ប្រទេសចិន ៖ ក្រុមគ្រួសារតារាសម្ដែងចិនវ័យក្មេង កញ្ញា Long Li Sha បានរាយការណ៍ពីការបាត់ខ្លួនតារាស្រីរូបនេះ បន្ទាប់ពីនាងបានធ្វើដំណើរពីទីក្រុងប៉េកាំង ទៅកាន់ខេត្តសានស៊ី…
ប្រទេសចិន ៖ ក្រុមគ្រួសារតារាសម្ដែងចិនវ័យក្មេង កញ្ញា Long Li Sha បានរាយការណ៍ពីការបាត់ខ្លួនតារាស្រីរូបនេះ បន្ទាប់ពីនាងបានធ្វើដំណើរពីទីក្រុងប៉េកាំង ទៅកាន់ខេត្តសានស៊ី (Shaanxi) ភាគពាយ័ព្យប្រទេសចិន ដើម្បីថតកុន។ នេះបើយោងតាមប្រភពពី VnExpress ចេញផ្សាយកាលពីថ្ងៃទី៣ ខែមីនា ឆ្នាំ២០២៥។
យោងតាមប្រភពពីសារព័ត៌មានចិន Sohu និង Znews បានរាយការណ៍ថា កញ្ញា Long Li Sha ដែលជាតន្ត្រីករល្បីមួយរូប នៅឯសកលវិទ្យាល័យទំនាក់ទំនងរបស់ប្រទេសចិន (Communication University of China) ដែលទទួលបានការចាប់អារម្មណ៍យ៉ាងខ្លាំងពីទស្សនិកជន តាមរយៈការសម្តែងតួក្នុងភាពយន្តខ្លីតាមអ៊ីនធឺណិត ត្រូវបានរាយការណ៍ថាបានចូលរួមជាមួយក្រុមការងារផលិតកម្មមួយ កាលពីថ្ងៃទី២៦ ខែកុម្ភៈ។
ក្រុមការងារបានប្រកាសដំបូងថា នាងត្រូវសម្ដែងតួរង ដោយការថតនឹងមានរយៈពេល១៥ថ្ងៃ។ បន្ទាប់ពីទៅដល់ខេត្តសានស៊ី តារាសម្តែងវ័យ២២ឆ្នាំរូបនេះ ស្រាប់តែបាត់ការទាក់ទងធ្វើឱ្យគ្រប់គ្នាបារម្ភថា នាងអាចស្ថិតក្រោមគំរាមកំហែងណាមួយ ព្រោះនាងបានបិទមុខងារកំណត់ទីតាំងក្នុងទូរសព្ទរបស់នាង ដែលធ្វើឱ្យមិត្តប្រុសនាងមិនអាចដឹងថានាងស្ថិតនៅទីណានោះទេ។
បន្តិចក្រោយមក ការតបសាររបស់នាងហាក់ដូចជាប្លែកៗ ដោយអ្នកខ្លះសង្ស័យថា នាងអាចត្រូវបានគេបង្ខិតបង្ខំ។ ជាក់ស្តែង មិត្តភ័ក្តិម្នាក់បានសុំទីតាំងដែលនាងបានប្រាប់គេថានាងនៅទីក្រុងសានស៊ី ដើម្បីថតកុន។ ប៉ុន្តែនៅពេលមិត្តភ័ក្តិសុំឱ្យនាងហៅជាវីដេអូ (Video Call) ស្រាប់តែនាងបិទសំណើហៅជាវីដេអូពីមិត្តភ័ក្តិតែម្តង។
បន្ទាប់ពីមិត្តភក្តិនាងបានចែករំលែកជាសាធារណៈថានាងបាត់ខ្លួន តារាស្រីរូបនេះបានឆ្លើយតបជាមួយវីដេអូបង្ហោះលើគណនី Weibo ដើម្បីជំរុញឱ្យគ្រប់គ្នាលុបការប្រកាសអំពីការបាត់ខ្លួនរបស់នាង ដោយធានាថា នាងមានសុវត្ថិភាព ហើយកំពុងតែថតកុននៅខេត្តសានស៊ី។ នាងបានគូសបញ្ជាក់ថា ចំនួនសារដ៏ច្រើនលើសលប់ផ្ញើមកនាងបង្ហាញពីការបារម្ភ ប៉ុន្តែនាងបានសន្យាថានឹងឆ្លើយតបឱ្យបានឆាប់តាមដែលអាចធ្វើទៅបាន ប៉ុន្តែជាការកត់សម្គាល់ចាប់ពេលនោះមក នាងមិនបានបង្ហោះរូប ឬវីដេអូទៀតនោះទេ។
លើសពីនេះទៀត ខណៈពេលដែលនាងអះអាងថាស្ថិតនៅក្រុងវៃណាន (Weinan) ខេត្តសានស៊ី ដើម្បីថតកុន ប៉ុន្តែទីតាំងថតចុងក្រោយជាក់ស្តែងពីទូរស័ព្ទនាង បែរជានៅអានកាង (Ankang) ដែលក្រុងមួយផ្សេងទៀតក្នុងខេត្តសានស៊ីទៅវិញ។ ទោះជាយ៉ាងណាក៏ដោយ អ្នកស្រុកអានកាងបានរាយការណ៍ថា គ្មានការថតខ្សែភាពយន្តណាមួយកើតឡើងនៅទីនោះទេ។
យោងតាមរបាយការណ៍ប៉ូលិសសង្កាត់ឆាវយ៉ាង (Chaoyang) ទីក្រុងប៉េកាំង បានទទួលរបាយការណ៍បាត់ Long Li Sha ពីក្រុមគ្រួសារ និងសាកលវិទ្យាល័យរបស់នាង។ ចាប់តាំងពីពេលនោះ អាជ្ញាធរបានបើកការស៊ើបអង្កេតដើម្បីស្វែងរកតារាស្រីរូបនេះ។
គួរបញ្ជាក់ថា ការបាត់ខ្លួនតារាស្រី Long Li Sha កើតឡើង បន្ទាប់ពីករណីបាត់ខ្លួនរបស់តារាសម្ដែងចិន លោក Wang Xing និងតារាម៉ូដែល លោក Yang Zeqi កន្លងមក។ អ្នកទាំងពីរសុទ្ធតែចាញ់បោកក្រុមឧក្រិដ្ឋជនបោកប្រាស់តាមអនឡាញ ពាក់ព័ន្ធនឹងឱកាសការងារសិល្បៈ ប៉ុន្តែបែរជាត្រូវបានគេចាប់ពង្រត់ ក្នុងករណីជួញដូរមនុស្សទៅជិតព្រំដែនថៃ-មីយ៉ាន់ម៉ា មុនពេលត្រូវបានជួយសង្គ្រោះដោយកម្លាំងសមត្ថកិច្ច៕ ដកស្រង់ ៖ VnExpress
ចែករំលែកព័តមាននេះ