រាជធានីភ្នំពេញ ៖ នៅព្រឹកថ្ងៃទី១០ ខែកក្កដា ឆ្នាំ២០២៦ ក្រោយពីទទួលបានព័ត៌មាន គឺមានបុរសម្នាក់ បានសម្ភាសន៍ជាមួយអ្នកសារព័ត៌មាន ថាមានក្មេងស្ទាវគប់ផ្ទះ និងពុំហ៊ានប្តឹងសមត្ថកិច្ចឡើយ ព្រោះខ្លាចអស់លុយ។ សមត្ថកិច្ចប៉ុស្តិ៍នគរបាលរដ្ឋបាលចាក់អង្រែលើ បានចុះទៅដល់ផ្ទះបុរសនោះ នៅចំណុចផ្ទះជួលលក់ទូរសព្ទ ផ្លូវបេតុង ភូមិព្រែកតានូ សង្កាត់ចាក់អង្រែលើ ខណ្ឌមានជ័យ ដើម្បីសួរនាំ នេះបើតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ។
បើតាមក្រុមការងារព័ត៌មាន និងប្រតិកម្មរហ័ស បានឲ្យដឹងថា បន្ទាប់ពីសមត្ថកិច្ចសួរនាំបុរសនោះ គាត់ប្រាប់សមត្ថកិច្ច ថា គាត់មានឈ្មោះ ថេង ធារ៉ា ភេទប្រុស អាយុ៣៥ឆ្នាំ ជាម្ចាស់ហាង ហើយកន្លងមកគាត់ធ្លាប់ប៉ះពាក្យសម្តីជាមួយក្មេងៗ អាយុប្រហែល១០ ទៅ១១ឆ្នាំបន្តិចបន្តួច។ លុះរហូតដល់ថ្ងៃទី១០ ខែកក្កដា ឆ្នាំ២០២៦ វេលាម៉ោងប្រហែល០០:១៥នាទីយប់អធ្រាត្រ ក៏មានឮសំឡេងធ្លាក់អ្វីនៅលើដំបូលផ្ទះ ទើបចេញមើលតែពុំឃើញមានអ្នកណាឡើយ ដោយមិនហ៊ានប្តឹងសមត្ថកិច្ចខ្លាចអស់លុយ ហើយគាត់បានបន្តប្រាប់ថា ឮសូរពីបងស្រីម្ចាស់ផ្ទះជួលថា ធ្លាប់បាត់ខ្សែភ្លើង ថាបានទៅប្តឹងសមត្ថកិច្ចអស់លុយ ។
ក្រុមការងារព័ត៌មាន និងប្រតិកម្មរហ័ស បានឲ្យដឹងបន្តថា បន្ទាប់មក សត្ថកិច្ចបន្តសាកសួរបងស្រីជាម្ចាស់ផ្ទះជួល ក្រោយសាកសួរ គាត់បានប្រាប់ថា កន្លងមកប្រហែលមួយឆ្នាំមុន គាត់បានបាត់ខ្សែភ្លើង និងបានទៅដាក់ពាក្យបណ្តឹងនៅកន្លែងសមត្ថកិច្ច ហើយសមត្ថកិច្ចបានស្រាវជ្រាវឃាត់ខ្លួនជនសង្ស័យ អនុវត្តតាមនីតិវិធី។ បងស្រីម្ចាស់ផ្ទះជួល បញ្ជាក់ថា នៅពេលនោះ គាត់បានឧបត្ថម្ភថវិកាបន្តិចបន្តួចប៉ុណ្ណោះ ដល់សមត្ថកិច្ច ដើម្បីជាការលើកទឹកចិត្ត ដែលសមត្ថកិច្ចខិតខំធ្វើការងារជូនគាត់ ។
ក្រុមការងារព័ត៌មាន និងប្រតិកម្មរហ័ស បានបន្ថែមថា ទន្ទឹមនឹងនោះ សមត្ថកិច្ចក៏បានណែនាំដល់បុរសខាងលើ ឱ្យទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចាក់អង្រែលើ ដោយមិនតម្រូវឱ្យបង់សេវានោះទេ បើសិនមានករណីអ្វីកើតឡើងឬសូមរាយការណ៍បន្ទាន់ ប្រាប់សមត្ថកិច្ច ដើម្បីសមត្ថកិច្ចមានវិធានការអន្តរាគមន៍ ៕
ចែករំលែកព័តមាននេះ