ទីក្រុងម៉ូស្គូ៖ បន្ទាប់ពីមានព័ត៌មានចុះផ្សាយជាហូរហែអំពីករណីដែលកូរ៉េខាងជើងបញ្ជូនកងទ័ពជាច្រើនកងពលទៅប្រទេសរុស្ស៊ីដើម្បីត្រៀមចូលរួមជួយកងទ័ពរុស្ស៊ីច្បាំងនៅអ៊ុយក្រែន មានប្រតិកម្មចម្រុះចំពោះដំណឹងនេះ។ ថ្មីៗនេះសមាជិកសភាអាមេរិករបស់គណបក្សប្រជាធិបតេយ្យ លោកហ្គើរីខន់ណូលី (Gerry Connolly) ដែលជាប្រធានស្ដីទីគណៈកម្មការសភាទទួលបន្ទុកខាងអង្គការណាតូផងដែរនោះ លោកយល់ថាវាជាការបង្ហាញអំពីភាពកម្សោយរបស់ប្រទេសរុស្ស៊ី។
លោកបានដាក់ជាសំណួរថាតើរុស្ស៊ីពិតជាត្រូវការទាហានកូរ៉េខាងជើងទៅប្រឡូកនៅក្នុងសង្គ្រាមអ៊ុយក្រែនមែនទេ? ហេតុអ្វីប្រទេសរុស្ស៊ីត្រូវការកូរ៉េខាងជើងមកជួយយ៉ាងដូច្នេះ? បើដូច្នេះមែនមានន័យថារុស្ស៊ីប្រហែលជាចាប់ផ្ដើមទន់ដៃទន់ជើងនៅក្នុងសង្គ្រាមមែនទែនហើយឬយ៉ាងណា? សមាជិកសភារូបនេះនិយាយយោងតាមរបាយការណ៍សម្ងាត់ថាសង្គ្រាមជាង២ឆ្នាំកន្លងទៅនេះបានធ្វើឱ្យរុស្ស៊ីបាត់បង់កម្លាំងប្រយុទ្ធ៦សែននាក់ដែលត្រូវពលីជីវិតនៅលើសមរភូមិ ឬរងរបួស និងបាត់ខ្លួន។
ទំហំនៃការខូចខាតប៉ុណ្ណេះអាចចាត់ចំណាត់ថ្នាក់ស្មើនឹងការខាតបង់នៅក្នុងសង្គ្រាមសង្គ្រាមលោកលើកទី២នៅក្នុងដំណាក់កាលដំបូងដែលអ៊ីទ្លែបើកយុទ្ធនាវាយលុកចូលសហភាពសូវៀត។ លោកខនណូលីធ្វើអត្ថាធិប្បាយនយោបាយដូចខាងលើនេះបន្ទាប់ពីទីភ្នាក់ងារសម្ងាត់កូរ៉េខាងត្បូងចេញរបាយការណ៍ថាកូរ៉េខាងជើងបានដឹកជញ្ជូនកងកម្លាំងពិសេសរបស់ខ្លួន១៥០០នាក់តាមកប៉ាល់ចម្បាំងរុស្ស៊ីទៅទីក្រុងវ៉្លាឌីវ៉ូស្តុក (Vladivostok) ដើម្បីហ្វឹកហាត់។ បន្ទាប់មកនឹងបញ្ជូនទៅអ៊ុយក្រែន។
វីឌីអូបែកធ្លាយបង្ហាញរូបទាហានកូរ៉េខាងជើងដែលបញ្ជូនទៅរុស្ស៊ីកំពុងផ្លាស់ខោអាវដើម្បីស្លៀកពាក់ឯកសណ្ឋានកងទ័ពរុស្ស៊ីកងទ័ពកូរ៉េខាងជើងដែលត្រូវបញ្ជូនទៅច្បាំងនៅអ៊ុយក្រែនមិនមែនមានត្រឹមតែប៉ុណ្ណឹងនោះទេ អាចមានដល់ជាង១ម៉ឺននាក់នៅដំណាក់កាលដំបូង។ បើរឿងនេះជាការពិតមែន វត្តមានរបស់ទាហានកូរ៉េខាងជើងដែលបញ្ជូនទៅច្បាំងនៅអ៊ុយក្រែនជាភស្តុតាងថ្មីមួយទៀតបង្ហាញអំពីការពង្រឹងទំនាក់ទំនងយោធាកាន់តែខ្លាំងរវាងរុស្ស៊ី និងកូរ៉េខាងជើង។ កាលពីរដូវក្ដៅកន្លងទៅនេះ ថ្នាក់ដឹកនាំប្រទេសទាំង២បានចុះហត្ថលេខាលើកតិកាសញ្ញាក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ។
នៅក្នុងកិច្ចព្រមព្រៀងនោះ ប្រទេសទាំង២សន្យាជួយឧបត្ថម្ភ-គាំទ្រគ្នាទៅវិញទៅមក។ នៅក្នុងករណីដែលភាគីណាមួយកំពុងជាប់ដៃច្បាំងនៅក្នុងសមរភូមិ ភាគីមួយទៀតត្រូវតែបញ្ជូនទ័ព និងអាវុធយុទ្ធភ័ណ្ឌទៅជួយច្បាំងគ្នា។ មានន័យថាបើរុស្ស៊ីកំពុងជាប់ដៃធ្វើសង្គ្រាម កូរ៉េខាងជើងត្រូវបញ្ជូនទ័ពទៅជួយ។ បើកូរ៉េខាងជើងមានសង្គ្រាមវិញម្ដង រុស្ស៊ីក៏ត្រូវតែជួយដូចគ្នា។ រុស្ស៊ីក៏សន្យាជួយកូរ៉េខាងជើងខាងផ្នែកសេដ្ឋកិច្ចផងដែរដើម្បីកុំឱ្យប្រទេសនេះរងសម្ពាធខ្លាំងពេកពីបស្ចិមប្រទេស។
ប្រទេសទាំង២ក៏សន្យាជួយគាំទ្រគ្នាទៅវិញទៅមកខាងផ្នែកបច្ចេកវិទ្យាយោធាផងដែរ។ ជាពិសេស បើកូរ៉េខាងជើងខ្វះខាតចំណេះដឹងត្រង់ចំណុចណាមួយ រុស្ស៊ីនឹងជួយបំពេញគ្នា។ ឧទាហរណ៍ បច្ចេកវិទ្យាបាញ់បង្ហោះផ្កាយរណបស៊ើបការណ៍ ឬបច្ចេកវិទ្យានុយក្លេអ៊ែរជាដើម។ ឥឡូវនេះ អាវុធរបស់កូរ៉េខាងជើងត្រូវគេរកឃើញនៅក្នុងសង្គ្រាមអ៊ុយក្រែនរួចជាស្រេច៕
ចែករំលែកព័តមាននេះ