រាជធានីភ្នំពេញ ៖ នៅថ្ងៃទី១៤ សីហា ឆ្នាំ២០១១ ក្រុមហ៊ុនតូយ៉ូតា (ខេមបូឌា)បានធ្វើការបង្ហាញរថយន្តថ្មីតូយ៉ូតា HILUX VIGO ម៉ូដែលឆ្នាំ២០១២ ជូនអតិថិជនរបស់ខ្លួនដើម្បីទស្សនា។ ឆ្លៀតក្នុងឱកាសដ៏ឧត្តុងឧត្តមនេះ ក្រុមហ៊ុនក៏បានថ្លែងអំណរគុណយ៉ាងជ្រាលជ្រៅចំពោះអតិថិជនក្នុងការរង់ចាំការមកដល់រថយន្តថ្មីនេះ។ ការរញ្ជួយដី និងរលកយក្សនៅខែមីនាឆ្នាំ២០១១ កន្លងទៅនេះ បានបំផ្លិចបំផ្លាញហេដ្ឋារចនាសម្ព័ន្ធ និងសេដ្ឋកិច្ចប្រទេសជប៉ុនយ៉ាងធ្ងន់ធ្ងរ។ ក្រុមហ៊ុនតូយ៉ូតាទូទាំងពិភពលោកទាំងមូលរួមទាំងក្រុមហ៊ុនតូយ៉ូតា (ខេមបូឌា) ក៏បានទទួលរងនូវឥទ្ធិពលនេះផងដែរ។ ហេតុដូច្នេះហើយបានជាក្រុមហ៊ុនតូយ៉ូតា (ខេមបូឌា)ឈប់ទទួលការបញ្ជាទិញ ឬកក់រថយន្តពីសំណាក់អតិថិជនរបស់ខ្លួនជាច្រើននាក់ ចាប់តាំងពីខែមេសា ឆ្នាំ២០១១មកម៉្លេះ។ ប៉ុន្តែចាប់ពីថ្ងៃនេះតទៅក្រុមហ៊ុនចាប់ទទួលការបញ្ជាទិញ ឬលក់រថយន្តតូយ៉ូតា HILUX VIGO ម៉ូដែលឆ្នាំ២០១២ឡើងវិញហើយ។
រថយន្តតូយ៉ូតា HILUX ម៉ូដែលឆ្នាំ២០១២នេះ ជាជំនាន់ទី៧ដែលមានរយៈពេលចំនួន៧ឆ្នាំមកហើយក្នុងប្រវតិ្តនៃការផលិតរយន្តតូយ៉ូតា HILUX។ ពីមួយឆ្នាំទៅមួយឆ្នាំ រថយន្តតូយ៉ូតា HILUX មានការកែប្រែយ៉ាងច្រើន ដែលឆ្លុះបញ្ចាំងឱ្យឃើញពីការចូលរួម និងគាំទ្រយ៉ាងស្មោះសរពីអតិថិជន។ រថយន្តតូយ៉ូតា HILUX ជំនាន់ទី៧ ត្រូវបាននាំចូល និងលក់ក្នុងទីផ្សារកម្ពុជាជាលើកដំបូងនៅឆ្នាំ២០០៥ ហើយបានក្លាយជារថយន្តឈានមុខគេបំផុត ទទួលបាននូវការពេញនិយមពីអតិថិជនគ្រប់មជ្ឈដ្ឋាន។ លើសឆ្នាំណាៗទាំងអស់ រថយន្តតូយ៉ូតា HILUX VIGO ម៉ូដែលឆ្នាំ២០១២ នេះ គឺមានការផ្លាស់ប្តូរច្រើនចំណុចនិងមានការទាក់ទាញយ៉ាងខ្លាំង។
ទោះបីជាទីផ្សារបច្ចុប្បន្នកំពុងផ្លាស់ប្តូរ ហើយការប្រកួតប្រជែងកាន់តែកើនឡើងពីមួយឆ្នាំទៅមួយឆ្នាំក៏ដោយ រថយន្ត HILUX VIGO ធានាអះអាងថា ជារថយន្តឈានមុខគេជានិច្ច ទាំងក្នុងទីផ្សារកម្ពុជា តំបន់និងក្នុងពិភពលោក៕
ចែករំលែកព័តមាននេះ