ប្រទេសវៀតណាម ៖ ទំហំពាណិជ្ជកម្មសរុបរបស់ប្រទេសវៀតណាមបានឈានដល់ ៧៧០,១៤ ពាន់លានដុល្លារអាមេរិក នៅក្នុងរយៈពេល៨ខែដំបូងនៃឆ្នាំ ២០២៦ ដែលកើនឡើង ២៨,៧% ធៀបនឹងរយៈពេលដូចគ្នាកាលពីឆ្នាំមុន និងជាកម្រិតខ្ពស់បំផុតមិនធ្លាប់មានពីមុន ដែលត្រូវបានកត់ត្រាសម្រាប់រយៈពេលនេះ។ នេះបើយោងតាមប្រភពពី Vietnam Express (VnExpress) ចេញផ្សាយកាលពីថ្ងៃទី៥ ខែកញ្ញា កន្លងទៅ។
យោងតាមទិន្នន័យចេញផ្សាយដោយការិយាល័យស្ថិតិជាតិរបស់វៀតណាម កាលពីថ្ងៃព្រហស្បតិ៍បានឱ្យដឹងថា ការនាំចេញបានកើនឡើង ២២,៤% បើធៀបនឹងរយៈពេលដូចគ្នា កាលពីឆ្នាំមុន ដល់ចំនួន ៣៧៤,៨៤ ពាន់លានដុល្លារ ខណៈដែលការនាំចូលបានកើនឡើង ៣៥,៣% ដល់ ៣៩៥,៣ ពាន់លានដុល្លារ បណ្តាលឱ្យមានឱនភាពពាណិជ្ជកម្ម (ការនាំចូលលើសការនាំចេញ) ចំនួន ២០,៤៦ ពាន់លានដុល្លារ។
ការនាំចេញសម្រេចបាន ៣៧៤,៨៤ ពាន់លានដុល្លារ កើនឡើង ២២,៤% ធៀបនឹងឆ្នាំមុន ដោយវិស័យក្នុងស្រុកមានទំហំ ៧៤,៤៧ ពាន់លានដុល្លារ ខណៈវិស័យវិនិយោគពីបរទេស (FDI) រួមចំណែកចំនួន ៣០០,៣៧ ពាន់លានដុល្លារ។
ដោយឡែក ការនាំចូលសរុបមានចំនួន ៣៩៥,៣ ពាន់លានដុល្លារ កើនឡើង ៣៥,៣% ធៀបនឹងឆ្នាំមុន ដោយក្នុងនោះវិស័យក្នុងស្រុកមានចំនួន ១០៥,០៧ ពាន់លានដុល្លារ កើនឡើង ២៣,៧%។ ចំណែកការវិនិយោគពីបរទេសមានចំនួន ២៩០,២៣ ពាន់លានដុល្លារ កើនឡើង ៤០,១%។
សហរដ្ឋអាមេរិកនៅតែជាទីផ្សារនាំចេញធំបំផុតរបស់ប្រទេសវៀតណាម ដោយមានទំហំទឹកប្រាក់ឈានដល់ ១២២ ពាន់លានដុល្លារ ស្របពេលប្រទេសចិន គឺជាទីផ្សារនាំចូលធំបំផុតដែលមានទំហំទឹកប្រាក់ចំនួន ១៦១,៩ ពាន់លានដុល្លារ៕
ចែករំលែកព័តមាននេះ