រាជធានីភ្នំពេញ ៖ សម អួនលួង មកពីក្លឹបបាក់ខែងកីឡា ណាត់ជួបអ៊ុង វីរៈ មកពីក្លឹបកងទ័ពឆត្រយោង៩១១ ប្រកួតគ្នានៅលើសង្វៀនស្ថានីយទូរទស្សន៍បាយ័ន នាថ្ងៃសុក្រ ទី១២ សីហា ខាងមុខនេះ ខណៈពុទ្ធ ហ៊ុយ មកពីក្លឹបពុទ្ធសេរីវង្សព្រែកតាទែន ជួបចៅ វីរៈ មកពីក្លឹបគជសារកីឡា។
សម អួនលួង ធ្លាប់ជាជើងខ្លាំងអង្រួនសង្វៀន CTN ជាច្រើនឆ្នាំមកហើយ លើកនេះគេចង់ភ្លក់រសជាតិនៅលើសង្វៀនប៉ុស្តិ៍បាយ័នម្តង ជាពិសេសការមកប៉ះអ៊ុង វីរៈ ដែលជាកំពូលអ្នកលេងស្នៀតកណ្តាប់ដៃ កម្លាំងខ្លាំង វាយលុកមិនរាថយ ។ សម អួនលួង បើនិយាយពីស្នៀតប្រយុទ្ធនៅលើសង្វៀន គឺគេពូកែស្នៀតជើងជាង ឯកម្លាំងខ្លាំងគួរសម ប៉ុន្តែចិត្តតូចបន្តិច ទោះបីជាយ៉ាងណាក៏គេមិនញញើតនឹងការមកប៉ះ អ៊ុង វីរៈលើកនេះដែរ ព្រោះគេធ្លាប់ស្គាល់ចិត្តគូប្រកួតម្នាក់នេះជាច្រើនឆ្នាំមកហើយ។ ម្យ៉ាងទៀត បើគេអាចទប់ទល់នឹងកម្លាំងវាយចេញរបស់អ៊ុង វីរៈឱ្យបានច្រើនបន្តិចនោះបែបមិនមានអ្វីជាបញ្ហាចោទឡើយ ។ ចំណែកអ៊ុង វីរៈ គេគិតថា គេចាញ់ប្រៀបខាងកម្ពស់សម អួនលួង ដែលអាចធ្វើឱ្យគេជួបការលំបាកក្នុងការវាយលុកបន្តិច តែទោះយ៉ាងណាក៏ត្រូវតែសាកមើលសិនដែរ ។
ពុទ្ធ ហ៊ុយ និងចៅ វីរៈ មិនធ្លាប់ប៉ះគ្នាពីមុនមកឡើយ ប៉ុន្តែសម្រាប់ជើងថ្មី១គូនេះមានល្បិចប្រយុទ្ធប្រហាក់ប្រហែលគ្នាអាចស៊ីសងគ្នាបាន គ្រាន់តែពុទ្ធ ហ៊ុយ មួយរយៈមកនេះយីអ៊ុនរបស់គេមិនសូវល្អប៉ុណ្ណោះ ទោះបីជាយ៉ាងណា សង្ឃឹមថា លើកនេះគេនឹងអាចស្តារកេរ្តិ៍ឈ្មោះមកវិញបានខ្លះ ។ ចំណែកអន សុខហេង មកពីក្លឹបកងពលតូចលេខ៣១ ជួបសុខ ចំរើនស្រ៊ុន មកពីក្លឹបស៊ីម៉ាក់ ។
ដោយឡែកនាថ្ងៃសៅរ៍ ទី១៣ សីហា នៅលើសង្វៀនស្ថានីយទូរទស្សន៍បាយ័ននេះដែរ ឌុន រដ្ឋា មកពីក្លឹបអេភូថងកីឡា ជួបសូយ វីរៈ មកពីក្លឹបអូដឹមកីឡា ។ រវាងគូនេះក៏ជាជើងខ្លាំងមានល្បិចប្រយុទ្ធក្រាស់ពេញខ្លួនដូចគ្នា ប៉ុន្តែ ដោយសារមិនធ្លាប់ជួបគ្នាពីមុនមកនោះ គេនៅមិនទាន់ដឹងមុនថា អ្នកណាខ្លាំងជាងអ្នកណានោះទេ ។ ចំពោះរដ្ឋា អន់កម្លាំងបន្តិច កណ្តាប់ដៃនៃការវាយចេញក៏យឺតយ៉ាវទៀត ម្យ៉ាងការមកប៉ះសូយ វីរៈលើកនេះ គេក៏មិនហ៊ានធានាថា យ៉ាងម៉េចដែរ ។ សូយ វីរៈ បើនិយាយពីផ្លែជង្គង់របស់គេសាហាវគួរសម ស្នៀតជើងទាត់ចេញបានរហ័ស ប៉ុន្តែក៏នៅមានការកោតញញើតរដ្ឋាខ្លះដែរ ។ ឈិត រស្មី មកពីក្លឹបអន្លង់វែងជួបផន ប៊ុន ម៉ៅ មកពីក្លឹបបុរីរាជសីហ៍មានឫទ្ធិ ។ ឈិត ង៉ុយ មកពីក្លឹបក្រសួងកសិកម្ម ជួបរស់ ឌីណា មកពីក្លឹបនិរោធមានជ័យ ៕
ចែករំលែកព័តមាននេះ