សុភមង្គលក្នុងអាពាហ៍ពិពាហ៍ប្រសើរជាងអាពាហ៍ពិពាហ៍មានទ្រព្យធន នេះជាសម្តីរបស់តារាម៉ូដែលចិនតៃវ៉ាន់នាងលីន ឈី លីង។ តារាម៉ូដែលល្បីឈ្មោះ ស្រស់សោភាវ័យ៣៧ឆ្នាំដែលពេលនេះកំពុងប្រឈមមុខជាមួយសំណួរពីភាពនៅឯកោរបស់នាងក្នុងប្រទេសដ៏ធំដែលមនុស្សក្នុងប្រទេសទាំងអស់សុទ្ធតែមានក្តីស្រមៃរួមមួយក្នុងការរៀបការនៅក្មេងវ័យ។ នាងបានឆ្លើយថា «ខ្ញុំគិតថា អ្នកដែលជាអ្នកសារព័ត៌មានក៏មានភាពធុនទ្រាន់ដែរ ដោយសារថា ហេតុអ្វីអ្នកត្រូវសួរសំណួរដដែលៗបែបនេះ? សូមទុកពេលមួយរយៈ សឹមសួរខ្ញុំនូវសំណួរនេះម្តងទៀតឬ? អ៊ីចឹងឆ្នាំនេះមិនរៀបការទេ ប៉ុន្តែខ្ញុំនឹងប្រាប់ឱ្យអស់លោកបានដឹងភ្លាម ពេលខ្ញុំរៀបការ»។
អ្វីដែលនាងរំពឹងមុនគេក្នុងជីវិតអាពាហ៍ពិពាហ៍ គឺនាងមិនចង់ឱ្យដូចជាតារាផ្សេងទៀតក្នុងប្រទេសដែលត្រូវរៀបការជាមួយអ្នកមានក្នុងប្រទេស។
នាងនិយាយថា «សំរាប់ខ្ញុំ រៀបការបង្កើតគ្រួសារសំខាន់ជាងការរៀបការបង្កើតទ្រព្យសម្បត្តិ» ។
តារាដែលទទួលបានសញ្ញាបត្រធំពីរផ្នែកសេដ្ឋ កិច្ចនិង សិល្បៈវប្បធម៌នៅឯសាកលវិទ្យាល័យ Toronto ព្យាយាមធ្វើការយ៉ាងខ្លាំង ដើម្បី បញ្ជាក់ឱ្យគេដឹងគ្រប់គ្នាថា នាងមានសមត្ថភាពមិនត្រឹមតែមានមុខមាត់ស្អាតបាតឡើយ។ បន្ទាប់ពីបង្ហាញពីភាពស្រស់សោភាលើផ្ទាំងសំពត់សក្នុងខ្សែភាពយន្តរបស់លោក John Woo ដែលមានចំណងជើងថា Red Cliff កាលពីឆ្នាំ២០០៧មក នាងលីនឈីលីង ព្យាយាមកាត់បន្ថយមន្តស្នេហ៍ដោយបានកាត់សក់ខ្លួនឯង និង ផាត់មុខតិចតួច និងច្រើនតែសម្តែងតួជាស្ត្រី ដែលធ្វើការជាមួយចង្ក្រានឆ្នាំងក្នុងផ្ទះបាយ។
ពេលនេះនាងកំពុងសម្តែងរឿងថ្មីបែបស្នេហា ក្នុងនាមជាតួឯក និងមានចំណងជើងថា Love on Credit ។ នាងតំរូវឱ្យដើរតួជាស្ត្រីដែល ជឿជាក់លើឆាកជីវិតពិតជាជាងផ្តេតផ្តួលទៅលើ រឿងរ៉ាវស្នេហា ហើយទីបំផុតនាងបានដឹងថា សេចក្តីស្នេហាមានតំលៃឥតកាត់ថ្លៃបានជាជាងរបស់មានតំលៃផ្សេងៗទាំងអស់។
នាងនិយាយថា «ក្នុងខ្សែភាពយន្តនេះខ្ញុំចង់ផ្ញើសារសំរាប់ស្ត្រីគ្រប់រូប រួមទាំងរូបខ្ញុំផង ដែលរស់នៅរំពឹងជួបនិងមានសេចក្តីស្នេហាពិតដែលមិនអាចជំនួសដោយមាសប្រាក់» ។បើទោះជានាងទទួលបានកេរ្តិ៍ឈ្មោះល្បីល្បាញក្នុងការដើរម៉ូដក្តី តែពេលនេះការងារដែល នាងចាប់អារម្មណ៍បំផុតគឺការសម្តែង។ លើសពីនេះទៅទៀត នាងនឹងសម្តែងតួក្នុងខ្សែភាពយន្ត ជប៉ុនដែលយកលំនាំតាមខ្សែរឿងប្រលោមលោកបុរាណចិនសាមកុកដោយគេតម្រូវឱ្យនាងសម្តែងជាតួនាង Xiaoqiao ដែលជាតួសម្តែងដូចនាង សម្តែងក្នុងរឿង Red Cliff ដែរ។
នាងនឹងត្រូវរៀនភាសាជប៉ុនសម្រាប់ការសម្តែងក្នុងរឿងនេះ។ នាងនិយាយថា «ខ្ញុំមិនដែល នឹកស្រមៃថា ខ្លួនក្លាយជាតារាសម្តែងក្នុងវ័យនេះ ឡើយ ខ្ញុំហោះហើរទៅកាន់ទីក្រុងផ្សេងៗរៀងរាល់ ថ្ងៃ ហើយរហូតដល់ពេលខ្លះពេលក្រោកពីគេង មានការភន្ត័ច្រឡំ ហើយសួរខ្លួនឯងថា ខ្ញុំធ្វើអ្វី? ប៉ុន្តែពេលចាប់ផ្តើមភ្លាមខ្ញុំនឹងមានអារម្មណ៍ស្រស់ស្រាយភ្លាម។ ខ្ញុំគិតថាខ្ញុំនៅតែស្រលាញ់ការងារ របស់ខ្ញុំ ហើយវាតែងតែផ្តល់សំណាងល្អដល់ខ្ញុំ»៕
ចែករំលែកព័តមាននេះ