រាជធានីភ្នំពេញ ៖ ការប្រកួតប្រដាល់ដណ្តើមថវិកាកិត្តិយសពីក្រុមហ៊ុនជីបម៉ុង ក្នុងប្រភេទទម្ងន់៦៣,៥គីឡូក្រាម នៅលើសង្វៀនស្ថានីយទូរទស្សន៍បាយ័ន ក្នុងពូលA ជុំទី១ កាលពីថ្ងៃអាទិត្យទី៣១ កក្កដាកន្លងមកនេះ ភុន សោភ័ណ្ឌ មកពីក្លឹបយុវកីឡា និងនន់ ជំនិត មកពីក្លឹបមជ្ឈមណ្ឌលកំចាត់មីនកម្ពុជា មានសំណាងរកបាន៣ពិន្ទុមុនគេ ។
រាជធានីភ្នំពេញ ៖ ការប្រកួតប្រដាល់ដណ្តើមថវិកាកិត្តិយសពីក្រុមហ៊ុនជីបម៉ុង ក្នុងប្រភេទទម្ងន់៦៣,៥គីឡូក្រាម នៅលើសង្វៀនស្ថានីយទូរទស្សន៍បាយ័ន ក្នុងពូលA ជុំទី១ កាលពីថ្ងៃអាទិត្យទី៣១ កក្កដាកន្លងមកនេះ ភុន សោភ័ណ្ឌ មកពីក្លឹបយុវកីឡា និងនន់ ជំនិត មកពីក្លឹបមជ្ឈមណ្ឌលកំចាត់មីនកម្ពុជា មានសំណាងរកបាន៣ពិន្ទុមុនគេ ។
ភុន សោភ័ណ្ឌ បានយកឈ្នះរ៉ាក់ វិឆ័យ មកពីក្លឹបកងពលតូចលេខ៧០ដោយពិន្ទុ។ សោភ័ណ្ឌ បានប្រើស្នៀតជើងស្វាគមន៍វិឆ័យតាំងពីទឹកទី១មកម៉្លេះ ប៉ុន្តែវិឆ័័យក៏មិនអន់ប៉ុន្មានដែរ បានទាត់សងបកវិញធ្វើឱ្យសោភ័ណ្ឌចង់ភ័យម្តងៗ។ ស្នៀតជើងរបស់គេទាំង២សាហាវដូចគ្នា ប៉ុន្តែការទាត់ចេញរបស់សោភ័ណ្ឌចំទិសដៅច្រើនជាង ជាពិសេសនៅក្នុងទឹកទី៥តែម្តង សោភ័ណ្ឌបានធ្វើឱ្យវិឆ័យស្ថិតនៅក្នុងស្ថានភាពយ៉ាប់យ៉ឺនបំផុត។
រីឯនន់ ជំនិតវិញ ចំណាយពេលតែ២ទឹកគត់បានម៉ាត់ចូលមុខស៊ីវ ឌីណា មកពីក្លឹបកងទ័ពឆត្រយោង៩១១ ឱ្យសន្លប់ក្រោកលែងរួច ។ ស្នៀតកណ្តាប់ដៃរបស់ជំនិត បានម៉ាត់តម្រង់មុខឌីណាចំពេញៗតាំងពីទឹកទី១ម៉្លេះ លុះចូលដល់ទឹកទី២ ស្នៀតកណ្តាប់ដៃរបស់ជំនិតបានម៉ាត់ចំមុខឌីណាឱ្យរាប់៨រហូតដល់ទៅ២លើក ទីបំផុតអាជ្ញាកណ្តាលលោកទេស សារិន ក៏សម្រេចបញ្ឈប់ការប្រកួតតែម្តង ។
ចំណែកគូប្រកួតមិត្តភាព គង់ សាវី មកពីក្លឹបឃុំជ្រៃខេត្តបាត់ដំបង ប្រកួតស្មើពិន្ទុដន សុគន្ធា មកពីក្លឹបបាគងខេត្តសៀមរាប ។ អ៊ី ចន្ថា មកពីក្លឹបអេភូថងកីឡា យកឈ្នះឯម សារ៉ាត់ មកពីក្លឹបគ្រុឌមានជ័យដោយពិន្ទុ ។
នៅលើសង្វៀនស្ថានីយទូរទស្សន៍CTN កាលពីថ្ងៃអាទិត្យទី៣១ កក្កដាកន្លងមកនេះដែរ ចាន់ រតនៈ មកពីក្លឹបកងពលធំអន្តរាគមន៍លេខ៣ព្រះវិហារ បានធ្វើឱ្យវង្ស គង់រាជ មកពីក្លឹបនាគរាជ ចាញ់់ការប្រកួតដោយពិន្ទុទាំងមិនអស់ចិត្ត ខណៈម៉ី សុភាព មកពីក្លឹបព្រះខ័នរាជ្យ ចាញ់ពិន្ទុក្រោមថ្វីដៃអ្នកប្រដាល់ស្រករក្រោយព្រំ សំណាង មកពីក្លឹបកងទ័ពឆត្រយោង៩១១។
រតនៈ និងគង់រាជ បានបើកការវាយប្រហារគ្នាយ៉ាងសាហាវតាំងពីទឹកទី១ម៉្លេះ ដោយទាំងសងខាងបានប្រើស្នៀតពិសេសវាយសម្រុកមិនដកថយ ជាពិសេសស្នៀតកែងរបស់រតនៈ បានធ្វើឱ្យគង់រាជចង់លស់ព្រលឹងម្តងៗ ប៉ុន្តែស្នៀតកណ្តាប់ដៃរបស់គង់រាជក៏មិនជាអន់ប៉ុន្មានដែរ បានវាយសងបកវិញមិនទុកយូរឡើយ ។ គង់រាជបាត់បង់ឱកាសច្រើនជាងនៅចុងទឹកទី៤និងទី៥ ហើយគេបានបង្ហាញនូវការសោកស្តាយយ៉ាងខ្លាំង ខណៈពេលដែលអាជ្ញាកណ្តាលប្រកាសឱ្យចាន់ រតនៈ ជាអ្នកឈ្នះ ។
ព្រំ សំណាង បានធ្វើឱ្យសុភាពបាក់មុខបន្ទាប់ពីតស៊ូប្រកួតយ៉ាងស្វិតស្វាញអស់រយៈពេល៥ទឹករួចមក ។ សុភាពក៏ជាជើងខ្លាំងម្នាក់ដែរ ប៉ុន្តែពេលនេះកម្លាំងរបស់គេអន់ជាងមុនបន្តិចហើយ ។ សុភាពបាត់បង់ឱកាសគ្រប់គ្រងស្ថានភាពប្រកួតចាប់តាំងពីទឹកទី៣មកម៉្លេះ ស្នៀតដៃនិងស្នៀតជើងរបស់គេបញ្ចេញមិនសូវបានល្អ វាយមិនសូវចំទិសដៅ មិនតែប៉ុណ្ណោះត្រូវសំណាងវាយសង្គ្រប់ស្ទើរតែកម្រើកលែងកើតនៅចុងទឹកទី៤និងក្នុងទឹកទី៥។ សំណាងដែលមានកម្លាំងខ្លាំងជាង បានជំរុញឱ្យសុភាពដកថយរហូត ហើយថែមទាំងរកឱកាសការពារខ្លួនស្ទើរមិនបានផង ។
ឈាន រស្មី មកពីក្លឹបខេត្តរតនគិរី យកឈ្នះរាជសីហ៍ ចាន់ឌី មកពីក្លឹបសម្រែករាជសីហ៍បង្ក្រាបគ្រឿងញៀនដោយពិន្ទុ ។ ម៉ាប់ ឆៃយ៉ា មកពីក្លឹបបក្សីស្លាបដែក យកឈ្នះវៀត ប៊ុនឌឿន មកពីក្លឹបកីឡាប្រដាល់ក្រសួងការពារជាតិដោយពិន្ទុ ៕
ចែករំលែកព័តមាននេះ