ទីក្រុងកៀវ៖ សភាពការណ៍ពិភពលោកកាន់តែមិនស្រួលមែនទែនហើយបន្ទាប់ពីមានព្រឹត្តិការណ៍កំញើញគ្នាទៅវិញទៅមករវាងគូបដិបក្ខនៅក្នុងសង្គ្រាមអ៊ុយក្រែន និងការបាញ់មីស៊ីលរយៈចម្ងាយឆ្ងាយរបស់រុស្ស៊ី។ អង្គការណាតូ និងអ៊ុយក្រែនត្រៀមកោះប្រជុំនៅថ្ងៃអង្គារសប្ដាហ៍ក្រោយដើម្បីរកវិធីដោះស្រាយ ឬទប់ទល់បែបណាខ្លះបន្ទាប់ពីរុស្ស៊ីវាយប្រហារទៅលើទីក្រុងឌីនីប្រូ (Dnipro) របស់អ៊ុយក្រែនដោយប្រើប្រាស់មីស៊ីលអន្តរទ្វីរបស់ខ្លួនជាលើកដំបូងបំផុត។
នាយករដ្ឋមន្ត្រីប៉ូឡូញថ្លែងថាសង្គ្រាមនេះបានដើរដល់ដំណាក់កាលថ្មីមួយ និងរីករាលដាលកាន់តែខ្លាំងគួរឱ្យព្រួយបារម្ភ។ សូម្បីតែរដ្ឋសភាអ៊ុយក្រែនក៏ត្រូវលុបចោលគម្រោងកោះប្រជុំរបស់ខ្លួនផងដែរដោយសារសន្តិសុខស្ថិតក្នុងសភាពផុយស្រួយ។ ដើម្បីទុកជាការព្រមានទៅក្រុមបស្ចិមប្រទេស លោកពូទីនថ្លែងសុន្ទរកថាតាមកញ្ចក់ទូរទស្សន៍ជាតិថាការបាញ់មីស៊ីលរយៈចម្ងាយមធ្យមនោះជាការឆ្លើយតបទៅអ៊ុយក្រែនដែលបាញ់មីស៊ីលជំនួយរបស់អាមេរិក និងអង់គ្លេសកាលពីថ្ងៃពុធ។
លោកពូទីនអះអាងថាគ្រាប់មីស៊ីលថ្មីនេះមានអានុភាពខ្លាំងក្លាបំផុត សូម្បីតែប្រព័ន្ធការពារដែនអាកាសដ៏ទំនើបរបស់ក្រុមបស្ចិមប្រទេសក៏មិនអាចបញ្ឈប់សកម្មភាពរបស់វាបានដែរ។ អ្នកនាំពាក្យវិមានក្រឹមឡាំងចាត់ទុកថាបស្ចិមប្រទេសសម្រេចចិត្តឱ្យអ៊ុយក្រែនបាញ់មីស៊ីលចូលទឹកដីរុស្ស៊ីនោះជាការសម្រេចចិត្តខុសធ្ងន់ណាស់។ លោកថារុស្ស៊ីត្រូវតែបង្ហាញកម្លាំងរបស់ខ្លួន និងត្រៀមចាត់វិធានការវាយបកយ៉ាងទាន់ចិត្តបើគេមិនបានយកចិត្តទុកដាក់ខ្ពស់ចំពោះអ្វីដែលជាកង្វល់របស់ខ្លួន។
នាយករដ្ឋមន្ត្រីហុងគ្រីយល់ថាបើអ៊ុយក្រែនប្រើមីស៊ីលរបស់អាមេរិកមានន័យថាអាមេរិកបានចូលរួមដោយផ្ទាល់នៅក្នុងប្រតិបត្តិការនេះ។ អ៊ុយក្រែនមិនចេះប្រើប្រព័ន្ធមីស៊ីលដ៏ទំនើបនេះទេ។ ដូច្នេះដាច់ខាតត្រូវតែមានអ្នកបច្ចេកទេសអាមេរិកជាអ្នកចូលរួមបាញ់។ មេដឹកនាំហុងគ្រីរូបនេះសូមឱ្យក្រុមបស្ចិមប្រទេសកុំឃើញរុស្ស៊ីព្រមានប៉ុណ្ណឹងហើយនៅតែធ្វើព្រងើយៗ។ ការធ្វើបច្ចុប្បន្នភាពនយោបាយនុយក្លេអ៊ែររបស់រុស្ស៊ីថ្មីៗនេះមិនមែនជាការនិយាយកម្លា និងមិនមែនជាការបោកបញ្ឆោតទេ។
នៅទីក្រុងកៀវ រដ្ឋមន្ត្រីការបរទេសឆេកចាត់ទុកការបាញ់មីស៊ីលអន្តរទ្វីបរបស់រុស្ស៊ីជាការបន្លាចទឹកចិត្តរបស់ប្រជាជនអ៊ុយក្រែន និងអឺរ៉ុប។ ឆេកប្រកាសគាំទ្រយ៉ាងពេញទំហឹងចំពោះអ៊ុយក្រែន និងត្រៀមផ្ដល់ប្រព័ន្ធការពារដែនអាកាសទៅអ៊ុយក្រែននៅក្នុងករណីចាំបាច់ដើម្បីការពារជនស៊ីវិលពីការវាយប្រហារ។ រដ្ឋមន្ត្រីរូបនេះបញ្ជាក់ឡើងវិញថាឆេកមិនកំណត់លក្ខខណ្ឌចំពោះអាវុធជំនួយដែលផ្ដល់ទៅឱ្យអ៊ុយក្រែនទេ។ បើអ៊ុយក្រែនយកទៅបាញ់ចូលទឹកដីរុស្ស៊ីក៏ស្រេចនឹងចិត្ត។
ករណីដែលរដ្ឋសភាអ៊ុយក្រែនលុបចោលគម្រោងកោះប្រជុំកាលពីថ្ងៃសុក្រនោះត្រូវអ្នកតំណាងរាស្ត្របីនាក់ពន្យល់ថាដោយសារសភាពការណ៍នៅពេលនេះកាន់តែមិនស្រួលមែនទែនហើយ ហើយអ៊ុយក្រែនទទួលរងការគំរាមថារុស្ស៊ីអាចនឹងបាញ់មីស៊ីលទៅលើអគាររបស់រដ្ឋនៅទីក្រុងកៀវ។ អ៊ុយក្រែនបានផ្ដល់អនុសាសន៍ឱ្យវិស័យឯកជន និងអង្គការមិនមែនរដ្ឋាភិបាលកាត់បន្ថយម៉ោងធ្វើការនៅទីក្រុងកៀវ។ ប្រជាជនក៏ត្រូវតែបង្កើនការប្រុងប្រយ័ត្នផងដែរ៕
ចែករំលែកព័តមាននេះ