ខេត្តមណ្ឌលគិរី ៖ យុវជនចំនួន៣នាក់ត្រូវសមត្ថកិច្ចចម្រុះក្នុងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសហការជាមួយប៉ូលិសក្រុងស្រាវជ្រាវក្របួចក្នុងបន្ទប់ជួលមួយស្ថិតនៅភូមិចំបក់ សង្កាត់ស្ពានមានជ័យ ក្រុងសែនមនោរម្យកាលពីវេលាម៉ោង៣ និង១០នាទីរសៀលថ្ងៃទី១៩ កក្កដា ។
បើតាមការឱ្យដឹងពីលោកសូរ សុវណ្ណ ស្នងការរងទទួលបន្ទុកការិយាល័យកណ្តាលយុត្តិធម៌ថា ក្រុមយុវជនទាំង៣នាក់នេះ កម្លាំងរបស់លោកតាមដានអស់រយៈពេល៣ថ្ងៃមកហើយ តាំងពីនៅស្រុកកែវ សីមា ។ ជនសង្ស័យដែលត្រូវឃាត់ខ្លួនរួមទាំងវត្ថុតាងមួយចំនួនផងនោះ ១-ឈ្មោះសំ អឿន ភេទប្រុស អាយុ២០ឆ្នាំ ២-ឈ្មោះសំ សែន ភេទប្រុស អាយុ១៩ឆ្នាំ និង៣-ឈ្មោះហេង ឡាយ ភេទប្រុស អាយុ១៩ឆ្នាំ អ្នកទាំងអស់គ្នាមានស្រុកកំណើតនៅភូមិអូរអាម ឃុំស្រែក្ទម្ព ស្រុកកែវសីមា ។
លោកវរសេនីយ៍ត្រីឡេវ ប៉ុន នាយរងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តប្រាប់ថា វត្ថុតាងដែលសមត្ថកិច្ចរឹបអូសបានពីក្នុងបន្ទប់ចែកចាយរបស់ជនសង្ស័យទាំងនោះមានម៉ាទឹកកកចំនួន១កញ្ចប់ តូច មេតំហ្វេតាមីនចំនួន១៨០គ្រាប់ និងឧបករណ៍ជក់មួយចំនួនទៀត រីឯវត្ថុតាងក្រៅពីនេះទៀតសមត្ថកិច្ចដកហូតប្រាក់ចំនួន១៧០ដុល្លារ និង២០ម៉ឺនរៀល និងម៉ូតូ១គ្រឿង ។ នៅថ្ងៃដដែលនេះ សមត្ថកិច្ចបញ្ជូនជនសង្ស័យទៅកាន់ស្នងការដ្ឋាននគរបាលខេត្ត ដើម្បីចាត់ការបន្ត ៕
ចែករំលែកព័តមាននេះ