រាជធានីភ្នំពេញ ៖ ក្រោមអធិបតីភាពរបស់ឯកឧត្តម ឃួង ស្រេង អភិបាលរាជធានីភ្នំពេញ លោកអ្នកឧកញ៉ា ភាព ហៀក ស្ថាបនិកក្រុមហ៊ុន…
រាជធានីភ្នំពេញ ៖ ក្រោមអធិបតីភាពរបស់ឯកឧត្តម ឃួង ស្រេង អភិបាលរាជធានីភ្នំពេញ លោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង និងអ្នកឧកញ៉ា លាង ម៉េង សហស្ថាបនិកក្រុមហ៊ុន ខ្មែរ ប៊ែវើរីជីស បានអញ្ជើញចូលរួម ក្នុងពិធីក្រុងពាលី ជាមួយលោកគ្រូ អ្នកគ្រូ សិស្សានុសិស្ស និងមន្ត្រីរាជការជាច្រើនរូប ដើម្បីបើកការដ្ឋានសាងសង់អគារសិក្សា ១ ខ្នង កម្ពស់ ៣ ជាន់ មានចំនួន ១៥ បន្ទប់ ព្រមទាំងរបងសាលា នៅសាលាបឋមសិក្សាព្រៃស ស្ថិតនៅសង្កាត់ព្រៃស ខណ្ឌដង្កោ ដែលជាអំណោយរបស់ក្រុមហ៊ុន ខ្មែរ ប៊ែវើរីជីស ដែលជាពាណិជ្ជកម្មមួយក្រោមក្រុមហ៊ុនមេ ជីប ម៉ុង ។
ពិធីក្រុងពាលីតាមបែបសាសនានេះ ធ្វើឡើងដើម្បីសុំម្ចាស់ទឹកម្ចាស់ដី សុំសេចក្តីសុខចំរុងចំរើន និងទទួលបានជោគជ័យក្នុងការបើកការដា្ឋនសាងសង់អគារសិក្សាថ្មីនៅសាលាបឋមសិក្សាព្រៃស។ ជាប្រពៃណីទំនៀមទំលាប់ខ្មែរមុននឹងចាប់ផ្តើមសាងសង់សំណង់ផ្សេងៗ ដើម្បីឲ្យការសាងសង់នោះប្រព្រឹត្តទៅដោយរលូន និងមានសេចក្តីសុខសេចក្តីចំរើន គេតែងប្រារព្វពិធីនេះឡើង មិនដែលខនខានឡើយ ។
សាលាបឋមសិក្សាព្រៃស មានផ្ទៃដីជិត ១ ហិចតា និងមានទីតាំងស្ថិតពីក្រោយវត្តធម្មត្រ័យ ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។ ដោយអគារសិក្សាមានចំនួនតិច ចាស់ទ្រុឌទ្រោម និងចំនួនសិស្សានុសិស្សចេះតែកើនឡើងជាលំដាប់ ទើបរដ្ឋបាលរាជធានីភ្នំពេញ អំពាវនាវឱ្យវិស័យឯកជនជួយ ហើយត្រូវបានក្រុមហ៊ុនខ្មែរ ប៊ែវើរីជីស ដែលមានក្រុមហ៊ុនមេ ជីបម៉ុង ជួយសាងសង់ និងបានសម្រេចឱ្យមានពិធីក្រុងពាលីបើកការដ្ឋានសាងសង់នាពេលនេះ ។
ក្នុងឱកាសនោះ ឯកឧត្ដម ឃួង ស្រេង អភិបាលរាជធានីភ្នំពេញ បានមានប្រសាសន៍ថា៖ ក្នុងនាមរដ្ឋបាលរាជធានី និងក្នុងនាមប្រជាពលរដ្ឋនៅរាជធានីភ្នំពេញ សូមថ្លែងនូវការអរគុណយ៉ាងជ្រាលជ្រៅចំពោះក្រុមហ៊ុនខ្មែរ ប៊ែវើរីជីស និងក្រុមហ៊ុន ជីបម៉ុង ដែលបានជួយសាងសង់អគារសិក្សាដ៏ប្រណិតខាងលើនេះ។ នេះជាការចូលរួមចំណែកដ៏សំខាន់បំផុតលើវិស័យអប់រំ ក្នុងការបណ្តុះបណ្តាលធនធានមនុស្ស ដែលជាទំពាំងស្នងឬស្សី សម្រាប់ប្រទេសជាតិយើង ។
ជាមួយគ្នានោះ អ្នកឧកញ៉ា លាង ម៉េង សហស្ថាបនិកក្រុមហ៊ុន ខ្មែរ ប៊ែវើរីជីស ក៏បានសង្កត់ធ្ងន់លើសារៈសំខាន់នៃវិស័យអប់រំ ព្រោះចំណេះវិជ្ជា គឺជាធនធានមួយដែលចាយមិនអស់។ ជាផ្នែកមួយនៃវិស័យឯកជន ដែលលូតលាស់នៅក្នុងសង្គមខ្មែរ ការចូលរួមឧបត្ថម្ភកសាងហេដ្ឋារចនាសម្ព័ន្ធសង្គមនៅបឋមសិក្សាព្រៃសនេះ គឺជាចំណែកមួយដែលជំរុញការបណ្តុះធនធាននៅក្នុងសង្គមឱ្យបានពេញលេញ សម្រាប់ពេលអនាគត ៕ អត្ថបទសហការ
ចែករំលែកព័តមាននេះ