ខេត្តកំពង់ចាម ៖ ក្រោយឱកាសភ្ជុំបិណ្ឌទឹកទន្លេមេគង្គ បែរជាហក់ឡើងធ្វើឱ្យព្រែកបឹងបួរត្រូវទឹកហូរចូលព្រែកចំនួន៤១នៅស្រុកស្ទឹងត្រង់ កំពង់សៀមកោះសូទិន កងមាស និងស្រីសន្ធរ ខណៈទឹកឡើងដល់កម្ពស់១៤,៤០ម៉ែត្រ គិតត្រឹមព្រឹកថ្ងៃទី២ តុលា…
ខេត្តកំពង់ចាម ៖ ក្រោយឱកាសភ្ជុំបិណ្ឌទឹកទន្លេមេគង្គ បែរជាហក់ឡើងធ្វើឱ្យព្រែកបឹងបួរត្រូវទឹកហូរចូលព្រែកចំនួន៤១នៅស្រុកស្ទឹងត្រង់ កំពង់សៀមកោះសូទិន កងមាស និងស្រីសន្ធរ ខណៈទឹកឡើងដល់កម្ពស់១៤,៤០ម៉ែត្រ គិតត្រឹមព្រឹកថ្ងៃទី២ តុលា ឆ្នាំ២០២៥ គឺទឹកបានហក់ឡើង០,១៤ម៉ែត្រ ជាមួយនោះលំនៅឋានរបស់ពលរដ្ឋតាមដងទន្លេ ក៏ត្រូវទឹកហូរចូលលិចផ្លូវ ។
ជាក់ស្ដែងពលរដ្ឋនៅកោះដាច់ចំនួន៣០គ្រួសាររួមទាំងគោ៨០ក្បាល នៅឃុំកោះសំរោង គឺបានស្នើសុំឲ្យអាជ្ញាធរជួយជម្លៀសមកកាន់ទីទួលសុវត្ថិភាពនៅបល្ល័ង្គ ក្នុងស្រុកកំពង់សៀម ។ ដោយឡែក ឯកឧត្តមអ៊ុន ចាន់ដា អភិបាលខេត្ត ក៏បានអញ្ជើញចុះពិនិត្យផ្ទាល់ទឹកទន្លេម្ដុំក្រោមស្ពានគីហ្សុណា ក្រុងកំពង់ចាម ដោយណែនាំឱ្យអភិបាលស្រុកជាប់ដងទន្លេ ត្រូវបង្កើនតាមដានមើលពលរដ្ឋជាប្រចាំ ដើម្បីត្រៀមជួយពួកគាត់ដោយប្រការណាមួយ ។
លោកសន សុខ មេឃុំកោះសំរោងមានប្រសាសន៍ឲ្យដឹងថា ដោយសារភូមិសាស្ត្រកោះសំរោងហ៊ុមព័ទ្ធទៅដោយទឹកទន្លេមេគង្គ មានប្រជាពលរដ្ឋរស់នៅរាប់រយគ្រួសារភាគច្រើន៨៦% ជាកសិករដាំដុះដំណាំកសិកម្ម និងកសិឧស្សាហកម្ម ដើម្បីទ្រទ្រង់ជីវភាពគ្រួសារ ។ ចំពោះទឹកទន្លេបានឡើងមកលើកទីមួយធ្វើឲ្យលិចដំណាំពោតសរុបជាង៣០០ហិកតាក្នុងអំឡុងខែសីហាឆ្នាំ២០២៥ ដំបូងមានការព្រួយបារម្ភ តែទឹកទន្លេបានឆាប់ស្រកទៅវិញដោយធ្វើឲ្យដំណាំពោតខូចខាតប្រមាណ១០% ប៉ុណ្ណោះ ។
លោកមេឃុំកោះសំរោងមានប្រសាសន៍បន្តឲ្យដឹងទៀតថា ក្រោយពីរដូវបិណ្ឌភ្ជុំបិណ្ឌទឹកទន្លេបានហក់ឡើងជាថ្មី ដោយនៅឆ្នាំនេះថ្នាំជក់កសិករផលិតបានលក់មួយគីឡូតម្លៃ៧០០០រៀលឆ្នាំ ។ ឆ្នាំ២០២៤កន្លងទៅ១គីឡូ លក់បាន១១០០០រៀល គ្រាហ៍នោះដោយសារដំណាំថ្នាំជួបនិងជំងឺផង ។ ក្នុងនាមមេឃុំកោះសំរោង បានឲ្យលោកមេភូមិនីមួយៗធ្វើការតាមដានកម្ពស់ទឹកទន្លេជាប់ជាប្រចាំមកដល់ពេលនេះ មិនទាន់មានលំនៅឋានរបស់ពលរដ្ឋណាមួយត្រូវបានបិទទ្វារ ហើយចល័តទៅកាន់ទីទួលសុវត្ថិភាពឡើយ។
ព័ត៌មានបន្ថែមមានផ្សាយជូនលើកាសែតកោះសន្តិភាព។
ចែករំលែកព័តមាននេះ