រាជធានីភ្នំពេញ ៖ តារាចម្រៀងអ្នកនាង សុភ័ក្ត្រ កុសុម៉ា បានស្នើសុំដល់បណ្តាភ្ញៀវមួយចំនួនដែលចូលរួមក្នុងកម្មវិធីមង្គលការ ឬកំសាន្តនានា សូមអោយតម្លៃដល់ក្រុមការងាររៀបចំតន្ត្រីផង ដ្បិតពួកគេទាំងអស់ គឺជាអ្នកធ្វើការតាមជំនាញ…
រាជធានីភ្នំពេញ ៖ តារាចម្រៀងអ្នកនាង សុភ័ក្ត្រ កុសុម៉ា បានស្នើសុំដល់បណ្តាភ្ញៀវមួយចំនួនដែលចូលរួមក្នុងកម្មវិធីមង្គលការ ឬកំសាន្តនានា សូមអោយតម្លៃដល់ក្រុមការងាររៀបចំតន្ត្រីផង ដ្បិតពួកគេទាំងអស់ គឺជាអ្នកធ្វើការតាមជំនាញ ដើម្បីឲ្យកម្មវិធីប្រព្រឹត្តទៅដោយបរិយាកាសសប្បាយរីករាយ ។
ការស្នើសុំពីតារាស្រីរូបនេះបានធ្វើឡើង បន្ទាប់ពីនាងបានមើលវីដេអូឃ្លីបមួយដែលបានបង្ហោះលើបណ្តាញសង្គមដោយបង្ហាញពីសកម្មភាពបុរសជាភ្ញៀវមួយរូបបានឡើងទៅរាំនៅលើឆាកក្នុងស្ថានភាពស្រវឹងជាមួយនឹងកាយវិកាប៉ះពាល់ទៅកាន់នារីអ្នកចម្រៀងដែលកំពុងច្រៀង ។
សកម្មភាពមួយនេះ បានធ្វើឲ្យតារាចម្រៀងស្រីរូបនេះបង្ហាញអារម្មណ៍មិនសប្បាយចិត្តជាខ្លាំង ខណៈពេលដែលសកម្មភាពនេះ ក៏បានផ្ទុះការរិះគន់ពីមហាជន ជាពិសេស អ្នកដឹកនាំក្រុមតន្ត្រីនានាផងដែរ ។
អ្នករិះគន់បានប្រើប្រាស់ពាក្យសម្តីមិនសំចៃមាត់ថា ស្រវឹងចេញចរិតថោក ម៉ាអាថោក មើលងាយគេអ្នកចម្រៀងម៉េសហា ប៉ះគេស្លូតមិនអី ប៉ះចំអញក្បាលម៉ាមេក្រូហើយធាក់ធ្លាក់ពីលើឆាកនឹងម៉ង ហើយប្ដឹងពីបទបំពានមើលងាយទៀតហែង ។
យ៉ាងណា បើទោះបីជាវីដូឃ្លីបខាងលើនេះ មិនមែនកើតឡើងនៅស្រុកខ្មែរក៏ដោយ ប៉ុន្តែសម្រាប់ សុភ័ក្ត្រ កុសុម៉ា ក៏បានបង្ហាញអារម្មណ៍មិនសប្បាយចិត្ត និងមិនគាំទ្រនូវទង្វើបែបនេះឡើយ ក្នុងនាម នាងក៏ជាអ្នកដឹកនាំក្រុមតន្ត្រីសម្រាប់ប្រគំក្នុងកម្មវិធីនានាម្នាក់ផងដែរ ។
ជាមួយនឹងរូបភាពវីដេអូខាងលើនេះ តារាចម្រៀងអ្នកនាង សុភ័ក្ត្រ កុសុម៉ា បានភ្ជាប់ជាមួយនឹងសំណេរថា អ្នកខ្លះទៀត (មួយចំនួនតូច) មើលងាយអ្នករៀបសោន អ្នករៀបឆាក អ្នករៀបភ្លើងសាហាវ ហើយបើមកកុម្ម៉ង់បទចម្រៀងពីតន្ត្រីករវិញ ហៅសុទ្ធតែ ហ្អែងៗដាច់ៗសាច់ អានេះ អានោះ មើលងាយគេ ។
នាងថា ឆ្ងល់ដែរម្ចាស់កម្មវិធីអ្នកហៅទេ តែលោកភ្ញៀវខ្លះវិញឈ្លើយណាស់ដូចគេមកស៊ីឈ្នួលពួកគាត់ សុំសំណូមពរ ការងារណាក៏គេមានតម្លៃរបស់គេ យើងគោរពគេ គេគោរពយើង ចង់អោយកម្មវិធីរលូន កម្មវិធីសប្បាយ សូមគោរពតាមជំនាញរបស់គេ បើអ្នកផ្តល់តម្លៃមកគេ ធានាគេមិនធ្វើអោយកម្មវិធីលោកអ្នកខកបំណងទេ ។
នាងបញ្ជាក់ថា អ្នកណាខ្ញុំមិនដឹងទេ បើក្រុមការងារខ្ញុំអត់ខុស ខ្ញុំមិនអោយអ្នកណាមកមើលងាយក្រុមការងារខ្ញុំទេ ព្រោះក្រុមការងាររបស់ខ្ញុំពួកគាត់ច្បាស់លាស់ណាស់ ៕
ចែករំលែកព័តមាននេះ