រាជធានីភ្នំពេញ ៖ ការប្រកួតបាល់ទាត់ក្របខណ្ឌ Metfone Cambodian League 2011 នៅថ្ងៃសៅរ៍ ទី៦ និងអាទិត្យ់ ទី៧ ខាងមុខនេះ នឹងឈានចូលដល់សប្តាហ៍ទី១៤ ហើយ។ ក្រុមភ្នំពេញក្រោន បើទោះបីជាប្រកួតចាញ់ក្រុមអគ្គស្នងការដ្ឋាននគរបាលជាតិ ក៏ដោយ ក៏នៅតែអាចរក្សាតំណែងជួរមុខគេក្នុងតារាងដដែល ខណៈក្រុមព្រះខ័នរាជ្យ
រាជធានីភ្នំពេញ ៖ ការប្រកួតបាល់ទាត់ក្របខណ្ឌ Metfone Cambodian League 2011 នៅថ្ងៃសៅរ៍ ទី៦ និងអាទិត្យ់ ទី៧ ខាងមុខនេះ នឹងឈានចូលដល់សប្តាហ៍ទី១៤ ហើយ។ ក្រុមភ្នំពេញក្រោន បើទោះបីជាប្រកួតចាញ់ក្រុមអគ្គស្នងការដ្ឋាននគរបាលជាតិ ក៏ដោយ ក៏នៅតែអាចរក្សាតំណែងជួរមុខគេក្នុងតារាងដដែល ខណៈក្រុមព្រះខ័នរាជ្យ ត្រូវការ៣ពិន្ទុបន្ថែមទៀតសម្រាប់ការមកជួបក្រុមព្រែកប្រាកីឡាលើកនេះដើម្បីបានឡើងទៅឈរនៅលេខរៀងទី៣ ក្នុងតារាង ។
ក្រុមភ្នំពេញក្រោនប្រកួតបាន១៣លើកក្នុងនោះឈ្នះ១០ ស្មើ២ ចាញ់តែ១ប្រកួតប៉ុណ្ណោះ និងមាន៣២ពិន្ទុ វ៉ាគេដាច់តែម្តង។ ប៉ុន្តែទោះបីជាយ៉ាងណាក៏គេនៅមិនទាន់មានភាពកក់ក្តៅនៅឡើយ ព្រោះពេលនេះមានក្រុមខ្លាំងមួយចំនួនដូចជាក្រុមណាហ្គាខប ក្រសួងការពារជាតិកំពុងតែមានពិន្ទុតាមពីក្រោយជាប់តែម្តង ។ ចំណែកក្រុមអគ្គស្នងការដ្ឋាននគរបាលជាតិ ពិន្ទុរបស់គេនៅឃ្លាតឆ្ងាយពីក្រុមភ្នំពេញក្រោន ដាច់តែម្តង ការប្រកួតទាំង១៣លើករបស់គេកន្លងមកនេះឈ្នះ៦ ស្មើ២ ចាញ់៥ប្រកួត មានតែ២០ពិន្ទុប៉ុណ្ណោះ ។
ក្រុមព្រះខ័នរាជ្យ សង្ឃឹមថា នឹងអាចរកបាន៣ពិន្ទុបន្ថែមទៀតយ៉ាងងាយសម្រាប់ការមកប៉ះក្រុមបាតតារាងព្រែកប្រាកីឡាលើកនេះ ។ កាលពីនៅជុំទី១ ក្រុមព្រះខ័នរាជ្យធ្លាប់បានបំបាក់ក្រុមព្រែកប្រាកីឡាឱ្យចាញ់ ៣-០ ម្តងរួចមកហើយ ដូច្នេះសម្រាប់ការប្រកួតលើកនេះក្រុមព្រះខ័នរាជ្យ នៅតែមានជំនឿចិត្ត១០០ភាគរយ ក្នុងការដណ្តើមជ័យជម្នះពីក្រុមព្រែកប្រាកីឡា ។ បច្ចុប្បន្នក្រុមព្រះខ័នរាជ្យ បានរក្សាតំណែងលេខ៤ ក្នុងតារាង ខណៈក្រុមបាល់ទាត់ក្រសួងការពារជាតិ ស្ថិតនៅលេខរៀងទី៣ ក្នុងតារាងជាបណ្តោះអាសន្ន ។ ក្រុមព្រះខ័នរាជ្យ ប្រកួតបាន១៣លើក ឈ្នះ៦ ស្មើ៤ ចាញ់៣ មាន២២ពិន្ទុ ចាញ់ក្រុមក្រសួងការពារជាតិតែ៣ពិន្ទុប៉ុណ្ណោះ ។ រីឯក្រុមព្រែកប្រាកីឡាស្ថិតនៅលេខរៀងទី៩ ក្នុងតារាង ខណៈប្រកួតបាន១៣លើក ឈ្នះ២ ស្មើ២ ចាញ់៩ មាន៨ពិន្ទុប៉ុណ្ណោះ ។
ដោយឡែកសម្រាប់ថ្ងៃអាទិត្យ មាន២ប្រកួតទៀត ជើងទី១ ក្រុមបៀលប្រាយយូណាយធីត ជួបជាមួយក្រុមគិរីវង់សុខសែនជ័យ ។ ក្រុមបៀលប្រាយយូណាយធីត ពេលនេះកំពុងស្ថិតនៅលេខរៀងទី៥ ក្នុងតារាង ព្រោះថា ការប្រកួតទាំង១៣លើកកន្លងមក ឈ្នះ៧ ស្មើ១ ចាញ់៥ មាន២២ពិន្ទុ ។ ចំណែកក្រុមគិរីវង់សុខសែនជ័យវិញ ប្រកួតបាន១៣លើកដូចគ្នា ឈ្នះ៦ ស្មើ២ ចាញ់៥ មាន២០ពិន្ទុ។ ក្រុមទាំង២នេះមានរបៀបលេងប្រហាក់ប្រហែលគ្នា ហើយទាំងសងខាងសុទ្ធតែត្រូវការ៣ពិន្ទុបន្ថែមទៀតដូចគ្នាប៉ុន្តែមិនដឹងថា ខាងណាមានសំណាងជាងប៉ុណ្ណោះ ។
ក្រុមណាហ្គាខបសង្ឃឹមថា អាចរក្សាតំណែងលេខ២ ក្នុងតារាងយ៉ាងរឹងមាំបំផុត ដោយសារតែលើកនេះគេត្រូវជួបក្រុមបាតតារាងឫទ្ធីសែន។ ក្រុមណាហ្គាខប ការប្រកួតទាំង១៣លើករបស់គេកន្លងមកនេះ ឈ្នះ៩ ស្មើ១ ចាញ់៣ប្រកួត និងមាន២៩ពិន្ទុ ស្ថិតនៅលេខរៀងទី២ ក្នុងតារាង។ សម្រាប់ការប្រកួតលើកនេះ មិនពិបាកប៉ុន្មានឡើយ ព្រោះថា ក្រុមឫទ្ធីសែន ជាក្រុមបាតតារាងងាយនឹងយកឈ្នះបំផុត ម្យ៉ាងវិញទៀតកាលពីនៅជុំទី១ ក្រុម ណាហ្គាខប ធ្លាប់បានលត់ក្រុមឫទ្ធីសែន យ៉ាងចាស់ដៃឱ្យចាញ់១០-១ឯណោះ ៕
ចែករំលែកព័តមាននេះ