បន្ទាយមានជ័យ ៖ អាជ្ញាធរក្រុងប៉ោយប៉ែតមានវិធានការចំពោះក្រុមអ្នកដើររ៉ៃអង្គាសលុយ២ក្រុមចំនួន១១អង្គ/នាក់ និងព្រះសង្ឃ៣អង្គត្រូវបាននាំធ្វើកិច្ចសន្យាអោយបញ្ឈប់សកម្មភាព កាលពីថ្ងៃទី១១ ខែតុលា ឆ្នាំ២០២៤ ស្ថិតក្រុងប៉ោយប៉ែត។
មន្ត្រីការិយាល័យធម្មការ និងសាសនាក្រុងប៉ោយប៉ែតបានប្រាប់ថា ៖ជាការណែនាំពីប្រធានមន្ទីធម្មការ និងសាសនាខេត្តបន្ទាយមានជ័យ អាជ្ញាធរក្រុងប៉ោយប៉ែត និងការិយាល័យជំនាញបានហៅក្រុមអ្នកដែលដើររ៉ៃអង្គាសលុយ នៅក្រុងប៉ោយប៉ែតចំនួន២ក្រុម មានចំនួន១១អង្គ/នាក់ ក្នុងនោះមានព្រះសង្ឃ៣អង្គ និងមានគណៈកម្មការ និងអាចារ្យវត្តយាយជី ចំនួន៨នាក់ និងរថយន្តឆ្នៃចំនួន២គ្រឿង មានមេក្រូ២ឈុត ដែលកំពុងដើររ៉ៃអង្គាសលុយតាមដងផ្លូវ ទីប្រជុំជនក្រុងប៉ោយប៉ែត ។
មន្ត្រីរូបនោះបានបញ្ជាក់ថា ៖ នៅពេលដែលមន្ត្រីជំនាញនាំខ្លួនព្រះសង្ឃ និងគណៈកម្មការតាអាចារ្យវត្តយាយជី ចំនួន១១អង្គ/នាក់ មកធ្វើកិច្ចសន្យា គឺបានធ្វើសកម្មភាពមានរថយន្ត២គ្រឿង និងមេក្រូបំពង់សំឡេងដើររ៉ៃអង្គាសលុយពីប្រជាពលរដ្ឋ នៅក្នុងក្រុងប៉ោយប៉ែត ដែលធ្វើអោយប៉ះពាល់វិស័យសាសនា ដែលជាសាសនារដ្ឋដែលប្រជាពលរដ្ឋគោរពប្រតិបត្តិគ្រប់ៗគ្នាធ្វើអោយប៉ះពាល់តម្លៃសាសនាទើបអាជ្ញាធរក្រុងប៉ោយប៉ែត ដែលមានការិយាល័យធម្មការ និងសាសនាក្រុងប៉ោយប៉ែត នាំមកធ្វើកិច្ចសន្យាអោយបញ្ឈប់សកម្មភាពការដើរ ឬនិមន្តរ៉ៃអង្គាសលុយពីប្រជាពលរដ្ឋ ។
មន្ត្រីធម្មការ និងសាសនាក្រុងប៉ោយប៉ែត បានបញ្ជាក់ថា ៖ លើកនេះត្រឹមតែណែនាំ និងធ្វើកិច្ចសន្យាចំពោះក្រុមអ្នកដែលដើររ៉ៃអង្គាសលុយនៅក្រុងប៉ោយប៉ែត បើមានលើកក្រោយ និងមានវិធានការតាមច្បាប់សាសនា ដោយមិនលើកលែងឡើយ ដើម្បីចូលរួមការពារវិស័យសាសនាដែលជាសាសនារដ្ឋ ដែលប្រជាពលរដ្ឋគោរព និងប្រតិបត្តិគ្រប់គ្នាទូរទាំងប្រទេស ត្រូវចូលរួមការពារវិស័យសាសនាអោយបានល្អផូរផង់ ៕
ចែករំលែកព័តមាននេះ