រាជធានីភ្នំពេញ ៖ តារាចម្រៀងសុខ ពិសី របស់ផលិតកម្មសាន់ដេត្រូវបានវាយតម្លៃថា ជាតារាដែលកំពុងមានប្រជាប្រិយភាពបំផុតក្នុងឆ្នាំ២០១១ ក្នុងចំណោមតារាចម្រៀងល្បីៗមួយចំនួនទៀត ។ មិនតែប៉ុណ្ណោះរូបសម្រស់ដ៏ស្រស់ស្អាតរបស់តារារូបនេះក៏កំពុងតែទទួលបានការចាប់អារម្មណ៍ និងកោតសរសើរពីមហាជនផងដែរ ។
ហេតុដែលនិយាយដូច្នេះព្រោះរាល់អាល់ប៊ុមនៃបទ ចម្រៀងរបស់នាង គឺសុទ្ធសឹងទទួលបានការគាំទ្រច្រើន សំខាន់បទចម្រៀងដែលទើបចេញនាពេលថ្មីៗនេះតែម្តង ដែលស្រទាប់យុវវ័យមានការពេញនិយមយ៉ាងខ្លាំង។ សុខ ពិសី និយាយថា មួយរយៈចុងក្រោយនេះ មិត្តភក្តិរួមទាំងទស្សនិកជន ជាច្រើនបានផ្តល់ព័ត៌មានថា រាល់បទចម្រៀងដែលនាងច្រៀង គឺទទួលបានការគាំទ្រច្រើន ។ ព័ត៌មាននេះបានធ្វើឱ្យនាងមានការពេញចិត្តយ៉ាងខ្លាំង និងជាការលើកទឹកចិត្តផងដែរ ដល់រូបនាងក្នុងការបង្កើនសមត្ថភាពជំនាញរបស់ខ្លួនដើម្បីបម្រើទស្សនិកជន ។
សុខ ពិសី បាននិយាយបញ្ជាក់ថា នាងបានចេញអាល់ប៊ុម CD ពីរដំណាលគ្នានៅលើទីផ្សារ ដើម្បីបម្រើអារម្មណ៍ទស្សនិកជន ។ អាល់ប៊ុមទាំងពីរនោះ គឺ រួមមានអាល់ប៊ុម១១៧ និង១១៨ របស់ផលិតកម្មសាន់ដេ ហើយនាងមានជំនឿចិត្តថា អាល់ប៊ុមទាំងពីរនេះប្រាកដជានឹងទទួលបានជោគជ័យមិនខាន ព្រោះគ្រប់បទដែលនាងបានច្រៀង គឺជាបទដែលយុវវ័យមានការពេញនិយម។ នាងប្រាប់ថាអាល់ប៊ុមទាំងពីរនេះ គឺជាបទចម្រៀងរបស់តារាចម្រៀង៣នាក់ គឺខេមរៈ សិរីមន្ត, កែវ វាសនា និងរូបនាង ។ អាល់ប៊ុមទាំងពីរចាប់ផ្តើមចេញលក់ប្រមាណជា៣ ឬ៤ថ្ងៃមុននេះ លើទីផ្សារក្នុងទូទាំងប្រទេស ។
នាងបញ្ជាក់ថា បទចម្រៀងដែលនាងបានច្រៀងផ្ទាល់ក្នុងអាល់ប៊ុមទាំងពីរនេះមានចំនួន៦បទ ដូចជាបទបែកបងដើម្បីថែគេ, ខ្លាចគេឈឺចាប់មិនខ្លាចបងទឹកភ្នែក និងខ្លាចបងស្មោះអូនស្អប់បងចុះជាដើម ។ បទទាំងអស់នេះភាគច្រើនច្រៀងរួមគ្នាជាមួយលោកខេមរៈ សិរីមន្ត និងកែវ វាសនា ។ ចំណែក VCD នៃអាល់ប៊ុមទាំងពីរនេះក៏នឹងចេញលក់នាពេលឆាប់ៗខាងមុខនេះផងដែរ ។
សុខ ពិសី កាលពីនាងចេញអាល់ប៊ុម បទចម្រៀងដែលច្រៀងរួមគ្នាជាមួយលោកខេមរៈ សិរីមន្ត កាលពីពេលថ្មីៗនេះ គឺអាល់ប៊ុម «បែករហូត» គឺមានការពេញនិយម និងគាំទ្រយ៉ាងច្រើនពីស្រទាប់យុវវ័យ ។ ដូច្នេះអាល់ប៊ុមក្រោយនេះដែលនាងបន្តច្រៀងរួមគ្នាជាមួយលោកខេមរៈ សិរីមន្ត និងកែវ វាសនា ប្រាកដជាទទួលបានជោគជ័យទៀតមិនខាន ។
ពាក់ព័ន្ធការងារសិល្បៈសុខ ពិសី សារភាពថា នាងប្រាកដជាមានការនឿយហត់ច្រើនមែនរយៈពេលចុងក្រោយនេះ ព្រោះទន្ទឹមនឹងច្រៀងបញ្ចូល CD នាងត្រូវថតកាយវិការសម្រាប់ VCD ថ្មី រួមទាំងថតភាពយន្តរឿង ព្រាយដែកគោល ឱ្យផលិតកម្មសាន់ដេ ដែលភាពយន្តនេះនៅសល់ប្រមាណតែ៣០ភាគរយប៉ុណ្ណោះនឹងត្រូវបញ្ចប់ ហើយនឹងដាក់បញ្ចាំងនាពេលខាងមុខ៕
ចែករំលែកព័តមាននេះ