ហ្វូងដំរីព្រៃ៦ក្បាល វាយលុកបំផ្លា.ញរោងអ្នកនេសាទ និងបណ្ដាលឱ្យកុមារម្នាក់ស្លា.ប់ និងម្តាយរងរបួសធ្ងន់នៅខេត្តព្រះវិហារ
- ព្រះវិហារ
ខេត្តព្រះវិហារ ៖ គ្រោះថ្នាក់ដ៏រន្ធត់មួយបានកើតឡើងចំពោះពលរដ្ឋស៊ីឈ្នួលរកត្រី ដោយសារហ្វូងដំរីព្រៃចំនួន៥ ទៅ៦ក្បាល បានចូលមកវាយកម្ទេចរោងកៅស៊ូ និងដេញជាន់អ្នកភូមិ បណ្ដាលឱ្យកុមារាអាយុ១១ឆ្នាំម្នាក់ស្លាប់បាត់បង់ជីវិត និងម្ដាយរងរបួសធ្ងន់ ខណៈពួកគេកំពុងសម្រាកក្រោយពេលដាក់លបត្រីនៅតាមដងស្ទឹងក្នុងស្រុកជាំក្សាន្ត ។
យោងតាមរបាយការណ៍របស់រដ្ឋបាលស្រុកជាំក្សាន្តបានបញ្ជាក់ថា ហេតុការណ៍នេះបានកើតឡើងនៅវេលាម៉ោង២០ និង១០នាទីថ្ងៃទី១៣ តុលា ២០២៦ នៅចំណុចកញ្ចាំង ស្ថិតក្នុងភូមិសាស្ត្រឃុំយាង ស្រុកជាំក្សាន្ត ខេត្តព្រះវិហារ ។
តាមប្រភពព័ត៌មានពីជនរងគ្រោះថា មុនពេលកើតហេតុ ក្រុមប្រជាពលរដ្ឋចំនួន៥នាក់(រួមមាន ប្ដី ប្រពន្ធ កូន និងអ្នករួមដំណើរ) បានឡើងទៅបោះបង្គោល ប្រក់តង់កៅស៊ូ និងដាក់លប/ដាក់ពងរកត្រីនៅតាមដងស្ទឹង ។ លុះដល់ពេលយប់ជ្រៅ ខណៈដែលពួកគាត់កំពុងដេកលក់ ស្រាប់តែមានហ្វូងសត្វដំរីព្រៃចំនួន៥ ទៅ៦ក្បាល ចូលមកវាយដំបូលតង់កៅស៊ូ និងកម្ទេចរោងយ៉ាងកម្រោល ។
លោក ចិន ខន្តី អភិបាលស្រុកជាំក្សាន្ត ឱ្យដឹងថា ជនរងគ្រោះទី១-ឈ្មោះ មុំ សុខហេង ភេទប្រុស អាយុ១១ឆ្នាំ ត្រូវជាកូន និងជាសិស្ស មានទីលំនៅភូមិដំណាក់កន្ទួត ឃុំថ្មី ស្រុកគូលែន ខេត្តព្រះវិហារ បានស្លាប់បាត់បង់ជីវិតតាមផ្លូវ ខណៈកំពុងដឹកយកមកសង្គ្រោះ។ ជនរងគ្រោះទី២-ឈ្មោះ ធិន ជិត ភេទស្រី អាយុ៤៩ឆ្នាំ ត្រូវជាម្ដាយ បានរងរបួសធ្ងន់ និងត្រូវបានបញ្ជូនទៅសង្គ្រោះបន្ទាន់នៅមណ្ឌលសុខភាពតាកឹង មុននឹងបញ្ជូនបន្តទៅកាន់មន្ទីរពេទ្យខេត្តព្រះវិហារ (មន្ទីរពេទ្យ ១៦ មករា) ។ ចំណែកសមាជិកគ្រួសារ និងអ្នករួមដំណើរផ្សេងទៀត រួមមានស្វាមី និងកូនម្នាក់ទៀត គឺពុំបានរងរបួស ឬមានបញ្ហាអ្វីនោះឡើយ ដោយបានរត់គេចខ្លួនរួចពីគ្រោះថ្នាក់ ។
លោក មុត មូល អាយុ៤០ឆ្នាំ ជាអ្នករួមដំណើរ និងដេកនៅកន្លែងកើតហេតុ បានរៀបរាប់ឱ្យដឹងថា ពេលពួកយើងកំពុងដេកលក់ ស្រាប់តែឮសំឡេងដំរីមកវាយដំបូលតង់ប្រាវៗ រួចក៏ឮសំឡេងមីងជិតស្រែកឱ្យជួយ ។ ពេលខ្ញុំងើបមក ក៏ឃើញមីងជិតនិងកូនរងរបួសធ្ងន់ទៅហើយ ចំណែកខ្ញុំ និងអ្នកផ្សេងទៀតរត់រួចខ្លួនទាន់ ។
សូមបញ្ជាក់បន្ថែមថា ហ្វូងដំរីព្រៃចំនួន៦ក្បាលនេះ បានចូលមកលុកលុយ និងរកស៊ីនៅក្នុងភូមិសាស្ត្រមូលដ្ឋានស្រុកត្បែងមានជ័យ ចាប់តាំងពីពាក់កណ្តាលខែសីហា ឆ្នាំ២០២៦ មកម្ល៉េះ ក្រៅពីបង្កគ្រោះថ្នាក់ដល់អាយុជីវិតមនុស្ស ពួកវាក៏បានចូលមកបំផ្លាញ និងស៊ីដំណាំរបស់ពលរដ្ឋយ៉ាងដំណំ រួមមាន ស្រូវ ពោត និងដូងជាដើម ហើយបច្ចុប្បន្នហ្វូងដំរីព្រៃទាំងនោះបានដើរឆ្លងទៅដល់ស្រុកជាំក្សាន្ត កំពុងបង្កហានិភ័យសុវត្ថិភាពចំពោះប្រជាពលរដ្ឋ។
ពាក់ព័ន្ធនឹងបញ្ហានេះ អាជ្ញាធរក៏បានលើកឡើងថា មូលហេតុចម្បងដែលធ្វើឱ្យសត្វដំរីព្រៃចេញមកយាយី និងប៉ះពាល់ដល់សុវត្ថិភាពប្រជាពលរដ្ឋ គឺបណ្តាលមកពីការគំរាមកំហែងដល់ជម្រកធម្មជាតិរបស់ពួកវា តាមរយៈសកម្មភាពមនុស្ស ដូចជា ការទន្ទ្រានដីព្រៃ ការរុករករ៉ែ និងការកាប់ឈើខុសច្បាប់ ដែលបានបំផ្លាញទីជម្រក ព្រមទាំងប្រភពទឹក និងចំណីអាហាររបស់ពួកវា។
ដើម្បីការពារកុំឱ្យមានគ្រោះមហន្តរាយជាយថាហេតុបន្ថែមទៀត អាជ្ញាធរមានសមត្ថកិច្ច និងរដ្ឋបាលមូលដ្ឋាន បានអំពាវនាវដល់ប្រជាពលរដ្ឋទាំងអស់ ពិសេស អ្នកដែលតែងតែចេញចូលព្រៃ ឬប្រកបរបរនេសាទតាមដងស្ទឹង ឱ្យបង្កើនការប្រុងប្រយ័ត្នខ្ពស់បំផុត និងជៀសវាងការស្នាក់នៅពេលយប់ក្នុងតំបន់ស៊ាំញ៉ាំ ឬតំបន់ដែលធ្លាប់មានវត្តមានហ្វូងដំរីព្រៃនេះ ៕
ចែករំលែកព័តមាននេះ