាល់ចាស់វស្សានៃក្លឹបកីឡាប្រដាល់ក្រសួងការពារជាតិចាញ់ការប្រកួតដោយពិន្ទុទាំងមិនអស់ចិត្តសម្រាប់ការប្រកួតនៅលើសង្វៀនប៉ុស្តិ៍លេខ៣កាលពីរសៀលថ្ងៃសៅរ៍ ទី១៣ សីហា ខណៈពេលដែលឃឹម ឌីម៉ា មកពីក្លឹបរស្មីភូមិគាប ខេត្តបន្ទាយមានជ័យ សងសឹកសំរិទ្ធ សុភាព មកពីក្លឹបក្រសួងកសិកម្មមិនបានសម្រេចគឺបានត្រឹមតែស្មើពិន្ទុប៉ុណ្ណោះ។
កណ្តាប់ដៃសុវណ្ណឌឿន ម៉ាត់ចូលមុខអូតភូថង ពេញៗតាំងពីទឹកទី១ម្ល៉េះ ហើយនៅក្នុងទឹកទី២សុវណ្ណឌឿន បានវាយសន្ធាប់រហូតធ្វើឱ្យអូត ភូថង ដួលទាំងជំហរ ហើយត្រូវអាជ្ញាកណ្តាលរាប់៨ម្តង។ ប៉ុន្តែអូត ភូថង ត្រូវកាន់តែខ្លាំង កាន់តែដើរចូល ហើយម៉ាត់ និងទាត់សងវិញទាំងពុះកញ្ជ្រោលដោយមិនចង់បរាជ័យក្រោមស្នាដៃអ្នកលេងស្រករក្រោយ ម្នាក់នេះឡើយ។ ប៉ុន្តែការដើរចូលទាំងងងើលរបស់អូត ភូថង មិនខុសពីផ្ទាំងសីុបរបស់សុវណ្ណឌឿនឡើយ។
សុវណ្ណឌឿន អន់ទឹកទី៤បន្តិច តែនៅទឹកទី៥បានបើកយុទ្ធនាការវាយសំរុកសាជាថ្មីទៅលើអូត ភូថង រហូតទាល់តែអាចយកឈ្នះពិន្ទុទាំងលំបាកបន្តិច។ ឃឹម ឌីម៉ា ដែលធ្លាប់ចាញ់សុភាពម្តងរួចមកហើយនោះគេសង្ឃឹមថា នឹងអាចសងសឹកបានសម្រេច តែទីបំផុតបានត្រឹមតែស្មើពិន្ទុប៉ុណ្ណោះ។ គូនេះមានល្បិចប្រយុទ្ធពេញខ្លួនដូចគ្នា គឺមិនអាចធ្វេសប្រហែសបានឡើយ។ ចាប់តាំងពីទឹកទី១ដល់ទឹកទី៥ទាំងសងខាងគឺមានការប្រយ័ត្នប្រយែងណាស់។ ចំណែកឌីម៉ា ដែលពូកែស្នៀតកែង និងជង្គង់នោះមិនហ៊ានចូលកៀកឡើយ ទីបំផុតគេបានត្រឹមតែទទួលលទ្ធផលស្មើពិន្ទុជាមួយសុភាពប៉ុណ្ណោះ។
ឃឹម ពេជ្រចិន្តា មកពីក្លឹបបូរីនាគរាជយកឈ្នះពិន្ទុជឹម តារ៉ា មកពីក្លឹបសិង្ហកីឡា។ ចាន់ រតនៈ មកពីក្លឹបកងពលធំអន្តរាគមន៍លេខ៣ព្រះវិហារឈ្នះពិន្ទុសល់ប៊ុន អ៊ឹម មកពីក្លឹបអាស៊ីកីឡា។ ស៊ិន សល់ មកពីក្លឹបកីឡាប្រដាល់ក្រសួងមហាផ្ទៃត្រូវហាលខោនៅត្រឹមជុំទី១សម្រាប់ការប្រកួតដណ្តើមខ្សែក្រវាត់សាកលអាជីពទម្ងន់៦៥គីឡូក្រាម បន្ទាប់ពីចាញ់យឹម ឌៀប មកពីក្លឹបកីឡាប្រដាល់ក្រសួងការពារជាតិនៅត្រឹមទឹកទី៣ ៕
ចែករំលែកព័តមាននេះ