រាជធានីភ្នំពេញ ៖ នាយករដ្ឋមន្ត្រីបារាំង លោកហ្វ្រង់ស្វ័រ ហ្វីយ៉ុង បានគាំទ្របេក្ខភាពកម្ពុជាជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់ឆ្នាំ២០១២ និងសន្យាផ្តល់ផែនទីថតចម្លងស្តីពីបញ្ហាព្រំដែន និងផែនទីប្រាសាទព្រះវិហារដល់កម្ពុជា ។ ការសន្យាគាំទ្ររបស់លោកនាយករដ្ឋមន្ត្រីបារាំងនាពេលនេះ បានធ្វើឡើងនៅក្នុងជំនួបពិភាក្សាទ្វេភាគីជាមួយសម្តេចនាយករដ្ឋមន្ត្រី ហ៊ុន សែន កាលពីរសៀលថ្ងៃទី២ កក្កដា នៅវិមានសន្តិភាពទីស្តីការនាយករដ្ឋមន្ត្រី។
ជាមួយគ្នានេះដែរ លោកហ្វ្រង់ស្វ័រ ហ្វីយ៉ុង ក៏បានអះអាងចំពោះមុខសម្តេចហ៊ុន សែន ថា បារាំងនឹងបន្តគាំទ្រគម្រោងនានាទាំងឡាយ ដែលខ្លួនធ្លាប់បានជួយកម្ពុជានោះជាបន្តទៀត នឹងបានសន្យាជួយលើការផលិតអង្ករក្នុងការនាំចេញ និងការនាំអ្នកវិនិយោគទុនមកវិនិយោគនៅកម្ពុជា។ លោកនាយករដ្ឋមន្ត្រីបារាំង ក៏បានបញ្ជាក់ដែរថា ក្រុមហ៊ុនប្រេងតូតាល់របស់បារាំងនៅកម្ពុជា ក៏នឹងរុករកប្រេងនៅតំបន់ត្រួតស៊ីគ្នានោះផងដែរ។ ជាការឆ្លើយតប សម្តេចអគ្គមហាសេនាបតីតេជោហ៊ុន សែន ក៏បានថ្លែងអំណរគុណដល់បារាំងដែលបានផ្តល់ជំនួយគាំទ្រលើវិស័យជាច្រើន ជាពិសេសវិស័យសុខាភិបាល អប់រំ ច្បាប់ ការបណ្តុះបណ្តាលមន្ត្រីកងរាជអាវុធហត្ថការផ្តល់អាហារូបករណ៍ដល់និស្សិតកម្ពុជា និងការជួសជុលប្រាសាទបុរាណនានាជាដើម ។
នៅក្នុងជំនួបនោះ សម្តេចហ៊ុន សែន ក៏បានជម្រាបលោកនាយករដ្ឋមន្ត្រីបារាំងពីសភាពការណ៍ព្រំដែនកម្ពុជា-ថៃផងដែរ ដោយបញ្ជាក់ថា បញ្ហានេះ បណ្តាលមកពីការឈ្លានពានរបស់ប្រទេសថៃតាំងពីឆ្នាំ២០០៨ ហើយថា ពេលនោះកម្ពុជាមានការអត់ធ្មត់ដោយសារការត្រៀមរៀបចំបោះឆ្នោត និងប្រទេសជាតិកំពុងឆ្លងកាត់ពីវិបត្តិសេដ្ឋកិច្ចពិភពលោក។ សម្តេចបានសង្កត់ធ្ងន់ថា ក្រោយការចរចាទ្វេភាគីមិនបានសម្រេច កម្ពុជាក៏បានសម្រេចប្តឹងទៅក្រុមប្រឹក្សាសន្តិសុខអង្គការសហប្រជាជាតិ និងទៅតុលាការយុត្តិធម៌អន្តរជាតិក្រុងឡាអេ។
គួរបញ្ជាក់ថា លោកនាយករដ្ឋមន្ត្រីបារាំង ហ្វ្រង់ស្វ័រ ហ្វីយ៉ុង បានមកដល់ព្រលានយន្តហោះអន្តរជាតិភ្នំពេញ កាលពីវេលាម៉ោង១១និង៥០នាទីព្រឹកថ្ងៃទី២ កក្កដា ក្នុងដំណើរបំពេញទស្សនកិច្ចផ្លូវការរយៈពេល២ថ្ងៃក្នុងប្រទេសកម្ពុជា តាមការអញ្ជើញរបស់សម្តេចហ៊ុន សែន ។ នៅព្រលានយន្តហោះអន្តរជាតិភ្នំពេញ លោកនាយករដ្ឋមន្ត្រីបារាំងត្រូវបានអញ្ជើញទៅទទួលស្វាគមន៍ដោយលោករដ្ឋមន្ត្រីទេសចរណ៍ថោង ខុន ។ បន្ទាប់មកលោកនាយករដ្ឋមន្ត្រីបារាំង ហ្វ្រង់ស្វ័រ ហ្វីយ៉ុង ត្រូវបានធ្វើពិធីបដិសណ្ឋារកិច្ចផ្លូវការ ដោយសម្តេចអគ្គមហាសេនាបតីតេជោហ៊ុន សែន នាវេលាម៉ោង៣រសៀលថ្ងៃដដែល នៅវិមានសន្តិភាពទីស្តីការនាយករដ្ឋមន្ត្រី។ នៅវេលាម៉ោង៤រសៀលលោកហ្វ្រង់ស្វ័រ ហ្វីយ៉ុង បានអញ្ជើញទៅដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ មុនពេលលោកនាយករដ្ឋមន្ត្រីបារាំងរូបនេះអញ្ជើញចូលក្រាបបង្ខំគាល់ព្រះមហាក្សត្រកម្ពុជា ព្រះបរមនាថ នរោត្តម សីហមុនី ។ នៅវេលាម៉ោង៥ល្ងាចលោកនាយករដ្ឋមន្ត្រីបារាំងបានអញ្ជើញចូលរួមពិសាអាហាររៀបចំឡើងដោយសម្តេចហ៊ុន សែន មុនពេលលោកចាកចេញពីរាជធានីភ្នំពេញឆ្ពោះទៅខេត្តសៀមរាបនាវេលាម៉ោង៩យប់ ហើយលោកនាយករដ្ឋមន្ត្រីបារាំងហ្វ្រង់ស្វ័រ ហ្វីយ៉ុង នឹងចាកចេញពីព្រលានយន្តហោះសៀមរាបនិវត្តន៍ទៅកាន់ប្រទេសបារាំងវិញនៅវេលាល្ងាចថ្ងៃទី៣ កក្កដា ២០១១នេះ ៕
ចែករំលែកព័តមាននេះ