«ប៉ុប ពី» បាត់ពីការសម្តែងទាំងស្រុង បើទោះអាជីពសិល្បៈនៅមិនទាន់បោះបង់
- ភ្នំពេញ
រាជធានីភ្នំពេញ ៖ តារាភេទទីបី ប៉ុប ពី បានទទួលស្គាល់ថា មួយរយៈចុងក្រោយនេះ នាងស្ទើរតែបាត់ពីការសម្តែង និងចូលរួមកម្មវិធីកម្សាន្តបែបសិល្បៈនានាទាំងស្រុង បើទោះបីជាបច្ចុប្បន្ន រូបនាងនៅមិនទាន់បោះបង់ចោលអាជីពមួយនេះក៏ដោយ ។
ប៉ុប ពី បានចាត់ទុកការបាត់បង់ការសម្តែងរបស់ខ្លួនក្នុងរយៈពេលប៉ុន្មានឆ្នាំចុងក្រោយដោយសារកត្តាមួយចំនួន ជាពិសេស អស់រយៈពេលជាច្រើនមកនេះ នាងបានដាច់ខ្សែរយៈស្ទើទាំងអស់ពីអ្នកសិល្បៈ និងផលិតករនានា ។
តារាសម្តែងភេទទីបី នាង ប៉ុប ពី បានអះអាងប្រាប់កោះសន្តិភាពថា មួយរយៈចុងក្រោយនេះ នាងពិតជាស្ងាត់ពីអាជីពសម្តែងប្រាកដមែន ហើយទំនាក់ទំនងអ្នកក្នុងវិស័យសិល្បៈនេះក៏ដាច់ខ្សែរយៈផងដែរ ប៉ុន្តែពេលទៅណាមកណា គឺនាងនៅតែមានគេស្គាល់ដដែល ។ នាងថា យើងមិនបានផ្តាច់ការងារសិល្បៈទេ ប៉ុន្តែគេដូចជាមិនសូវនឹកនាដល់យើង បើទោះបីជាបច្ចុប្បន្នយើងនៅតែបន្តអាជីពសិល្បៈនេះក៏ដោយ ។
នាងបន្ថែមថា ការបាត់បង់អាជីពសម្តែងនេះ មិនមែនតែរូបនាងនោះឡើយ ពោលអ្នកសិល្បៈចាស់ៗមួយទៀតក៏បាត់បង់ដូចគ្នា ដោយសារបរិបទសង្គមដែលមានបច្ចេកវិទ្យាទំនើប ហេតុនេះការផលិតកុន និងចម្រៀងចាក់ផ្សាយតាមទូរទស្សន៍នោះ គឺមិនសូវមានច្រើនដូចមុនឡើយ ។
នាងបញ្ជាក់ថា កាលពីជំនាន់មុន នាងមានការងារសិល្បៈច្រើនទាំងការសម្តែង និងពិធីករតាមទូរទស្សន៍ ប៉ុន្តែ បច្ចុប្បន្ននេះ អាជីពសិល្បៈរបស់នាង គឺធ្លាក់ដល់កម្រិតសូន្យតែម្តង ដោយមិនមានផលិតករណាហៅរូបនាងឲ្យសម្តែងទៀតឡើយ ។
យ៉ាងណា បើតាម ប៉ុប ពី នាងមិនទាន់បោះបង់ចោលអាជីពសិល្បៈនាពេលនេះឡើយ ដោយនាងរង់ចាំតែគេហៅថត នោះនាងនឹងទទួលភ្លាម ប្រសិនផលិតករគិតថា នាងអាចសម្តែងជាតួអ្វីបាននោះនាងមិនប្រកែកឡើយ ។ ប៉ុប ពី លើកឡើងបន្ថែមថា បច្ចុប្បន្ន នាងទទួលស្គាល់ថា មានតារាសម្តែងថ្មីៗ ក្មេងៗច្រើន ហើយនៅក្នុងនោះ សូម្បីតែអ្នកលេងបណ្តាញសង្គម Tik Tok ក៏អាចក្លាយជាតារាដែរ ហើយសម័យជឿនលឿនគេច្រើនប្រើប្រាស់បណ្តាញសង្គមនៅក្នុងថតរឿងបែបខ្លីៗវិញ ។
នាងបញ្ជាក់ថា កក្តាទាំងអស់នេះ បានធ្វើឲ្យតួចាស់ៗ រួមទាំងរូបនាងផងដែរ ស្ទើរតែបាត់ការសម្តែងទាំងស្រុង ខណៈពេលដែលស្ថានភាពបែបនេះ ក៏បានធ្វើឲ្យអ្នកសិល្បៈចាស់ៗមួយចំនួនជួបការលំបាកក្នុងជីវភាព ព្រោះពួកគាត់ទាំងនោះ រស់ដោយសារតែសិល្បៈតែមួយមុខ ។
ចំណែករូបនាងវិញ បើទោះបីជាមិនមានចំណូលពីវិស័យសិល្បៈដូចមុនក៏ដោយ ប៉ុន្តែនាងក៏មានមុខរបរជាជាងផាត់មុខម្នាក់តាមសម្អាងការនានា ក្នុងពេលដែលមុខរបរនេះក៏អាចឲ្យនាងមានប្រាក់ចំណូលខ្លះៗដែរ ។ ដោយឡែក ពាក់ព័ន្ធជីវិតគ្រួសារវិញ តារាសម្តែង ប៉ុប ពី បានគូសបញ្ជាក់ថា បច្ចុប្បន្ន នាងមិនទាន់គ្រួសារនៅឡើយទេ ហើយបញ្ហានេះ នាងក៏មិនចង់ទទួលយកអ្នកណាម្នាក់នោះឡើយ ដោយសារតែនាងមានការភ័យខ្លាចដល់ជីវិត និងការងាររបស់នាង ៕
ចែករំលែកព័តមាននេះ