ខេត្តសៀមរាប ៖ បន្ទាប់ពីមកដល់ប្រទេសកម្ពុជា ក្នុងដំណើរទស្សនកិច្ចផ្លូវរដ្ឋបាន១ថ្ងៃ របស់លោកនាយករដ្ឋមន្ត្រីបារាំងនៅព្រឹកថ្ងៃទី៣ កក្កដា ២០១១ នេះ ព្រះមហាក្សត្រកម្ពុជា ព្រះបរមនាថ នរោត្តម សីហមុនី និងនាយករដ្ឋមន្ត្រីបារាំង លោកហ្វ្រង់ស្វ័រ ហ្វីយ៉ុង បានយាង-អញ្ជើញធ្វើជាព្រះរាជាធិបតី និងអធិបតីដ៏ខ្ពង់ខ្ពស់ក្នុងពិធីសម្ពោធបិទការដ្ឋានជួសជុលប្រាសាទបាពួន ស្ថិតក្នុងខេត្តសៀមរាប និងបើកឱ្យមានការចូលទស្សនាជាផ្លូវការ។
សូមបញ្ជាក់ថា ប្រាសាទបាពួនបានជួសជុលឡើងវិញអំឡុងឆ្នាំ១៩៩៥ ដោយប្រើប្រាស់ថវិកាអស់ទឹកប្រាក់ប្រមាណ៧លានអឺរ៉ូ ដែលជាជំនួយរបស់សាលាបារាំងចុងបូពា៌។ បើតាមសេចក្តីរាយការណ៍នានាបានបញ្ជាក់ឱ្យដឹងថា ប្រាសាទបាពួន ឬប្រាសាទភ្នំដែលកសាងឡើងក្នុងសតវត្សទី១១នេះ បានបាក់បែកខូចខាតស្ទើរទាំងស្រុង ដោយសារភាពចាស់ទ្រុឌទ្រោម។ទោះជាយ៉ាងណា ប្រាសាទបាពួននេះត្រូវបានចាប់ផ្តើមជួសជុលដំបូងតាំងពីអំឡុងឆ្នាំ១៩៦០ និងបន្តដល់ឆ្នាំ១៩៧០។ ប៉ុន្តែដោយសារកម្ពុជាជួបនូវសង្គ្រាមស៊ីវិល (ក្នុងស្រុក) ក្នុងឆ្នាំ១៩៧០ ទើបការជួសជុលត្រូវបានផ្អាករហូតមកដល់ឆ្នាំ១៩៩៥។ មុនការជួសជុលនេះអ្នកជំនាញបានធ្វើការសិក្សាពីប្រវត្តិកាលនឹងស្រាវជ្រាវរកឃើញថ្មចាស់របស់ប្រាសាទនេះ សម្រាប់ដាក់បន្តុបឡើងវិញមានជាង១ម៉ឺនដុំ។
ប្រាសាទបាពួនមានទីតាំងស្ថិតនៅចំកណ្តាលអតីតរាជបុរីអង្គរធំ នៅខាងត្បូងរាជវាំង ស្ថិតក្នុងចំណោមប្រាសាទសាសនាធំៗរបស់ប្រទេសកម្ពុជាសម័យបុរាណ និងមានការមើលថែអស់រយៈកាលជាច្រើនសតវត្ស។ ប្រាសាទបាពួនកសាងឡើងនៅពាក់កណ្តាលសតវត្សទី១១ ដើម្បីឧទ្ទិសដល់ព្រះឥសូរ ហើយក្រោយមកប្រាសាទមានការកែប្រែរូបសណ្ឋានដើមនៅពេលព្រះពុទ្ធសាសនាបានចូលមកដល់កម្ពុជានៅសតវត្សទី១៦ ។ ថ្មប្រាសាទមួយផ្នែកត្រូវបានគេយកទៅប្រើប្រាស់ដើម្បីកសាងព្រះពុទ្ធបដិមា ចូលនិព្វាន និងហាក់បីដូចជាភ្លេចខ្លួនបន្តិច ប្រាសាទនេះក៏ត្រូវគេបោះបង់ចោល លុះមកដល់រជ្ជ កាលរាជរដ្ឋាភិបាលកកម្ពុជាដើមទសវត្សឆ្នាំ៨០ ក៏ត្រូវបានរៀបចំឱ្យមានការការពារជាបណ្តើរៗ បើទោះជារដ្ឋាភិបាលត្រូវជាប់ដៃជាមួយសង្គ្រាមស៊ីវិលក៏ដោយ និងរហូតដល់ដើមទសវត្សឆ្នាំ៩០មានការអភិរក្ស និងអភិវឌ្ឍន៍ដល់សព្វថ្ងៃនេះ ៕
ចែករំលែកព័តមាននេះ