រាជធានីភ្នំពេញ ៖ នៅវេលាម៉ោងប្រមាណ១០ព្រឹកថ្ងៃទី២៣ ខែធ្នូ ឆ្នាំ២០២៤ សមត្ថកិច្ចបានប្រគល់រថយន្តជូនម្ចាស់ដើមវិញហើយ បន្ទាប់ពីចោរបានលួចពីកន្លែងលាងរថយន្តមួយនៅខណ្ឌ៧មករា យកទៅប្លុងចោលនៅកន្លែងលាងរថយន្តផ្សេងទៀត រួចខ្ចីម៉ូតូអ្នកបម្រើការនៅទីនោះជិះគេចខ្លួនទៅបាត់ ។…
រាជធានីភ្នំពេញ ៖ នៅវេលាម៉ោងប្រមាណ១០ព្រឹកថ្ងៃទី២៣ ខែធ្នូ ឆ្នាំ២០២៤ សមត្ថកិច្ចបានប្រគល់រថយន្តជូនម្ចាស់ដើមវិញហើយ បន្ទាប់ពីចោរបានលួចពីកន្លែងលាងរថយន្តមួយនៅខណ្ឌ៧មករា យកទៅប្លុងចោលនៅកន្លែងលាងរថយន្តផ្សេងទៀត រួចខ្ចីម៉ូតូអ្នកបម្រើការនៅទីនោះជិះគេចខ្លួនទៅបាត់ ។ ទោះជាបែបណា ម្ចាស់ម៉ូតូគឺជាជនរងគ្រោះជំនួសម្ចាស់រថយន្តវិញ ។
ហេតុការណ៍ខាងលើនេះ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ៧និង២០នាទីព្រឹកថ្ងៃទី២៣ ខែធ្នូ ឆ្នាំ២០២៤ នៅកន្លែងលាងរថយន្តមានយីហោ Car Spa ស្ថិតនៅតាមផ្លូវលេខ១០៥ ក្នុងសង្កាត់បឹងព្រលិត ខណ្ឌ៧មករា ។
តាមម្ចាស់រថយន្តម៉ាកស្តារុិច ពណ៌ស ពាក់ផ្លាកលេខ ភ្នំពេញ ២BA-៤៤៣១ និយាយថា កាលពីវេលាម៉ោងប្រមាណ៦និង៥១នាទីព្រឹកថ្ងៃនោះ គាត់បានយករថយន្តទៅលាងនៅកន្លែងលាងរថយន្ត Car Spa ។ នៅពេលទៅដល់បានចុះពីរថយន្តហើយហុចសោឲ្យទៅបុរសម្នាក់ ព្រោះស្មានថាជាអ្នកបម្រើការនៅទីនោះ ។
ប៉ុន្តែដោយសារនៅចាំគេលាងរថយន្តយូរពេកក៏ទៅសួរទើបដឹងថា បុរសដែលទទួលសោរថ
យន្តពីគាត់នោះមិនមែនជាអ្នកបម្រើការនៅកន្លែងលាងរថយន្តទេ ទើបមានការភ្ញាក់ផ្អើលថា ចោរ
លួចរថយន្តរបស់គាត់ និងបានទៅប្ដឹងនគរបាលប៉ុស្តិ៍បឹងព្រលិត ដើម្បីស្រាវជ្រាវរករថយន្ត ។
ប្រភពដដែលបន្តថា លុះមួយសន្ទុះក្រោយមកក៏មានដំណឹងថា ជននោះបានបើករថយន្តគាត់ពីកន្លែងលាងរថយន្តខាងលើ ទៅប្លុងចោលនៅកន្លែងលាងរថយន្តមួយទៀតមានយីហោឆាយ ហ៊ាង នៅដីឡូត៍លេខ ១៦Eo ផ្លូវលេខ៩៩ សង្កាត់បឹងត្របែក ខណ្ឌចំការមន ។
បន្ទាប់មក ជននោះបានប្រើល្បិចទុករថយន្តនៅទីនោះ ហើយសុំខ្ចីម៉ូតូអ្នកបម្រើការនៅកន្លែងលាងរថយន្ត ឆាយ ហ៊ាង ម៉ាកហុងដាឌ្រីម សេ១២៥ ពណ៌ខ្មៅ ស៊េរី២០២៣ ពាក់ផ្លាកលេខ ភ្នំពេញ ១KH-២៨៤៨ ជិះគេចខ្លួនទៅបាត់ និងបង្កឲ្យមានការភ្ញាក់ផ្អើលយ៉ាងខ្លាំងតែម្តង ។
តាមប្រភពព័ត៌មានថា ជនដែលម្ចាស់រថយន្តហុចសោឲ្យព្រោះស្មានថាជាអ្នកបម្រើការនៅកន្លែងលាងរថយន្តនោះ ការពិតគឺជនសង្ស័យនោះបានមកសុំថៅកែកន្លែងលាងរថយន្ត Car Spa ដើម្បីបានការងារធ្វើ ប៉ុន្តែថៅកែមិនឱ្យធ្វើ ទើបឈរនៅមុខកន្លែងនោះនិងឃើញរថយន្តមកដល់ហើយម្ចាស់ហុចសោឲ្យក៏ទទួលរួចលួចយកតែម្ដង ។
ក្រោយពេលកើតហេតុ នគរបាលប៉ុស្តិ៍បានទៅដល់កន្លែងកើតហេតុ ហើយរហូតដល់ម៉ោង១០ព្រឹកថ្ងៃដដែល សមត្ថកិច្ចបានប្រគល់រថយន្តខាងលើជូនម្ចាស់វិញ ។ ចំណែកជនសង្ស័យ និងម៉ូតូដែលបាត់ សមត្ថកិច្ចកំពុងស្រាវជ្រាវរកជនកំហូចនោះតាមភិនភាគដែលថតបានតាមកាមេរ៉ាសុវត្ថិភាពដើម្បីអនុវត្តតាមនីតិវិធី ៕
ចែករំលែកព័តមាននេះ