ទីក្រុងម៉ូស្គូ៖ អ្នកនាំពាក្យវិមានក្រឹមឡាំងថ្លែងថាករណីដែលលោកបៃដិនអនុញ្ញាតឱ្យអ៊ុយក្រែនបាញ់មីស៊ីលឆ្ងាយៗចូលទឹកដីរុស្ស៊ីប្រៀបបាននឹងការចាក់សាំងទៅលើភ្លើងដែលកំពុងឆាបឆេះ។ គេមិនទាន់ដឹងច្បាស់ថាតើព័ត៌មានស្ដីពីការអនុញ្ញាតនេះមានការពិតកម្រិតណាទេព្រោះគេស្ដាប់ឮតែការបង្ហើបឱ្យដឹងពីមន្ត្រីរដ្ឋាភិបាលអាមេរិក២នាក់ដែលស្នើសុំមិនបញ្ចេញឈ្មោះ។ ដោយឡែក ក្រសួងការបរទេស, ក្រសួងការពារជាតិ និងសេតវិមានមិនទាន់ធ្វើអត្ថាធិប្បាយទៅលើរឿងនេះទេ។
ប៉ុន្តែមិនចាំបាច់រង់ចាំផ្ទៀងផ្ទាត់ថាពិត ឬមិនពិតទេ។ រុស្ស៊ីចាប់ផ្ដើមបញ្ចេញប្រតិកម្មតាមរយៈគណៈកម្មការកិច្ចការបរទេសរបស់រដ្ឋសភា។ ក្រោយមក អ្នកនាំពាក្យវិមានក្រឹមឡាំងចោទប្រកាន់ថាលោកបៃដិនមុននឹងចាកចេញទីសេតវិមានទៅ លោកចង់បន្ថែមភាពតានតឹងជាមួយរុស្ស៊ីដើម្បីទុកជាមត៌កនយោបាយរបស់គាត់។ បើលោកម្រេចចិត្តដូច្នេះ មានន័យថាភាពតានតឹងនៅវិលវល់គ្មានទីបញ្ចប់។ សភាពការណ៍នឹងប្រែប្រួលដោយសារអាមេរិកចូលរួមកាន់តែសកម្មនៅក្នុងជម្លោះ។
វិមានក្រឹមឡាំងយល់ថាការសម្រេចចិត្តឱ្យអ៊ុយក្រែនធ្វើបែបនេះក៏ជាសញ្ញាបង្ហាញថាអង្គការណាតូនឹងពាក់ព័ន្ធដោយផ្ទាល់នៅក្នុងសង្គ្រាម។ សេចក្ដីថ្លែងការណ៍របស់វិមានក្រឹមឡាំងបន្ថែមទៀតថាបើអ៊ុយក្រែនបាញ់មីស៊ីលរបស់អាមេរិកឆ្ងាយៗចូលទឹកដីរុស្ស៊ីមែន ពេលនោះរុស្ស៊ីលែងគិតថាជាស្នាដៃរបស់អ៊ុយក្រែនតទៅទៀតហើយ។ ប៉ុន្តែជាស្នាដៃរបស់អាមេរិកតែម្ដង។
គួរកត់សម្គាល់ថារដ្ឋាភិបាលរបស់លោកបៃដិនសម្រេចចិត្តយ៉ាងដូច្នេះត្រឹមតែ២ខែប៉ុណ្ណោះមុនពេលលោកបញ្ចប់តំណែងនាថ្ងៃទី២០ ខែមករា ឆ្នាំ២០២៥។ ការសម្រេចចិត្តនេះក៏ធ្វើឡើង២សប្ដាហ៍បន្ទាប់ពីគណបក្សប្រជាធិបតេយ្យចាញ់ឆ្នោតលោកត្រាំ។ ជានិច្ចកាល លោកត្រាំគាំទ្រការបិទបញ្ចប់នូវអ្វីដែលលោកចាត់ទុកថាជាសង្គ្រាមដ៏បង្ហូរឈាមឥតន័យ។
លោកត្រាំសន្យាថានឹងបិទបញ្ចប់សង្គ្រាមអ៊ុយក្រែនត្រឹមតែរយៈពេល២៤ម៉ោងប៉ុណ្ណោះ។ ប៉ុន្តែអ្នកវិភាគយល់ថានេះជារឿងដែលមិនអាចទៅរួចទេ។ ទីប្រឹក្សារបស់លោកត្រាំយល់ថាលោកបៃដិនធ្វើដូច្នេះមិនខុសពីទម្លាក់ដុំថ្មក្ដៅទៅឱ្យលោកត្រាំជាអ្នកទទួលនោះទេ។ ក្រោយពេលលេចឮព័ត៌មាននេះ ប្រទេសអាល្លឺម៉ង់ដែលជាសម្ព័ន្ធមិត្តនៅក្នុងអង្គការណាតូជាមួយអាមេរិកដែរនោះប្រកាសគោលជំហរឡើងវិញថាខ្លួននឹងមិនបញ្ជូនគ្រាប់មីស៊ីលរយៈចម្ងាយឆ្ងាយទៅឱ្យអ៊ុយក្រែនជាដាច់ខាត។
អ្នកនាំពាក្យរដ្ឋាភិបាលអាល្លឹម៉ង់ត្រូវអ្នកសារព័ត៌មានសួរថាតើនឹងមានការផ្លាស់ប្ដូរនយោបាយរបស់អាល្លឺម៉ង់ដែរឬទេនៅក្នុងការផ្ដល់មីស៊ីលទៅឱ្យអ៊ុយក្រែន? ទោះជាយ៉ាងណាក្ដីប៉ូឡូញប្រកាសគាំទ្រវិធានការរបស់លោកបៃដិនត្រង់ចំណុចនេះ។ ប្រធានាធិបតីប៉ូឡូញ លោកឌូដា ថ្លែងថានេះជាការបោះជំហានដ៏សំខាន់១នៅក្នុងព្រឹត្តិការណ៍សង្គ្រាមនៅអ៊ុយក្រែន។
លោកឌូដាស្វាគមន៍យ៉ាងពេញទំហឹងចំពោះការសម្រេចផ្ដល់សិទ្ធិឱ្យអ៊ុយក្រែនធ្វើដូច្នេះ។ លោកជឿជាក់ថាអ៊ុយក្រែនគួរណាស់មានមធ្យោបាយដើម្បីការពារខ្លួនទល់នឹងការវាយប្រហារ។ លោកបានរិះគន់គោលជំហររបស់អាល្លឺម៉ង់ដែលនៅតែមិនព្រមធ្វើដូចប្រទេសអាមេរិក។ លោកឌូដាក៏រិះគន់ផងដែរចំពោះការសន្ទនាគ្នាតាមទូរស័ព្ទរវាងអធិការបតីអាល្លឺម៉ង់ជាមួយលោកពូទីនកាលពីថ្ងៃសុក្រសប្ដាហ៍មុន។ នៅក្នុងឱកាសនោះ គេមិនបានដឹងថាតើលោកទាំង២បាននិយាយអ្វីខ្លះទេ៕
ចែករំលែកព័តមាននេះ