រាជធានីភ្នំពេញ ៖ នៅលើសង្វៀនស្ថានីយទូរទស្សន៍ CTN នាថ្ងៃសៅរ៍-អាទិត្យទី១៣-១៤ សីហា មានកំពូលអ្នកប្រដាល់ជើងខ្លាំងជាច្រើននាក់ឡើងមកសាកកម្លាំងគ្នា ក្នុងនោះមានខ្លះរហូតដល់សងសឹកគ្នាទៀតផង ។ នាថ្ងៃសៅរ៍ទី១៣សីហា វ៉ន វីវ៉ា ជើងឯកគុនខ្មែរលំដាប់ថ្នាក់ពិភពលោក ចង់សងសឹកជាមួយហ៊ិន សៃហេង មកពីក្លឹបកីឡាប្រដាល់ក្រសួងមហាផ្ទៃម្តងទៀត ជាលក្ខណៈសាកលអាជីព
រាជធានីភ្នំពេញ ៖ នៅលើសង្វៀនស្ថានីយទូរទស្សន៍ CTN នាថ្ងៃសៅរ៍-អាទិត្យទី១៣-១៤ សីហា មានកំពូលអ្នកប្រដាល់ជើងខ្លាំងជាច្រើននាក់ឡើងមកសាកកម្លាំងគ្នា ក្នុងនោះមានខ្លះរហូតដល់សងសឹកគ្នាទៀតផង ។
នាថ្ងៃសៅរ៍ទី១៣សីហា វ៉ន វីវ៉ា ជើងឯកគុនខ្មែរលំដាប់ថ្នាក់ពិភពលោក ចង់សងសឹកជាមួយហ៊ិន សៃហេង មកពីក្លឹបកីឡាប្រដាល់ក្រសួងមហាផ្ទៃម្តងទៀត ជាលក្ខណៈសាកលអាជីព ។ សម្រាប់ការជួបគ្នាលើកមុន គេទាំង២នាក់ប្រកួតគ្នាក្នុងលក្ខណៈប្រដាល់សាកលស្ម័គ្រចិត្ត នៅក្នុងឱកាសនៃការប្រកួតជ្រើសរើសជើងឯកទូទាំងប្រទេស ប្រចាំឆ្នាំ២០១១ ដែលរៀបចំធ្វើឡើងដោយក្រសួងអប់រំយុវជននិងកីឡា ។ ក្នុងការប្រកួតនោះ វ៉ន វីវ៉ា ធ្លាក់មកនៅលេខ២ ដោយប្រកួតចាញ់ពិន្ទុហ៊ិន សៃហេង ។
គួររំលឹកថា ហ៊ិន សៃហេង ក៏ជាម្ចាស់មេដាយសំរឹទ្ធិនៅស៊ីហ្គេមកាលពីប៉ុន្មានឆ្នាំមុនដែរ ហើយសម្រាប់នៅកម្ពុជា អ្នកប្រដាល់ទម្ងន់ធ្ងន់រហូតដល់៧៥គីឡូក្រាមអត់ដែលមានអ្នកណាប្រកួតឈ្នះគេឡើយ ។ ដូច្នេះវ៉ន វីវ៉ា ដែលបរាជ័យលើកមុនក៏មិនសូវជាបាក់មុខប៉ុន្មានដែរ ព្រោះថាគេខ្លាំងតែផ្នែកវាយសេរី លុះដល់ពេលប្តូរមកវាយសាកលអាចពិបាកបន្តិចហើយ ។ ចំណែកឯការជួបគ្នាលើកនេះ ក៏មិនសង្ឃឹមថាអាចសងសឹកបានសម្រេចនោះដែរ ។
វ៉ោយ សុធន់ មកពីក្លឹបរាជសីហ៍ខេត្តបន្ទាយមានជ័យ ចង់សាកកម្លាំងជាមួយព្រំ សំណាង មកពីក្លឹបកងទ័ពឆត្រយោង៩១១។ គូនេះមានប្រវត្តិខុសគ្នាបន្តិច ដោយសុធន់ចាស់វស្សាជាងសំណាង ប៉ុន្តែសម្រាប់ការជួបគ្នាលើកនេះសុធន់មិនទាន់ប្រាកដក្នុងចិត្តថាអាចយកឈ្នះលើអ្នកប្រដាល់ជំនាន់ក្រោយនេះបានឬក៏អត់នោះទេ ។ សុធន់ ពីមុនល្បីថាជាកំពូលអ្នកប្រើស្នៀតកែងនិងជង្គង់ អ្នកដែលបានប៉ះជាមួយគេភាគតិចណាស់ដែលអាចគេចផុតពីមានរបួសនោះ ។ ប៉ុន្តែពេលនេះអាយុរបស់គេច្រើនបន្តិចហើយកម្លាំងក៏អន់ទៀត មិនអាចក្អេងក្អាងដូចមុនទៀតទេ ។ ព្រំ សំណាង ជើងថ្មីមែនតែល្បិចប្រយុទ្ធរបស់គេក្រាស់ពេញខ្លួន កម្លាំងក៏ខ្លាំងទៀត អាចតស៊ូប្រកួតរយៈពេល៥ទឹកពេញដោយមិនលំបាកឡើយ ។
កីឡាករឈាន ហុង មកពីក្លឹបអាជ្ញាធរជាតិអាវុធគីមី ជួបទេស សំខាន់ មកពីក្លឹបកងពលតូចលេខ៧០ ។ ជ័យ ពិសី មកពីក្លឹបឃ្លាំងមឿងកីឡា ជួបធី តុងហ៊ី មកពីក្លឹបសាលវ័ន្តកីឡា។
រីឯនៅថ្ងៃអាទិត្យ ទី១៤សីហា ម៉ន គឹមឡុង ម្ចាស់ជើងឯកគុនខ្មែរវគ្គ២ មកពីក្លឹបព្រែកឯងកីឡា ចង់សងសឹកជាមួយភេឌី ម៉ឺនសុភា មកពីក្លឹបយុវជនអង្គរម្តងទៀត ។ គូនេះធ្លាប់ជួបគ្នាម្តងកាលពីជាង១ខែមុន ដែលកាលណោះ សុភាធ្វើឱ្យគឹមឡុងចាញ់បាក់មុខដោយពិន្ទុម្តងរួចមកហើយ ហើយសូម្បីតែអ្នកទស្សនាភាគច្រើនក៏គេមិនជឿថា សុភាអាចបំបាក់គឹមឡុងបានដូច្នេះដែរ។ តាមពិត ប្រវត្តិរបស់ម៉ឺនសុភា ទើបតែឈានជើងឡើងសង្វៀនបាន១០ដងគត់ ប៉ុន្តែមិនដែលចាញ់់ម្តងណាឡើយ ហើយមានពេលខ្លះធ្លាប់ធ្វើឱ្យគូប្រកួតសន្លប់ជាច្រើនលើកទៀតផង ។ ចំណែកគឹមឡុងធ្លាប់ប្រកួតមិនតិចជាង៣០ដង ឡើយ ហើយធ្លាប់ទាំងបានធ្វើជាម្ចាស់ជើងឯកគុនខ្មែរទៀតផង ។ លើកនេះ គេតាមមកសងសឹកម្តងទៀត ដូច្នេះចាំមើលមើល៍ តើអាចទៅរួចឬអត់ ?
រឿម វណ្ណៈ មកពីក្លឹបកីឡាប្រដាល់ក្រសួងការពារជាតិ ជួបសុខ ចិន្តា មកពីក្លឹបឃ្លាំងមឿងកីឡា ។ អាំង សំអាត មកពីក្លឹបតាព្រហ្មមានជ័យ ជួបសេង កំសត់ មកពីក្លឹបខេមរិន្ទមានឫទ្ធិ ។
ចំណែកនៅលើសង្វៀនស្ថានីយទូរទស្សន៍ប៉ុស្តិ៍លេខ៣ នាថ្ងៃសៅរ៍ទី១៣ សីហា ឃឹម ឌីម៉ា មកពីក្លឹបរស្មីភូមិគាបខេត្តបាត់ដំបង ចង់មកសងសឹកជាមួយសំរិទ្ធ សុភាព មកពីក្លឹបកីឡាប្រដាល់ក្រសួងកសិកម្មម្តងទៀត ។ ឌីម៉ា បើនិយាយពីល្បិចប្រយុទ្ធនៅលើសង្វៀនគឺមិនមានកន្លែងណាមួយអន់ឡើយ ។ ការវាយចេញ ទាំងស្នៀតដៃ ស្នៀតជើងនិងការការពារក៏រឹងមាំល្អណាស់ដែរ ប៉ុន្តែកន្លងមកបែរជាចាញ់សុភាពទាំងមិនអស់ចិត្តទៅវិញ ហេតុដូច្នេះហើយទើបគេចង់មកសងសឹកសាជាថ្មីម្តងទៀត។ ចំណែកឯអ្នកទស្សនាក៏មិនអស់ចិត្តដូចគ្នា ដូច្នេះដើម្បីជម្រះមន្ទិលសង្ស័យមានតែសាកគ្នាម្តងទៀត ។ រីឯអ្នកគាំទ្រសុភាពក៏គេគិតថា សុភាពមិនជាអន់ខ្សោយប៉ុន្មានដែរ ល្បិចប្រយុទ្ធរបស់គេល្អ កម្លាំងខ្លាំង ចិត្តក៏ហ៊ានថែមទៀត។ ការវាយចេញរបស់សុភាពបានរហ័សគ្រាន់បើ ដូច្នេះបើធ្វើការប្រៀបធៀបលើល្បិចនិងកម្លាំងរវាងគេទាំង២មិនលើសមិនខ្វះគ្នាប៉ុន្មានឡើយ ។
អូត ភូថង មកក្លឹបកីឡាប្រដាល់ក្រសួងការពារជាតិ ចង់សាកកម្លាំងជាមួយឡុង សុវណ្ណឌឿន អ្នកប្រដាល់ជើងថ្មី មកពីក្លឹបសាលវ័ន្តកីឡា ។ អូត ភូថង ធ្លាប់ខ្លាំងពីមុនមក មិនងាយរកអ្នកបង្ក្រាបឡើយ ប៉ុន្តែពេលនេះ មិនដូចមុនទៀតទេ ព្រោះវ័យរបស់គេកាន់តែចាស់កម្លាំងខ្សោយ ខ្លាំងបានតែត្រឹមទឹកទី៣ប៉ុណ្ណោះ។ លើកនេះប៉ះសុវណ្ណឌឿន កម្លាំងថ្មី បើទោះជាគេអន់ល្បិចបន្តិចមែន តែបើអាចតស៊ូជាមួយអូត ភូថង ឆ្លងផុត៣ទឹក គឺមានសង្ឃឹមឈ្នះច្រើន ។
ឃឹម ពេជ្រចិន្តា មកពិក្លឹបបុរីនាគរាជ ជួបជឹម តារា មកពីក្លឹបសិង្ហកីឡា ។ សល់ ប៊ុនអ៊ឹម មកពីក្លឹបអាស៊ីកីឡា ជួបចាន់ រតនៈ មកពីក្លឹបសិង្ហកីឡា ។ ស៊ិន សល់ មកពីក្លឹបប្រដាល់ក្រសួងមហាផ្ទៃ ជួបប្រកួតវគ្គជម្រុះវិលជុំសាកលអាជីពជាមួយយឹម ឌៀប មកពីក្លឹបកីឡាប្រដាល់ក្រសួងការពារជាតិ ប្រភេទទម្ងន់៦៥គីឡូក្រាម៕
ចែករំលែកព័តមាននេះ