ពួកឧទ្ទាមលីប៊ីកាលពីថ្ងៃទី៣ កក្កដា កន្លងមក បានច្រានចោលផែនការសន្តិភាព ដែលសម្របសម្រួលដោយសហភាពអាហ្វ្រិក ដើម្បីបញ្ចប់ជម្លោះដែលកំពុងកើតឡើងនៅលីប៊ី ក្នុងតំបន់អាហ្វ្រិកខាងជើង ដោយអះអាងថា គ្មានដំណោះស្រាយណាមួយឡើយ ដរាបណាលោកកាដាហ្វី នៅតែមិនព្រមបោះបង់ចោលអំណាច។ អ្នកនាំពាក្យក្រុមប្រឹក្សាជាតិបណ្តោះអាសន្នលីប៊ី លោក Abdel Hafiz Ghoga និយាយក្នុងឱកាសសន្និសីទកាសែតមួយ ដែលរៀបចំឡើងក្នុងទីក្រុងបេនហ្គាហ្ស៊ីថា ផែនការរបស់សហភាពអាហ្វ្រិកមិនអាចទទួលយកបានឡើយ ព្រោះផែនការនេះមិនតម្រូវឱ្យលោកកាដាហ្វី លាលែងចេញពីតំណែង។
លោក Ghoga និយាយថា ក្រុមប្រឹក្សាជាតិបណ្តោះអាសន្នច្រានចោលរាល់សំណើទាំងអស់ដែលមិនរាប់បញ្ចូលទាំងការបោះបង់ចោលអំណាចរបស់លោកកាដាហ្វី ។
ក្រោយពីកិច្ចប្រជុំកំពូលលើកទី១៧ របស់ខ្លួន ដែលរៀបចំឡើងនៅក្នុងទីក្រុង Malabo រដ្ឋធានីហ្គីណេអេក្វាទ័រ កាលពីថ្ងៃទី២៨ មិថុនា កន្លងមក សហភាពអាហ្វ្រិកបានប្រគល់សំណើទៅឱ្យគណៈប្រតិភូនៃភាគីក្នុងជម្លោះទាំងពីររបស់លីប៊ី ដែលចូលរួមក្នុងសន្និសីទរបស់សហភាពអាហ្វ្រិក ដោយទទូចដល់ភាគីទាំងពីរ ឱ្យគោរពតាមផែនទីបង្ហាញផ្លូវរបស់សហភាពអាហ្វ្រិកបញ្ឈប់ការប្រយុទ្ធគ្នា ហើយចាប់ផ្តើមការចរចាជាបន្ទាន់។
ក្នុងផែនការសន្តិភាពរបស់ខ្លួននោះ សហភាពអាហ្វ្រិកបានលើកឡើងថា ក្របខណ្ឌពេលវេលាសម្រាប់ការចរចារវាងរដ្ឋាភិបាលលីប៊ី និងពួកឧទ្ទាមគួរតែត្រូវរៀបចំឡើងក្នុងរយៈពេល៣០ថ្ងៃ ដោយមានការសម្របសម្រួលពីសហគមន៍អន្តរជាតិ ។ សំណើក៏រាប់បញ្ចូលទាំងការអនុវត្តការហ៊ុមព័ទ្ធអាវុធនៅប្រទេសលីប៊ីរហូតដល់បញ្ចប់រយៈពេលបណ្តោះអាសន្ន ហើយអនុវត្តកំណែទម្រង់ចាំបាច់ដើម្បីឆ្លើយតបតាមការទាមទារស្របច្បាប់របស់ពលរដ្ឋលីប៊ី មានដូចជាការរៀបចំការបោះឆ្នោត ដែលត្រួតពិនិត្យដោយអន្តរជាតិ ។ ប៉ុន្តែទោះបីជាបែបណា ផែនការនោះមិនរាប់បញ្ចូលនូវការបោះបង់ចោលអំណាចរបស់លោកកាដាហ្វី ដែលជាលក្ខខណ្ឌជាមុនកំណត់ដោយក្រុមប្រឆាំង ដើម្បីសម្រេចបានបទឈប់បាញ់គ្នាមួយ ។
ជាមួយគ្នានេះ សហភាពអាហ្វ្រិកក៏បានទទូចដល់សហគមន៍អន្តរជាតិឱ្យដាក់ពង្រាយអ្នកសង្កេតការណ៍នៅប្រទេសលីប៊ី ហើយបង្កើតក្រុមប្រឹក្សាត្រួតពិនិត្យដែលមានប្រសិទ្ធភាព និងអាចជឿទុកចិត្តបាន ហើយបង្កើនជំនួយមនុស្សធម៌។ ប្រមុខឧទ្ទាមលីប៊ីថ្លែងប្រាប់ទីភ្នាក់ងារព័ត៌មានរ៉យទ័រថា លោកកាដាហ្វី នឹងត្រូវអនុញ្ញាតឱ្យរស់នៅក្នុងប្រទេសទៀត ដរាបណាលោកយល់ព្រមបោះបង់ចោលអំណាចទាំងអស់របស់លោក។ លោកកាដាហ្វី បានប្រឆាំងម្តងហើយម្តងទៀត ចំពោះការអំពាវនាវរបស់អន្តរជាតិឱ្យលោកបោះបង់ចោលអំណាច ហើយចាកចេញពីប្រទេសដោយលោកសច្ចាថា នឹងបន្តការប្រយុទ្ធរហូតដល់ជីវិតចុងក្រោយ។
ប្រមុខឧទ្ទាម លោក Mustafa Abdel Jalil ថ្លែងក្នុងបទសម្ភាសន៍មួយថា ជាដំណោះស្រាយដោយសន្តិវិធីយើង ប្រសិនបើលោកកាដាហ្វីអាចបោះបង់ចោលអំណាច ហើយបញ្ជាឱ្យកងទ័ពរបស់លោកដកចេញពី តំបន់នានាក្នុងប្រទេស លោកអាចមានសិទ្ធិសម្រេចថាតើលោកគួរតែរស់នៅក្នុងប្រទេសទៀតឬក៏រស់នៅក្រៅប្រទេស។ ប្រសិនបើលោកមានបំណងចង់រស់នៅក្នុងប្រទេសទៀត យើងនឹងរកកន្លែងសម្រាប់លោក ហើយការធ្វើដំណើររបស់លោកត្រូវស្ថិតក្រោមការគ្រប់គ្រងរបស់អន្តរជាតិ ៕
ចែករំលែកព័តមាននេះ