ខេត្តកំពង់ស្ពឺ ៖ លោកនាយប៉ុស្តិ៍នគរបាលរដ្ឋបាលឃុំពោធិ៍អង្គ្រង បានត្រូវសាច់ញាតិក្រុមគ្រួសារយុវជនរងគ្រោះចោទថា យកកាំភ្លើងបាញ់យុវជនម្នាក់ចំដើមទ្រូងបណ្តាលឱ្យស្លាប់ ពេលត្រឡប់មកពីទិញទឹកកកវិញ ។ ទោះបីជាបែបណា សមត្ថកិច្ចឆ្លើយតបថា ពេលដែលលោកនាយប៉ុស្តិ៍ដឹកនាំកងកម្លាំងល្បាតក្នុងមូលដ្ឋាន…
ខេត្តកំពង់ស្ពឺ ៖ លោកនាយប៉ុស្តិ៍នគរបាលរដ្ឋបាលឃុំពោធិ៍អង្គ្រង បានត្រូវសាច់ញាតិក្រុម
គ្រួសារយុវជនរងគ្រោះចោទថា យកកាំភ្លើងបាញ់យុវជនម្នាក់ចំដើមទ្រូងបណ្តាលឱ្យស្លាប់ ពេលត្រឡប់មកពីទិញទឹកកកវិញ ។
ទោះបីជាបែបណា សមត្ថកិច្ចឆ្លើយតបថា ពេលដែលលោកនាយប៉ុស្តិ៍ដឹកនាំកងកម្លាំងល្បាតក្នុងមូលដ្ឋាន ក៏បានជួបយុវជនរងគ្រោះ។ ដោយចាត់ទុកថាជាជនសង្ស័យ ក៏ហៅឱ្យឈប់ ប៉ុន្តែជនរងគ្រោះមិនឈប់ ក៏ជិះម៉ូតូបុកនាយប៉ុស្តិ៍ដែលស្ទុះមកឃាត់ ប៉ះកាំភ្លើងរៀលកៃផ្ទុះ១គ្រាប់បណ្តាលឱ្យស្លាប់ ។
បាតុភាពនេះបានផ្ទុះឡើងពេញបណ្ដាញសង្គម ដោយមានការចោទប្រកាន់ខ្លាំងៗលើនាយប៉ុស្តិ៍នគរបាលឃុំពោធិ៍អង្គ្រង ថាផ្ទុះកាំភ្លើងអាកា១គ្រាប់ចំជនរងគ្រោះម្នាក់ស្លាប់ភ្លាមនៅនឹងកន្លែង ។ ករណីខាងលើ កើតឡើងកាលពីវេលាម៉ោងប្រមាណ១០និង១០នាទីយប់ថ្ងៃទី៣ ខែតុលាឆ្នាំ២០២៥កន្លងទៅ នៅតាមផ្លូវបេតុង ក្នុងភូមិគ្រញូង ឃុំពោធិ៍អង្គ្រង ស្រុកបសេដ្ឋ ។
បើតាមប្រភពព័ត៌មានពីសាច់ញាតិយុវជនរងគ្រោះនិយាយថា មានករណីផ្ទុះអាវុធបណ្តាលឲ្យស្លាប់ជនរងគ្រោះឈ្មោះ ផា រ៉ាយុ ភេទប្រុស អាយុ១៧ឆ្នាំ ជាសិស្សរៀននៅថ្នាក់ទី១០ រស់នៅក្នុងភូមិព្រៃស្រូល ឃុំពោធិ៍អង្គ្រង ស្រុកបសេដ្ឋ ។ នៅមុនពេលកើតហេតុ ផា រ៉ាយុ បានជិះម៉ូតូឌុបមិត្តភក្តិទៅទិញទឹកកក ដើម្បីយកមកហូបជួបជុំមិត្តភក្តិបងប្អូន ។ លុះពេលត្រឡប់មកវិញ ដោយសារយប់ងងឹតផងនោះ ឃើញមានមនុស្ស៣ទៅ៤នាក់នៅឈរចំពីមុខពួកគេ ស្រែកឱ្យឈប់ម៉ូតូ ពួកគេភ័យ ក៏បត់ម៉ូតូត្រឡប់ថយក្រោយវិញ ។
ពេលនោះ បានជួបនឹងបុរសម្នាក់ដែលគេស្គាល់ថា ជាលោកនាយប៉ុស្តិ៍នគរបាលរដ្ឋបាលឃុំពោធិ៍អង្គ្រង បានបាញ់ទៅលើយុវជន ផា រ៉ាយុ ចំដើមទ្រូង ហើយយុវជនរងគ្រោះបានស្រែកថា រូបគេត្រូវ១គ្រាប់ចំដើមទ្រូងហើយ និងបន្ថែមល្បឿនម៉ូតូរត់ ក៏ធ្លាក់ចូលទៅក្នុងប្រឡាយស្លាប់ភ្លាមតែម្តង ។
តាមប្រភពដដែលនេះបន្តថា ក្រោយកើតហេតុ ក្រុមលោកនាយប៉ុស្តិ៍បានរត់គេចចេញពីកន្លែងកើតហេតុបាត់អស់ទៅ ឯសាច់ញាតិក្រុមគ្រួសារបាននាំគ្នារត់ទៅលើកសពយុវជនរងគ្រោះយកមកដាក់នៅផ្ទះ និងដាក់ពាក្យបណ្តឹងភ្លាមៗ ដើម្បីឱ្យសមត្ថកិច្ច និងជំនាញពាក់ព័ន្ធ ជួយរកយុត្តិធម៌ឱ្យយុវជនរងគ្រោះជាកូនផងដែរ ។
ពាក់ព័ន្ធនឹងករណីខាងលើនេះ លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្ត បានប្រាប់អ្នកយកព័ត៌មានតាមទូរស័ព្ទថា មុនពេលកើតហេតុ កម្លាំងនគរបាលប៉ុស្តិ៍ឃុំពោធិ៍អង្គ្រងចំនួន៥នាក់ ដែលដឹកនាំដោយលោក ទ្រី បូរិន អាយុ៣៨ឆ្នាំ ជានាយប៉ុស្តិ៍ បានចេញល្បាតក្នុងមូលដ្ឋាន ។ ខណ:នោះ មានមុខសញ្ញាសង្ស័យ២នាក់ជិះម៉ូតូ១គ្រឿងក៏ហៅឲ្យឈប់ដើម្បីពិនិត្យ ប៉ុន្តែពួកគេមិនព្រមឈប់ និងបានបត់ត្រឡប់ក្រោយប៉ះនឹងលោក ទ្រី បូរិន ជានាយប៉ុស្តិ៍ បណ្តាលឲ្យរៀលកៃកាំភ្លើងអាកា១គ្រាប់ ត្រូវចំទ្រូងឆ្វេងឈ្មោះ ផា រ៉ាយុ បណ្តាលឲ្យស្លាប់ ។
ក្រោយកើតហេតុ លោក ទ្រី បូរិន បានយកកាំភ្លើងនិងប្រគល់ខ្លួនជូនលោកអធិការនគរបាលស្រុកបសេដ្ឋ ដើម្បីអនុវត្តតាមនីតិវិធី ។លោក ទ្រី បូរិន និយាយថា នៅពេលមានហេតុការណ៍កើតឡើង ដោយឃើញក្មេងជិះម៉ូតូត្រឡប់ក្រោយ គាត់បានលើកកាំភ្លើងឡើងលើ ដើម្បីគំរាមឲ្យក្រុមក្មេងនេះឈប់ម៉ូតូ តែបណ្តាលឲ្យរៀលកៃផ្ទុះ១គ្រាប់ ត្រូវជនរងគ្រោះតែម្តង ។
លោក ឃឹម សុកខៃ ស្នងការនគរបាលខេត្ត និយាយថា នេះគ្រាន់តែជាការសួរនាំព័ត៌មានបឋមនោះទេ ឥឡូវនាយប៉ុស្តិ៍នគរបាលរូបនេះ ត្រូវបានឃាត់ខ្លួនហើយ ។ លោកកំពុងសួរនាំបន្ថែមទៀត ដើម្បីឱ្យបានដឹងព័ត៌មានច្បាស់លាស់ ។ យោងតាមសេចក្តីបំភ្លឺព័ត៌មានរបស់ស្នងការដ្ឋាននគបាលខេត្ត បានឱ្យដឹងថា លោកអនុសេនីយ៍ឯក ទ្រី បូរិន នាយប៉ុស្តិ៍នគរបាលរដ្ឋបាល
ឃុំពោធិ៍អង្គ្រង ត្រូវបាននាំខ្លួនមកដល់ស្នងការដ្ឋាននគរបាលខេត្តហើយ ដើម្បីអនុវត្តនីតិវិធី សាកសួរ និងស្នើសុំគោលការណ៍ថ្នាក់នាំចាត់ការតាមផ្លូវច្បាប់ ចំពោះសកម្មភាពដែលបានបង្កឱ្យជនរងគ្រោះបាត់បង់ជីវិត ។
ស្នងការដ្ឋាននគរបាលខេត្ត សូមបញ្ជាក់ជូនសាធារណជនមេត្តាជ្រាបថា ចំពោះករណីនេះ ស្នងការដ្ឋាននគរបាលខេត្ត នឹងធ្វើការដោយយុត្តិធម៌ និងធានាផ្តល់ការជឿជាក់ដល់ក្រុមគ្រួសារជនរងគ្រោះ ៕
ចែករំលែកព័តមាននេះ