តារាចម្រៀងលោក លីម តិចម៉េង បានទម្លាយពីរឿងកូនទាហានជួរមុខមួយរូបដែលជាអ្នកគាំទ្រ ធ្លាប់បានផ្តែផ្តាំនូវពាក្យសម្តីយ៉ាងចាក់ដោតតាមរយៈលោក បន្ទាប់ពីអ្នកគាំទ្ររូបនោះត្រូវបានបញ្ជូនទៅកាន់គោលដៅតំបន់ប្រាសាទព្រះវិហារក្នុងជម្លោះតាមបន្ទាត់ព្រំដែនរវាងកម្ពុជា និងថៃ ។រឿងរ៉ាវនេះ ត្រូវបានលោក លីម…
តារាចម្រៀងលោក លីម តិចម៉េង បានទម្លាយពីរឿងកូនទាហានជួរមុខមួយរូបដែលជាអ្នកគាំទ្រ ធ្លាប់បានផ្តែផ្តាំនូវពាក្យសម្តីយ៉ាងចាក់ដោតតាមរយៈលោក បន្ទាប់ពីអ្នកគាំទ្ររូបនោះត្រូវបានបញ្ជូនទៅកាន់គោលដៅតំបន់ប្រាសាទព្រះវិហារក្នុងជម្លោះតាមបន្ទាត់ព្រំដែនរវាងកម្ពុជា និងថៃ ។
រឿងរ៉ាវនេះ ត្រូវបានលោក លីម តិចម៉េង បានបញ្ជាក់ថា លោកបានលាក់ទុកជាង១០ថ្ងៃដោយមិនហ៊ានបញ្ចេញឡើយ ប៉ុន្តែដោយសារលោកហាក់ពិបាកទ្រាំ និងកោតសរសើរនូវីរៈភាពដ៏អង់អាចក្លាហានរបស់ទាហានខ្មែរនៅក្នុងការការពារដីរបស់ខ្លួន ។
តាមរយៈសំណេរដែលបានបង្ហោះលើបណ្តាញសង្គម តារាចម្រៀងលោក លីម តិចម៉េង បានលើកឡើងថា រឿងពិតជួបផ្ទាល់លាក់ទុកជាង10ថ្ងៃហើយពិបាកទ្រាំណាស់ មានកូនទាហានជួរមុខម្នាក់ការពារតំបន់ប្រាសាទព្រះវិហារ គាត់ជាហ្វេនខ្ញុំតាំងពីពេលប្រឡងមានទាំងរូបថតជាមួយខ្ញុំថតនៅផ្សារ K-Mall កាលឆ្នាំ 2022 ទៀត គ្រាន់តែឃើញខ្ញុំទៅដល់គាត់សប្បាយចិត្តរត់មកមុនគេអោយទូរស័ព្ទគាត់មកខ្ញុំ ដើម្បីមើលរូបថតកាលឆ្នាំ 2022នោះ ។
លោកបន្តថា គាត់អរគុណពួកយើងទាំងអស់គ្នា ហើយផ្តាំខ្ញុំថា បើគាត់មិនអាចត្រឡប់មកវិញទេ សូមជួយប្រាប់បងប្អូនយើងទាំងអស់គ្នាផងថា «ជួយគ្នាការពារជាតិមាតុភូមិនេះផង គាត់គ្រាន់តែសម្រាកយកកម្លាំងបន្តិចប៉ុណ្ណោះ» ។ លោកបញ្ជាក់ថា បងប្អូនដឹងទេ គ្មានកូនទាហាន ឬមេទាហានខ្មែរណាម្នាក់ភ័យខ្លាចនោះទេ ពួកគាត់នៅជាមួយគ្នាស្ទើរតែ២៤ម៉ោង ខោអាវ ៥ ៦ ថ្ងៃមិនហ៊ានដោះទេ គឺត្រៀមខ្លួនគ្រប់ពេល រូបភាពទាំងនោះដក់ជាប់ខួរក្បាល ពាក្យសំដីពួកគាត់ចាក់ចូលបេះដូង ឈឺចាប់តែមិនអាចចុះចាញ់បាត់បង់បានឡើយ ។
លោកបន្ថែមថា មកទល់ពេលនេះ រូបភាពនិងសម្លេងទាំងនោះ នៅតែដក់ជាប់ក្នុងខួរខ្ញុំស្ទើរតែ២៤ម៉ោងទៅហើយ សង្ឃឹមថា បងប្អូនអាចអានយល់ពីឆន្ទៈពួកគាត់ ខ្ញុំមិនអាចធ្វើវីដេអូបានទេ ទី១ខ្ញុំកំពុងឈឺខ្លាំងដែរ ទី២បើខ្ញុំធ្វើវីដេអូច្បាស់ជាយំ ខ្ញុំមិនចង់យំ ដូច្នេះហើយទើបខ្ញុំសម្រេចថា សរសេរ Status នេះ ព្រោះមិនចង់លាក់អារម្មណ៍ទេ វាឈឺពេក ។ ក្រោយឃើញការបង្ហោះសំណេរខាងលើ ពីលោក លីម តិចម៉េង នាពេលនេះ គេឃើញមហាជន និងអ្នកគាំទ្ររូបលោកជាច្រើនរូបបានចូលទៅខមមិនដោយម្នាក់សម្តែងក្តីក្តុកក្តុក នៅពេលដឹងពីពាក្យសម្តីដ៏អង់អាចក្លាហានរបស់កងទ័ពកម្ពុជា ។
ពួកគេលើកឡើងថា ពេលបានឃើញសំណេរនេះកាន់តែដឹងច្បាស់ពីឆន្ទៈស្នេហាជាតិរបស់កងកម្លាំងការពារព្រំដែនទាំងអស់ ដូចនេះ បងប្អូនប្រជាជនខ្មែរយើងទាំងអស់ត្រូវចេះរួបរួម សាមគ្គី ស្រលាញ់ ការពារគ្នា ក្នុងនាមជាឈាមជ័រតែមួយ និងជាតិសាសន៍តែមួយ ។ ជាការកត់សម្គាល់ តារាចម្រៀងលោក លីម តិចម៉េង ក៏ជាដូចអ្នកសិល្បៈជាច្រើនទៀតតែងតែបង្ហាញសកម្មភាពនានាមិនថា ជាសកម្មភាពមនុស្សធម៌ ឬជាការផ្តល់ជាសម្លេង ដើម្បីចូលរួមជាមួយរាជរដ្ឋាភិបាលកម្ពុជា ក៏ដូចជាលើកទឹកចិត្តកងទ័ពជួរមុខដែលកំពុងច្បាំងការពារទឹកដីពីការឈ្លានពានពីប្រទេសថៃ ។
តារាចម្រៀងរូបនេះធ្លាប់បានលើកឡើងតាមរយៈសំណេរបង្ហោះលើបណ្តាញសង្គមថា ពួកយើងកងទ័ពជួរមុខ យើងមិនបានសម្រាកទេ ព្រោះតែមិនអាចប្រហែសបានចំពោះការឈ្លានពានម្តងទៀត ភ្នែកមិនហ៊ានបិទ ដៃមិនហ៊ានចោលអាវុធ បងប្អូននៅខាងក្រោយបារម្ភពីសុខសុវត្ថិភាពទាំងយប់ទាំងថ្ងៃ នេះហើយស្ថានការណ៍ពួកយើង តែចោរឈ្លានពានយើងវិញ មានពេលសម្រាក មានពេលរៀបចំល្បិច មានពេលប្រមាថតាមចិត្តមកកាន់ប្រទេសយើង ព្រោះពួកគេដឹងថា ពួកយើង ប្រទេសយើងមិនឈ្លានពានពួកគេនោះទេ បងប្អូនយើងទ្រាំណាពេលនេះ បងប្អូនប្រជាជនថ្នាក់ដឹកនាំ ប្រទេសយើងនេះទាំងមូលត្រូវគេប្រមាថយ៉ាងធ្ងន់ធ្ងរហើយ ៕
ចែករំលែកព័តមាននេះ