ឯកឧត្តមសន្តិបណ្ឌិត ឡូយ សុផាត ដឹកនាំមន្ត្រីរាជការ និងពុទ្ធបរិស័ទខេត្តស្ទឹងត្រែង វេរប្រគេនទៀនព្រះវស្សាដល់១៧វត្ត ដើម្បីទ្រទ្រង់ព្រះពុទ្ធសាសនា
- ស្ទឹងត្រែង
ខេត្តស្ទឹងត្រែង៖ ក្នុងស្មារតីលើកស្ទួយ និងទ្រទ្រង់ព្រះពុទ្ធសាសនាដែលជាសាសនារបស់រដ្ឋ នាព្រឹកថ្ងៃព្រហស្បតិ៍ ៨រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០៦ ខែសីហា ឆ្នាំ២០២៦ ត្រូវជាថ្ងៃសីល ពិធីបុណ្យវេរប្រគេនទៀនព្រះវស្សា និងបរិក្ខារផ្សេងៗ ត្រូវបានប្រារព្ធធ្វើឡើងយ៉ាងអធិកអធម ក្រោមគំនិតផ្ដួចផ្ដើមដ៏ជ្រះថ្លារបស់ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការទី៣ នៃរដ្ឋសភា រួមជាមួយមន្ត្រីរាជការ និងពុទ្ធបរិស័ទជិតឆ្ងាយក្នុងខេត្តស្ទឹងត្រែង។
កម្មវិធីបុណ្យទានដ៏មានសទ្ធាជ្រះថ្លានេះ ត្រូវបានរៀបចំរួមគ្នានៅក្នុងវត្តស្រះកែវមុនីវណ្ណ (ហៅវត្តលើ) ដើម្បីវេរប្រគេនទៀនព្រះវស្សា ព្រមទាំងបច្ច័យ និងទេយ្យទាន ដល់វត្តអារាមសរុបចំនួន ១៧វត្ត នៅក្នុងខេត្តស្ទឹងត្រែង សំរាប់ប្រើប្រាស់ក្នុងកំឡុងពេលព្រះ
សង្ឃគង់ចាំព្រះវស្សាអស់ត្រីមាស (៣ខែ) តាមវិន័យព្រះពុទ្ធសាសនា។
ក្រៅពីទៀនព្រះវស្សាដែលជាប្រทีបបំភ្លឺផ្លូវធម៌ ឯកឧត្តមសន្តិបណ្ឌិត និងក្រុមការងារ ព្រមទាំងពុទ្ធបរិស័ទ ក៏បាននាំយកនូវគ្រឿងឧបភោគបរិភោគ និងសម្ភារប្រើប្រាស់ចាំបាច់ជាច្រើនទៀត ទៅប្រគេនដល់វត្តទាំង១៧ នោះ រួមមាន៖អង្ករ, មី, ទឹកសុទ្ធ, ភេសជ្ជៈ,ទឹកត្រី, ទឹកស៊ីអ៊ីវ, ប្រេងឆា, អំបិល, ខ្ទឹម, ប៊ីចេង, តែ,សាប៊ូ ព្រមទាំងថវិកាមួយចំនួនធំ ដើម្បជួយសម្រួលដល់ចង្ហាន់ និងការលះបង់របស់ព្រះសង្ឃក្នុងកំឡុងពេលប្រតិបត្តិធម៌វិន័យ។
ពិធីចូលកាន់ព្រះវស្សា គឺជាប្រពៃណីទំនៀមទម្លាប់ដ៏ល្អផូរផង់របស់ពុទ្ធសាសនិកខ្មែរតាំងពីបុរាណកាលមក។ ការប្រគេនទៀនវស្សា និង គ្រឿងឧបភោគបរិភោគនាពេលនេះ មិនត្រឹមតែជាការបំពេញបុណ្យកុសលតាមជំនឿសាសនាប៉ុណ្ណោះទេ ប៉ុន្តែថែមទាំងបានស្តែងឲ្យឃើញពីកម្លាំងសាមគ្គីភាព និងការយកចិត្តទុកដាក់ខ្ពស់របស់ថ្នាក់ដឹកនាំ មន្ត្រីរាជការ ក្នុងការរួមចំណែកថែរក្សា វប្បធម៌ ប្រពៃណី និងទ្រទ្រង់វិស័យព្រះពុទ្ធសាសនាឱ្យស្ថិតស្ថេរចីរកាលតទៅ៕
ចែករំលែកព័តមាននេះ