រាជធានីភ្នំពេញ ៖ «កូនប្រសាស្រី» កំពុងទាក់ទាញប្រិយមិត្តអ្នកទស្សនាឲ្យតាមដានជក់ចិត្តជាថ្មីម្ដងទៀត ខណៈមានការចែកចាយយ៉ាសផុសផុលលើបណ្ដាញសង្គម ស្រាប់តែម្ចាស់ស្នាដៃនិពន្ធអ្នកស្រី ពាន់ ភួង បុប្ផា ចេញមុខស្នើរសុំរឿងមួយ…
រាជធានីភ្នំពេញ ៖ «កូនប្រសាស្រី» កំពុងទាក់ទាញប្រិយមិត្តអ្នកទស្សនាឲ្យតាមដានជក់ចិត្តជាថ្មីម្ដងទៀត ខណៈមានការចែកចាយយ៉ាសផុសផុលលើបណ្ដាញសង្គម ស្រាប់តែម្ចាស់ស្នាដៃនិពន្ធអ្នកស្រី ពាន់ ភួង បុប្ផា ចេញមុខស្នើរសុំរឿងមួយ ។
ជាការពិតណាស់ ខ្សែភាពយន្តខ្មែររឿង «កូនប្រសាស្រី» ដែលជាស្នាដៃនិពន្ធ និង គ្រប់គ្រងផលិតដោយអ្នកស្រី ពាន់ ភួង បុប្ផា ដែលល្បីកក្រើកតាមរយៈកញ្ចក់ទូរទស្សន៍កាលពី១ទសវត្សរ៍កន្លងមកនោះ ថ្មីៗនេះត្រូវបានផ្ទុះការគាំទ្រជាថ្មីម្ដងទៀត បន្ទាប់ពីមានការចែកចាយបន្តយ៉ាងផុសផុលនៅលើបណ្ដាញសង្គម FaceBook និង Chanel Youtube ។
យ៉ាងណាមិញ ខ្សែភាពយន្តភាគទូរទស្សន៍ «កូនប្រសាស្រី» ត្រូវបាន អ្នកស្រី ពាន់ ភួងបុប្ផា ជាម្ចាស់កម្មសិទ្ធបានយកមកចាក់ផ្សាយជាថ្មីម្តងទៀត តាមរយៈ Chanel Youtube របស់អ្នកស្រី ដែលមានឈ្មោះថា Poan Phoung Bopha Tv និងត្រូវបានបណ្តញសង្គមនានាដូចជា FaceBook Page និង Chanel Youtube ជាច្រើនទៀតក៏បានធ្វើការយកទៅចែករំលែកបន្តរហូតផ្ទុះការទស្សនាយ៉ាងខ្លាំង ។
ដោយឡែក ក្រោយផ្ទុះការចែកចាយបន្តភ្លូកទឹកភ្លូកដី តាមរយៈការបង្ហោះឡើងវិញពីបណ្តាញសង្គមជាច្រើននោះ ស្រាប់តែកាលពីថ្ងៃទី៣០ ខែតុលា ឆ្នាំ២០២៤នេះ អ្នកស្រី ពាន់ ភួងបុប្ផា ក៏បានចេញមុខបង្ហោះសារសំណូមពរដល់អ្នកចែកចាយបន្តជួយដាក់កម្មសិទ្ធិបញ្ញាដល់អ្នកនិពន្ធផង ។
តាមរយៈសំណេរដែលបង្ហោះលើបណ្ដាសង្គម អ្នកស្រីបានសរសេររៀបរាប់ថា «ជម្រាបសួរប្រិយមិត្ត និងអ្នកទស្សនាទាំងអស់គ្នា សូមអរគុណដែលតែងតែតាមដាន និងគាំទ្ររាល់ខ្សែភាពយន្តរបស់នាងខ្ញុំកន្លងមក ។ ដោយសារមួយរយៈនេះ ខ្ញុំសង្កេតឃើញថា មានផេករបស់ក្មួយៗមួយចំនួនបានថតចម្លងវីដេអូរឿង«កូនប្រសាស្រី» យកទៅផ្សព្វផ្សាយជាច្រើន ដូច្នេះខ្ញុំសូមសំណូមពរឲ្យក្មួយៗដែរបានយកវីដេអូរឿង «កូនប្រសាស្រី» យកផ្សាយបន្តជួយដាក់កម្មសិទ្ធបញ្ញាឲ្យម្ចាស់ដើមផង និងអរគុណដល់ក្មួយៗដែលបានដាក់រួចហើយ ។
អ្នកស្រីបានបន្តថា ជាចុងបញ្ចប់សូមជូនពរឲ្យអ្នកទស្សនា និងគាំទ្រស្នាដៃនាងខ្ញុំឲ្យជួបតែសំណាងល្អ និងរកទទួលទានមានបាន ហើយក៏សូមអរគុណចំពោះការគាំទ្ររាល់ស្នាដៃដែលនាងខ្ញុំបានផលិត ហើយសូមបន្តគាំទ្រទស្សនាខ្សែភាពយន្តថ្មីៗនឹងមានចាក់ជាបន្តបន្ទាប់ សូមរីករាយតាមដានទស្សនាជាមួយគ្នានេះ អ្វីដែលគួរឲ្យចាប់អារម្មណ៍ជាងនេះទៀតនោះ អ្នកស្រីបានបង្ហើបក៏ដូចជា ប្រាប់ដំណឹងល្អឲ្យអ្នកគាំទ្រដឹងថា អ្នកស្រីបានផលិត រឿងកូនប្រសារស្រីវគ្គថ្មីៗរួចរាល់ហើយ ហើយត្រៀមនឹងចាក់ផ្សាយឆាប់ៗនេះ ខណៈមានរហូតដល់ទៅ ៣រឿងឯណោះ ដូច្នេះប្រិយមិត្តអ្នកគាំទ្រដឹងតែសប្បាយភ្នែកមើលទៀតហើយ តើបងប្អូនគាំទ្រឲ្យចេញវគ្គថ្មីទេ ?៕ អត្ថបទ៖ រៀម រ៉ាន់
ចែករំលែកព័តមាននេះ