រាជធានីភ្នំពេញ ៖ ប្រធានសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន បានធ្វើការប្តេជ្ញាចិត្តនឹងខិតខំឱ្យកាន់តែខ្លាំងបន្ថែមលើគ្រឹះការងារ ដែលបានខិតខំកសាងមួយឆ្នាំមកនេះ ដោយព្យាយាមជំរុញសកម្មភាពសិល្បៈឱ្យកាន់តែច្រើនលើគ្រប់វិស័យ ទាំងវិស័យចម្រៀង…
រាជធានីភ្នំពេញ ៖ ប្រធានសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន បានធ្វើការប្តេជ្ញាចិត្តនឹងខិតខំឱ្យកាន់តែខ្លាំងបន្ថែមលើគ្រឹះការងារ ដែលបានខិតខំកសាងមួយឆ្នាំមកនេះ ដោយព្យាយាមជំរុញសកម្មភាពសិល្បៈឱ្យកាន់តែច្រើនលើគ្រប់វិស័យ ទាំងវិស័យចម្រៀង ភាពយន្ត សម្តែង ដើរម៉ូដ និងពិសេស សិល្បៈបុរាណ ។
ក្នុងនោះ លោកជំទាវប្រធាន ក៏បានសន្យានឹងព្យាយាមស្វែងរកនូវអ្វីដែលជាផលប្រយោជន៍ឱ្យកាន់តែច្រើនបន្ថែមទៀតជូនដល់សិល្បករ-សិល្បការិនី ពិសេស រៀមច្បងដែលមានអាយុកាន់តែច្រើន និងបាត់បង់សមត្ថភាពសម្តែង ។
ការលើកឡើងពីលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរបានធ្វើឡើង កាលពីថ្ងៃទី២០ ឧសភា ឆ្នាំ២០២៥ នៅក្នុងជំនួបពិភាក្សាដាច់ដោយឡែកមួយជាមួយនឹងសមាជិកសកម្មរបស់សមាគមសិល្បករខ្មែរ ក្នុងគោលបំណងជុំវិញដំណើរវិវត្តន៍ការងាររយៈពេល១ឆ្នាំមកនេះ ដែលពួកគាត់បានចូលរួមយ៉ាងសកម្មគ្រប់សកម្មភាពដោយស្ម័គ្រចិត្តដើម្បីប្រយោជន៍រួមក្នុងវិស័យសិល្បៈវប្បធម៌ ។
ក្នុងជំនួបនោះ លោកជំទាវអ្នកឧកញ៉ា ម៉ៅ ចំណាន គិតម៉េង បានមានប្រសាសន៍ថា «រយៈពេលមួយឆ្នាំហើយ ដែលបងប្អូនសមាជិកសកម្មភាគច្រើនបានចូលរួមយ៉ាងសកម្មភាពជាមួយនឹងសមាគមសិល្បករខ្មែរ នៅក្នុងអាណត្តិទី៦ ដែលដឹកនាំដោយនាងខ្ញុំផ្ទាល់ ។ ថ្វីដ្បិតថា យើងមានសកម្មភាពច្រើន និងបានជួបគ្នាច្រើន ប៉ុន្តែខ្ញុំដឹងយ៉ាងច្បាស់ថា យើងមិនមានពេលបានជជែកគ្នា និងស្វែងយល់ពីគ្នាច្រើននោះទេ ។ ដូច្នេះ ការជួបគ្នានៅថ្ងៃនេះអាចនិយាយបានថា ជាពេលវេលាដ៏ពិសេសមួយ ដែលយើងអាចមានពេលជជែកគ្នា ផ្តល់យោបល់កែតម្រូវគ្នាដោយផ្ទាល់ ឬក៏មានរឿងក្នុងចិត្តអ្វីចង់និយាយ អាចនិយាយដោយបើកចំហ» ។
ក្នុងនាមប្រធានសមាគមសិល្បករខ្មែរ អ្នកឧកញ៉ា ម៉ៅ ចំណាន បានបញ្ជាក់ថា លោកជំទាវនឹងខិតខំឱ្យខ្លាំងបន្ថែមលើគ្រឹះការងារដែលបានខិតខំកសាងមួយឆ្នាំមកនេះ ហើយព្យាយាមជំរុញសកម្មភាពសិល្បៈឱ្យកាន់តែច្រើនលើគ្រប់វិស័យ ទាំងវិស័យចម្រៀង ភាពយន្ត សម្តែង ដើរម៉ូដ និងពិសេស សិល្បៈបុរាណ ។ ក្នុងនោះ ក៏ព្យាយាមស្វែងរកនូវអ្វីដែលជាផលប្រយោជន៍ឱ្យកាន់តែច្រើនបន្ថែមទៀត ជូនដល់សិល្បករសិល្បការិនី ពិសេស រៀមច្បងដែលមានអាយុកាន់តែច្រើន ។
ដោយឡែក នៅក្នុងឱកាសជំនួបនោះផងដែរ សិល្បករដែលជាសមាជិកសកម្មក៏បានសម្តែងការសប្បាយចិត្ត និងប្តេជ្ញាចូលរួមគ្រប់សកម្មភាពរបស់សមាគមសិល្បករខ្មែរ ដោយពួកគាត់គិតថា ការជួយសមាគមសិល្បករខ្មែរ ជាការជួយលើកតម្កើងសិល្បៈវប្បធម៌ទាំងមូល និងជាការជួយដល់អាជីពសិល្បៈពួកគាត់ផ្ទាល់ផងដែរ ៕
ចែករំលែកព័តមាននេះ