ខេត្តស្វាយរៀង ៖ កម្លាំងនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តស្វាយរៀង បន្តបង្ក្រាបទីតាំងផ្ទះសំណាក់ ម៉ាស្សា ខារ៉ាអូខេយីហោ KTV OMG massage…
ខេត្តស្វាយរៀង ៖ កម្លាំងនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តស្វាយរៀង បន្តបង្ក្រាបទីតាំងផ្ទះសំណាក់ ម៉ាស្សា ខារ៉ាអូខេយីហោ KTV OMG massage ដែលលូចលាក់បង្កប់ការប្រើប្រាស់គ្រឿងញៀន ឃាត់ខ្លួនជនសង្ស័យជនជាតិវៀតណាម ចំនួន ១៣នាក់ ដកហូតបានអាវុធខ្លី ចំនួន០២ដើម រួមនឹងគ្រឿងញៀនមួយចំនួន នៅក្រុងបាវិត ។
សមត្ថកិច្ចបានឲ្យដឹងថា កម្លាំងជំនាញការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិតដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត បានបើកប្រតិបត្តិការបង្ក្រាបករណីជួញដូរ រក្សាទុក ប្រើប្រាស់ដោយខុសច្បាប់ នូវសារធាតុញៀន នៅចំណុចហាងខារ៉ាអូខេយីហោ KTV OMG massage ស្ថិតក្នុងភូមិបាវិតកណ្តាល សង្កាត់ បាវិត ក្រុងបាវិត ខេត្តស្វាយរៀង នៅថ្ងៃទី០២ ខែតុលា ឆ្នាំ២០២៤ ។
ប្រភពបានបន្តទៀតថា ជាលទ្ធផលក្នុងការបង្ក្រាបករណីខាងលើសមត្ថកិច្ច បានធ្វើការឃាត់ខ្លួនជនសង្ស័យជនជាតិវៀតណាមចំនួន១៣ នាក់ ភេទប្រុស ហើយក្នុងកិច្ចប្រតិបត្តិការនេះកម្លាំងជំនាញបានដកហូតបានសម្ភារវត្ថុតាងដែលពាក់ព័ន្ធក្នុងបទល្មើសរួមមាន ៖
១.សារធាតុញៀនសរុបទម្ងន់ ២៧៥.៩២ ក្រាម
២.អាវុធខ្លី ០២ ដើម បង់០២ ស្មើ១៥ គ្រាប់
៣.ជញ្ជីងថ្លឹងថ្នាំ ០៣ គ្រឿង
៤.ទូរសព្ទដៃ ១៦ គ្រឿង
៥.រថយន្ត ០៣ គ្រឿង
៦.ម៉ូតូ០៣ គ្រឿង
៧.លិខិតឆ្លងដែន០៤ ក្បាល
៨.បារីអេឡិចត្រូនិច ២៦៧ ដើម
៩.អត្តសញ្ញាណប័ណ្ណជនជាតិវៀតណាម០៥ សន្លឹកព្រមទាំង ឧបករណ៍សម្ភារប្រើប្រាស់គ្រឿងញៀនមួយចំនួនទៀត។
បច្ចុប្បន្នជនសង្ស័យរួមជាមួយវត្ថុតាងត្រូវបានបញ្ជូនទៅកាន់សាលាដំបូងខេត្តដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ