ចុះអន្តរាគមន៍បន្ទាន់ យកគ្រឿងចក្រស្តារប្រឡាយ និងដាក់ម៉ាស៊ីនបូមទឹកសង្គ្រោះស្រូវវស្សាប្រជាកសិករចំនួន ៥៣០ហិកតា
- ប៉ៃលិន
ខេត្តប៉ៃលិន ៖ បន្ទាប់ពីទទួលបាននូវសេចក្តីរាយការណ៍ពីប្រជាកសិករ ដែលប្រកបមុខរបរធ្វើស្រែប្រាំង និងស្រែវស្សា ថាមានការខ្វះខាតទឹក ដោយសារតែមេឃរាំងភ្លៀងអស់រយៈពេលយូរថ្ងៃ ទើបនៅថ្ងៃទី២៥ ខែកក្កដា ឆ្នាំ២០២៦ លោកជំទាវបណ្ឌិត បាន ស្រីមុំ អភិបាលនៃគណៈអភិបាលខេត្តប៉ៃលិន បានដឹកនាំមន្ត្រីជំនាញពាក់ព័ន្ធ ព្រមទាំងក្រុមការងារ ចុះពិនិត្យមើល ការស្តារប្រឡាយសម្រួលផ្លូវទឹក និងការដាក់ម៉ាស៊ីនបូមទឹក ដើម្បីជួយអន្តរាគមន៍សង្គ្រោះស្រូវវស្សារបស់ប្រជាកសិករ ចំនួន៥៣០ហិចតា ស្ថិតនៅក្នុងឃុំសាលាក្រៅ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ទាំងដំណាំស្រូវប្រាំង និងស្រូវវស្សា ពិតជាត្រូវការទឹកជាចាំបាច់ណាស់ ដើម្បីឱ្យដើមដងនៃដំណាំនេះ អាចដុះលូតលាស់បានល្អ លុះដល់ពេលប្រមូលផលក៏ទទួលបានទិន្នផលខ្ពស់ដែរ។ តែរហូតមកដល់ពេលនេះ ផ្ទៃមេឃហាក់ដូចជារាំងភ្លៀងអស់រយៈពេលជាច្រើនថ្ងៃ ដែលជាហេតុធ្វើឱ្យទឹកស្ទឹង ទឹកអូរ និងទឹកប្រឡាយមួយចំនួនរីងខះ មិនសូវមានទឹកច្រើនគ្រប់គ្រាន់ ដើម្បីបូមដាក់ស្រែករបស់ខ្លួននោះទេ ។
ប្រភពបន្តទៀតថា គ្រាន់តែទទួលបានដំណឹងនេះភ្លាម លោកជំទាវបណ្ឌិត បាន ស្រីមុំ អភិបាលខេត្តប៉ៃលិន មិនបង្អង់យូរឡើយ គឺឆ្លៀតពេលថ្ងៃឈប់សម្រាកដឹកនាំមន្ត្រីជំនាញនៃមន្ទីរធនធានទឹក ព្រមទាំងមន្ទីរមួយចំនួនទៀត ឱ្យប្រញាប់យកគ្រឿងចក្រ និងម៉ាស៊ីនបូមទឹក ទៅបូមស្រោចស្រពដាក់ស្រែរបស់ពួកគាត់ ដើម្បីកុំឱ្យងាប់ខូចខាត ។
លោកជំទាំវអភិបាលខេត្តក៏បានណែនាំឱ្យមន្ត្រីមួយចំនួន ត្រូវស្តារប្រឡាយ និងជីកប្រឡាយបង្ហូរទឹកបន្ថែមទៀត ដើម្បីឱ្យទឹកហូរដល់ក្បែរស្រែប្រជាពលរដ្ឋដែលនៅឆ្ងាយពីប្រឡាយទឹក អាចនឹងបូមស្រោចឱ្យបានគ្រប់ៗ គ្នា។ លោកជំទាវ ក៏បានលើកទឹកចិត្តឱ្យប្រជាពលរដ្ឋ ដែលមានស្រែនៅក្បែរប្រឡាយទឹក ចេះចែករំលែកទឹកដល់អ្នកដែលនៅក្បែរៗខ្លួន គឺអ្នកនៅឆ្ងាយពីប្រឡាយទឹក ដើម្បីបូមទឹកបង្ហូរដាក់ស្រែគ្រប់ៗគ្នាផងដែរ។
ម្យ៉ាងវិញទៀត លោកជំទាវក៏ស្នើសុំឱ្យកសិករ ដែលជួបទុក្ខលំបាកពាក់ព័ន្ធនឹងបញ្ហាខ្វះទឹកបូមដាក់ស្រែនេះ ប្រញាប់រាយការណ៍ជូនដល់ក្រុមការងារឱ្យបានឆាប់រហ័ស ដើម្បីជួយសង្គ្រោះទាន់ពេលវេលា កុំឱ្យងាប់ខូចខាត ដែលអាចនឹងធ្វើឱ្យប៉ះពាល់ដល់ជីវភាពប្រចាំថ្ងៃរបស់ពួកគាត់។
លើសពីនេះ កសិករទាំងអស់ ត្រូវតែយល់ច្បាស់ពីរបៀបធ្វើស្រែប្រាំង និងស្រែវស្សា ដោយត្រូវមានភ្លឺបិទខ្ទប់ជុំវិញ ដើម្បីកុំឱ្យទឹកហូរចោលពេលបូមដាក់ពេញស្រែ ជាពិសេសកសិករ ត្រូវតែយកចិត្តទុកដាក់ថែទាំស្រែស្រូវរបស់ខ្លួនឱ្យបានដិតដល់ ដោយត្រូវបោចស្មៅ ដាក់ជី និងការពារកុំឱ្យសត្វល្អិតចង្រៃចូលទៅស៊ីបំផ្លាញដល់ដំណារបស់ខ្លួននោះឡើយ។ បើសិនជាធ្វើស្រែលេងៗ ដោយមិនខិតខំប្រឹងប្រែងឱ្យអស់ពីកម្លាំងទេ ការប្រមូលផលក៏ទទួលបាន មិនគ្រប់ចំនួនតាមអ្វីដែលខ្លួនកំណត់នោះដែរ ។
ចំណែកកសិករម្នាក់ ឈ្មោះ ម៉ៅ ភេទប្រុស បានរៀបរាប់ឱ្យដឹងថា គាត់បានធ្វើស្រែជាង២ហិកតា នៅក្នុងដីស្រែរបស់ខ្លួន លុះមេឃរាំងភ្លៀងរយៈពេលយូរបណ្តាលឱ្យខ្វះទឹក ណាមួយស្រែនៅឆ្ងាយពីប្រឡាយលំបាកបូមទឹកដាក់ស្រែរបស់ខ្លួន ។ តែនៅពេលនេះ ខាងលោកនឹងទទួលបានទឹកគ្រប់គ្រាន់ ព្រោះលោកជំទាវអភិបាលខេត្ត បានដឹកនាំក្រុមការងារ ចុះទៅស្តារ និងជីកប្រឡាយបង្ហូរទឹកបន្ថែមទៀត ហើយសង្ឃឹមថា នឹងមានទឹកគ្រប់គ្រាន់ ធ្វើឱ្យស្រូវ អាចដុះលូតលាស់បានយ៉ាងល្អ និងទទួលបានផលច្រើននាឆ្នាំនេះថែមទៀត ៕
ចែករំលែកព័តមាននេះ