រាជធានីភ្នំពេញ ៖ វិទ្យាស្ថានអភិវឌ្ឍ វិស័យអប់រំ បានសហការជាមួយសាលារៀន វ៉េស្ទឡាញន៍ និងសាលារៀនណត្សឡាញន៍ នៅក្នុងការបង្កើតនូវបណ្ណាល័យចល័តទីមួយរបស់ ខ្លួនដើម្បីលើកកម្ពស់វប្បធម៌នៃការអានសៀវភៅឱ្យមានសកម្មភាពឡើងវិញ តាមរយៈការជំរុញលើកទឹកចិត្តដល់
រាជធានីភ្នំពេញ ៖ វិទ្យាស្ថានអភិវឌ្ឍ វិស័យអប់រំ បានសហការជាមួយសាលារៀន វ៉េស្ទឡាញន៍ និងសាលារៀនណត្សឡាញន៍ នៅក្នុងការបង្កើតនូវបណ្ណាល័យចល័តទីមួយរបស់ខ្លួនដើម្បីលើកកម្ពស់វប្បធម៌នៃការអានសៀវភៅឱ្យមានសកម្មភាពឡើងវិញ តាមរយៈការជំរុញលើកទឹកចិត្តដល់សិស្សានុសិស្សឱ្យងាកមកចាប់យកទម្លាប់នៃការអានសៀវភៅនៅពេលទំនេរ។ ជាពិសេសប្អូនៗកុមារដែលរស់នៅតាមសហគមន៍ដែលមិនសូវមានឱកាសនៅក្នុងការអានសៀវភៅ អាចមកអានសៀវភៅបានតាមរយៈការចូលរួមជាមួយបណ្ណាល័យចល័ត ដោយបោះបង់នូវទម្លាប់ខ្ជិលច្រអូសទាំងឡាយហើយសប្បាយនឹងការអាន។
ជីវភាពគ្រួសារមួយចំនូននៅក្នុងសហគមន៍របស់យើងមានការលំបាកនៅក្នុងការរស់នៅទាំងការហូបចុក ការស្លៀកពាក់ ជាពិសេសពួកគាត់ពុំមានលទ្ធភាពនៅក្នុងការទិញសៀវភៅឱ្យកូនរបស់គាត់អានឱ្យបានច្រើនឡើយ។
ប្រភពព័ត៌មានមួយបានបញ្ជាក់ឱ្យដឹងថាប្រជាជនខ្មែរប្រមាណ៨០%ក្នុងចំណោមប្រជាជនសរុបជាង១៤លាននាក់រស់នៅតាមទីជនបទនានាក្នុងប្រទេសកម្ពុជា ហើយចន្លោះពី៣០ទៅ៣៥%ក្នុងចំណោមពួកគេកំពុងរស់នៅដោយពឹងផ្អែកលើប្រាក់ចំណូលតិចជាង១ដុល្លារអាមេរិកក្នុងមួយថ្ងៃ។ ដោយឡែកតួលេខនៃ អត្រាចេះអានអក្សរក្នុងចំណោមប្រជាជនកម្ពុជានៅមានភាពប្រទាញប្រទង់គ្នានៅឡើយ ប៉ុន្តែបើផ្អែកតាមវិទ្យាស្ថានជាតិស្ថិតិ មនុស្សពេញវ័យនៅកម្ពុជាជាង៧០% គឺជាអ្នកចេះអានអក្សរ។ ក្រុមអ្នកជំនាញនិយាយថា ការអាននិងការសរសេរបង្កើនការយល់ដឹងដល់មនុស្សអំពីពិភពលោក និងអាចជួយឱ្យមនុស្សមានការផ្លាស់ប្តូររបៀបគិតរបស់ពួកគេ ហើយអាចថែមទាំងផ្លាស់ប្តូរការប្រព្រឹត្តរបស់ពួកគេបានថែមទៀតផង ។ មានការសង្កេតឃើញថា ប្រជាពលរដ្ឋខ្មែរ ជាពិសេសយុវវ័យនៅក្នុងប្រទេសកម្ពុជានាពេលបច្ចុប្បន្ននេះ បានងាកមកអានសៀវភៅជាបណ្តើរៗវិញហើយ។ កាលពីពេលមុន គេសង្កេតឃើញតែជនបរទេស ជាពិសេសប្រទេសអឺរ៉ុបតែប៉ុណ្ណោះដែលតែងតែកាន់សៀវភៅទោះបីពួកគេដើរឬក៏អង្គុយ។ ចំណេះដឹងគឺជាគោលសំខាន់របស់មនុស្សគ្រប់វ័យដែលពួកគេតែងតែស្វែងរកតាមរយៈមធ្យោបាយផ្សេងៗស្របពេលដែលបច្ចេកវិជ្ជាកាន់តែទំនើប និងប្រទេសជាតិមានការអភិវឌ្ឍ ។ ប្រជាពលរដ្ឋគ្រប់រូបតែងតែចង់ដឹងចង់ទទួលនូវព័ត៌មានពីហេតុការណ៍នានា បញ្ហានយោបាយក្នុង និងក្រៅប្រទេសតាមរយៈការអានកាសែត ទស្សនាវដ្ដី សៀវភៅចំណេះដឹងទូទៅ ឯកសារប្រវត្តិសាស្រ្ត និងឯកសារនានាទាក់ទងនឹងចម្ងល់របស់ខ្លួន ដោយពួកគេស្វែងរកតាមបណ្ណាគារ តូបលក់កាសែត បណ្ណាល័យ និងអ៊ីនធើរណេតជាដើម។
លោកប៉ិច បូឡែន ប្រធានវិទ្យាស្ថានអភិវឌ្ឍវិស័យអប់រំ បានមានប្រសាសន៍ថា ការសហការជាមួយសាលារៀនវ៉េស្ទឡាញន៍ និងសាលារៀនណត្សឡាញន៍នៅក្នុងការរៀបចំបណ្ណាល័យចល័តនេះឡើង គឺដើម្បីលើកកម្ពស់វប្បធម៌នៃការអានសៀវភៅរបស់យុវជនខ្មែរយើងឱ្យសកម្មឡើងវិញ ។ ពីព្រោះសៀវភៅគឺជាឃ្លាំងចំណេះដែលយើងគ្រប់គ្នាគ្រាន់តែវិនិយោគពេលវេលារបស់យើងនៅក្នុងការអាន នោះយើងនឹងបានទទួលចំណេះដឹងដើម្បីអភិវឌ្ឍចំណេះដឹង និងអនាគតរបស់យើងឱ្យភ្លឺស្វាងមិនខាន ។
លោកអោ ប៊ុននាង អ្នកសម្របសម្រួលការងារសង្គមកិច្ច និងជាអ្នកដឹកនាំគម្រោងបណ្ណាល័យចល័តបានមានប្រសាសន៍ថា លោកពិតជាមានមោទនភាពយ៉ាងខ្លាំងដែលបានចូលរួមការងារនេះ ។
គួរបញ្ជាក់ផងដែរថា សាលារៀនវ៉េស្ទឡាញន៍ និងសាលារៀនណត្សឡាញន៍ គឺជាសាលាឯកជនដែលតែងតែចូលរួមយ៉ាងសកម្មនៅក្នុងការងារសង្គមកិច្ច ដើម្បីលើកកម្ពស់ស្មារតីនៅក្នុងការចូលរួមពីស្ថាប័នឯកជនជាមួយរដ្ឋាភិបាល សំដៅអភិវឌ្ឍធនធានមនុស្សនៅក្នុងសង្គមជាតិយើងនាពេលអនាគត ៕
ចែករំលែកព័តមាននេះ