រាជធានីភ្នំពេញ ៖ លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ត្រូវបានអង្គមហាសន្និបាតសម្រេចជាឯកច្ឆ័នជ្រើសរើសធ្វើជាប្រធានខេមរសហព័ន្ធកីឡាតេក្វាន់ដូអាណត្តិថ្មីជាបន្តទៀត ខណៈពេលដែលសហព័ន្ធមានស្ថាប័នកីឡាចំនួន២នេះ បានធ្វើការផ្លាស់ប្តូរជាប្រវត្តិសាស្ត្ររបស់ខ្លួនដោយតែង
រាជធានីភ្នំពេញ ៖ លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ត្រូវបានអង្គមហាសន្និបាតសម្រេចជាឯកច្ឆ័នជ្រើសរើសធ្វើជាប្រធានខេមរសហព័ន្ធកីឡាតេក្វាន់ដូអាណត្តិថ្មីជាបន្តទៀត ខណៈពេលដែលសហព័ន្ធមានស្ថាប័នកីឡាចំនួន២នេះ បានធ្វើការផ្លាស់ប្តូរជាប្រវត្តិសាស្ត្ររបស់ខ្លួនដោយតែងតាំងអគ្គលេខាធិការតែ១រូបប៉ុណ្ណោះ ។
ខេមរសហព័ន្ធកីឡាតេក្វាន់ដូមានស្ថាប័នចំនួន២ គឺផ្នែគ WTF របស់កូរ៉េខាងត្បូង និង ITF របស់កូរ៉េខាងជើង ហើយកាលពីនៅអាណត្តិចាស់ឆ្នាំ២០០៨-២០១១ សហព័ន្ធមួយនេះធ្លាប់បានធ្វើការតែងតាំងអគ្គលេខាធិការចំនួន២ដាច់ដោយឡែកពីគ្នា គឺលោកហែម សំណាង អគ្គលេខាធិការទទួលបន្ទុក WTF និងលោកបួន ហ៊ីងរិទ្ធីយ៉ា ទទួលបន្ទុកផ្នែក ITF ។ ប៉ុន្តែនៅក្នុងអង្គមហាសន្និបាតដែលបានធ្វើឡើងកាលពីថ្ងៃទី២ សីហា នៅទីស្នាក់ការគណៈកម្មាធិការជាតិអូឡាំពិកកម្ពុជា បានសម្រេចច្របាច់បញ្ចូលគ្នា និងជ្រើសរើសអគ្គលេខាធិការតែ១រូបប៉ុណ្ណោះ ដើម្បីងាយស្រួលក្នុងការធ្វើការ។
បេក្ខភាពដែលបានឈរឈ្មោះឱ្យគេបោះឆ្នោតមានចំនួន១៣រូប មកពី WTF និង ITF និងមានអ្នកចូលរួមបោះឆ្នោតចំនួន២៨រូប ដើម្បីជ្រើសរើសគណៈកម្មាធិការប្រតិបត្តិអាណត្តិថ្មីចំនួន១១រូប។ ចំពោះការរៀបចំរចនាសម្ព័ន្ធនៅក្នុងសហព័ន្ធសាជាថ្មីនេះគឺ លោកថោង ខុន ត្រូវបានជ្រើសរើសជាប្រធានសម្រាប់អាណត្តិ២០១១-២០១៥ លោកនួន ភា អនុប្រធាន លោកអ៊ុក រី អនុប្រធាន លោកហែម សំណាង អគ្គលេខាធិការ។ លោកបួន ហ៊ីងរិទ្ធីយ៉ា អគ្គលេខាធិការរង លោកឃឹម សត្ថា អគ្គហិរញ្ញិក លោកហីុង រីដា អគ្គហិរញ្ញិករង។ ចំណែកសមាជិកមានលោកជាតិ ខេមរា លោកជិន សុខទី និងលោកវ៉ាន់ សុខ។ ប៉ុន្តែអង្គមហាសន្និបាតនេះមានភាពចម្រូងចម្រាសបន្តិចដែរ ខណៈពេលលោកសំ សុខយី សមាជិកគណៈកម្មាធិការប្រតិបត្តិអាណត្តិចាស់ត្រូវបានគេបោះឆ្នោតទម្លាក់ ហើយលោកបានធ្វើការតវ៉ាដែលអង្គមហាសន្និបាតបានជ្រើសរើសបេក្ខភាពលោកនួន ភា ដែលមិនធ្លាប់មានប្រវត្តិចូលប្រឡូកនៅក្នុងវិស័យកីឡាតេក្វាន់ដូឱ្យចូលមកជាសមាជិកពេញសិទ្ធិ ។ ទោះបីជាយ៉ាងណាអង្គមហាសន្និបាតបានលើកហេតុផលថា លោកនួន ភា គឺជាមនុស្សសំខាន់ម្នាក់អាចជួយជ្រោមជ្រែងឱ្យវិស័យកីឡាតេក្វាន់ដូមានការរីកចម្រើនទៅថ្ងៃអនាគតបាន ។
សូមបញ្ជាក់ថា តេក្វាន់ដូគឺប្រភេទកីឡាដែលក្រសួងអប់រំ យុវជន និងកីឡា ចាត់ទុកជាកីឡាដ៏មានសក្តានុពលមួយធ្លាប់រកបានមេដាយមកជូនជាតិ មិនដែលខានឡើយ៕
ចែករំលែកព័តមាននេះ