សៀមពេលនេះបានប្រឌិតរឿងថ្មីមួយទៀតជុំវិញព័ត៌មានថា បុរសជនជាតិខ្មែរម្នាក់ដែលចាប់ខ្លួនពីបទធ្វើចារកម្មឈ្មោះអ៊ុង គីមតៃ បានរត់គេចខ្លួនបាត់ហើយ។ ទោះបីជាបែបណា លោកកុយ គួង អ្នកនាំ ពាក្យក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍កាលពីល្ងាចថ្ងៃទី១៦ មិថុនា ថា លោកបានដឹងពីព័ត៌មាននេះ តែលោកមិនច្បាស់ទេថា លោកអាប់ភីស៊ីត និយាយទៅលើនរណា តែបើនិយាយសំដៅទៅលើឈ្មោះអ៊ុង គីមតៃ ដែលបានចាប់ខ្លួនកាលពីថ្ងៃទី៧ មិថុនា នោះ គឺមិនពិតទេ។
លោកមានប្រសាសន៍ថា ពេលនេះលោកអ៊ុង គីមតៃ ស្ថិតនៅក្នុងមន្ទីរឃុំឃាំង ហើយអគ្គកុងស៊ុលកម្ពុជាក៏ទើបតែបានជួបនៅថ្ងៃនេះ ដែរ ដូច្នេះលោកមិនយល់ថា តើលោកអាប់ភីស៊ីត និយាយសំដៅទៅលើជនណាមួយដែលបានចាប់ខ្លួននោះ។
គេហទំព័រ MCOT របស់ថៃជាភាសាអង់គ្លេសនៅថ្ងៃទី១៦ មិថុនា ចេញផ្សាយដោយដកស្រង់សម្តីនាយករដ្ឋមន្ត្រីចាំផ្ទះសៀម លោកអាប់ភីស៊ីត វ៉េចាជីវ៉ា ដែលថ្លែងនៅថ្ងៃទី១៦ មិថុនា នោះថា លោកបានទទួលរបាយការណ៍មួយថា បុរសម្នាក់ក្នុងចំណោមបុរស៣នាក់ដែលត្រូវចាប់ខ្លួនពីបទចោទប្រកាន់ធ្វើចារកម្មឱ្យកម្ពុជាបានរត់គេចខ្លួនបាត់ហើយ ដូច្នេះការរត់គេចខ្លួនរបស់បុរសនោះបញ្ជាក់ថា ថៃមិនបានប្រឌិតរឿងចារកម្មនោះឡើយ។
លោកអាប់ភីស៊ីត ថ្លែងថា លោកអាចអះអាងបញ្ជាក់ថា បុរសដែលរត់គេចខ្លួននោះ គឺជនជាតិខ្មែរ ជាមន្ត្រីយោធា ។ បុរស៣នាក់ដែលថៃអះអាងថា ត្រូវចាប់ខ្លួនពីបទចោទប្រកាន់ធ្វើចារកម្ម មានជនជាតិសៀមខ្លួនឯង ជនជាតិវៀតណាម និងជនជាតិខ្មែរ។ ពួកគេត្រូវចាប់ខ្លួននៅតំបន់ព្រំដែនរវាងប្រទេសកម្ពុជា និងប្រទេសថៃ កាលពីថ្ងៃទី៧ មិថុនា កន្លងមក ដោយថៃចោទប្រកាន់ថា បុរសទាំង៣នាក់នេះជិះរថយន្តប្រភេទភីកអាប់មួយគ្រឿងក្រឡឹងខេត្តស៊ីសាកេត ដើម្បីធ្វើចារកម្មអំពីទីតាំងឈរជើងយោធា និងលេណដ្ឋានរបស់ខ្លួន ។ ទោះបីជាបែបណា ការអះអាងរបស់លោកអាប់ភីស៊ីត អំពីការរត់គេចខ្លួននោះប្រហែលជាមិនមែនជារឿងត្រឹមត្រូវឡើយ ព្រោះថៃជាប្រទេសមានច្បាប់ ដូច្នេះអ្នកដែលត្រូវប្រទេសនេះចាប់ខ្លួនមិនអាចរត់រួចដោយងាយស្រួលនោះទេ ឬហោចណាស់ក៏ត្រូវឃុំខ្លួនដើម្បីវិនិច្ឆ័យទោសសិនដែរ ។ ម្យ៉ាងវិញទៀត ការអះអាងរបស់នាយករដ្ឋមន្ត្រីចាំផ្ទះ រូបនេះគឺគ្រាន់តែចង់បញ្ជាក់ថា ករណីចាប់ខ្លួនពីបទចោទប្រកាន់ធ្វើចារកម្មនោះ មិនមែនជារឿងប្រឌិតប៉ុណ្ណោះ ។ ប្រមុខរាជរដ្ឋាភិបាលកម្ពុជា តាមរយៈក្រសួងការបរទេសបានច្រានចោលរួចហើយនូវការចោទប្រកាន់នោះដោយអាជ្ញាធរថៃ និងរដ្ឋាភិបាលថៃ ហើយចាត់ទុកថា ថៃបានប្រឌិតរឿងនេះឡើង ដើម្បីយកធ្វើជាលេសបន្តការឈ្លានពានកម្ពុជា ។
លោកអាប់ភីស៊ីត បានបដិសេធចំពោះការចោទប្រកាន់របស់កម្ពុជាដែលថា ថៃបានប្រឌិតករណីចារកម្មនេះឡើង ដោយថ្លែងថា ថៃមិនដែលចាប់ខ្លួនជនស្លូតត្រង់នោះទេ (sic)។ គេហទំព័រ MCOT បានដកស្រង់សំដីលោកអាប់ភីស៊ីត ដែលថ្លែងទៀតថា ថៃនឹងបង្ហាញពី ករណីចារកម្មនេះដល់សហគមន៍អន្តរជាតិ ។ មន្ត្រីផ្លូវការកម្ពុជា មិនទាន់ធ្វើអត្ថាធិប្បាយនៅឡើយទេ ជុំវិញការថ្លែងចោទប្រកាន់របស់លោកអាប់ភីស៊ីត អំពីការត់គេចខ្លួនរបស់បុរសជនជាតិខ្មែរ ដែលត្រូវចាប់ខ្លួននោះ ។
ជាមួយគ្នានេះទាក់ទិននឹងបញ្ហាគ្រប់គ្រង និងអភិរក្សប្រាសាទព្រះវិហារដែលជាបេតិកភណ្ឌពិភពលោក លោកអាប់ភីស៊ីត អះអាងបញ្ជាក់ជាថ្មីថា ថៃនៅតែប្រកាន់គោលជំហររបស់ខ្លួនទាមទារឱ្យគណៈកម្មាធិការបេតិកភណ្ឌពិភពលោក ពន្យារពេលពិចារណាលើផែនការគ្រប់គ្រងដែលស្នើដោយកម្ពុជា ក្នុងកិច្ចប្រជុំដែលនឹងរៀបចំឡើងក្នុងទីក្រុងប៉ារីស ប្រទេសបារាំង ចាប់ពីថ្ងៃទី១៩ ដល់ថ្ងៃទី២៩ មិថុនា ខាងមុខនេះ។ លោកអាប់ភីស៊ីត ថ្លែងដូច្នេះក្នុងកិច្ចប្រជុំគណៈរដ្ឋមន្ត្រីពិសេសមួយ កាលពីថ្ងៃទី១៥ មិថុនា កន្លងមក ។ ថ្លែងទៅកាន់អ្នកកាសែតក្រោយពីកិច្ចប្រជុំគណៈរដ្ឋមន្ត្រីនោះ លោកអាប់ភីស៊ីត ពោលថា គោលជំហររបស់ថៃគឺចង់ឱ្យការពិចារណាលើផែនការគ្រប់គ្រង និងអភិរក្សប្រាសាទព្រះវិហារត្រូវពន្យារពេល ។
ការបង្កើតរឿងចារកម្មប្រឆាំងកម្ពុជា អាចនាំឱ្យអាប់ភីស៊ីតចាញ់ឆ្នោតនៅពេលខាងមុខ
ការប្រឌិតនូវបញ្ហាដ៏ធំជាបន្តបន្ទាប់របស់រដ្ឋាភិបាលអាប់ភីស៊ីតដូចជាការចោទប្រកាន់ប្រជាពលរដ្ឋខ្មែរពីបទចារកម្ម ការបដិសេធថា ថៃពុំបានបាញ់ប្រាសាទព្រះវិហារ ការគេចវេះមិនព្រមទទួលអ្នកសង្កេតការណ៍ឥណ្ឌូណេស៊ីទៅកាន់តំបន់ជម្លោះព្រំដែននៃប្រទេសទាំងពីរ ទាំងនេះគឺជាចេតនាបង្កសង្គ្រាមជាថ្មីប្រឆាំងកម្ពុជា ដែលគេអាចគិតថា ល្បែងនយោបាយទុច្ចរិតបែបនេះរដ្ឋាភិបាលអាប់ភីស៊ីតអាចនឹងចាញ់ឆ្នោតនៅពេលខាងមុខ ។
ការធ្វើនយោបាយដោយពុំមានសុចរិតភាព ការភូតភរកុហកសាធារណមតិជាតិ និងអន្តរជាតិ រួមជាមួយនឹងអំពើសោកនាដកម្មនានាដែលបានកើតឡើងក្រោមការគ្រប់គ្រងនៃ
អំណាចរបស់ខ្លួនបណ្តាលឱ្យពលរដ្ឋថៃជាច្រើននាក់ស្លាប់ និងរបួសរាប់ពាន់នាក់នាពេលកន្លងមក និងការបាញ់ប្រហារដោយកាំភ្លើងធំរំលោភលើដែនអធិបតេយ្យភាពកម្ពុជាបណ្តាលឱ្យខ្ទេចខ្ទីប្រាសាទព្រះវិហារ វត្តអារាម ភូមិករអ្នកស្រុក ក៏ដូចជាពលរដ្ឋកម្ពុជាជាច្រើននាក់ស្លាប់ និងរបួស នេះគឺជាអំពើអមនុស្សធម៌ដែលរំលោភទៅលើច្បាប់អន្តរជាតិ ។ រដ្ឋាភិបាលថៃមិនត្រឹមតែបង្កសង្គ្រាមប្រឆាំងកម្ពុជាប៉ុណ្ណោះទេ ថែមទាំងបានប្រឌិតរឿងដែលមិនពិតជាច្រើនក្នុងចេតនាទម្លាក់កំហុសមកលើកម្ពុជាដើម្បីបំរើផលប្រយោជន៍នយោបាយរបស់ខ្លួនថែមទៀត មានជាអាទិ៍ការបង្កើតរឿងចោទខ្មែរពីបទចារកម្មត្រូវបានសម្តេចតេជោហ៊ុន សែន នាយករដ្ឋមន្ត្រីកម្ពុជាប្រតិកម្មតបតដោយបញ្ជាក់ថា «មិនដែលមានការធ្វើចារកម្មណាម្តងបីប្រទេសនោះទេ» ។ សម្តេចក៏បានបញ្ជាក់ផងដែរថា «កុំមកបង្ករឿងច្រើនពេកជាមួយកម្ពុជា នៅពេលមានការបំភ្លឺពីការពិតប្រយ័ត្នរបូតសន្លឹកឆ្នោត»។
ជាមួយនឹងការដាស់តឿនឱ្យប្រជាពលរដ្ឋខ្មែរប្រយ័ត្នប្រយែងក្នុងការធ្វើដំណើរចូលទៅប្រទេសថៃ បើទោះណាជាមានលិខិតឆ្លងដែនត្រឹមត្រូវក៏ដោយប្រយ័ត្នថៃចាប់ខ្លួន និងចោទប្រកាន់ពីបទចារកម្មទៀតនោះ សម្តេចតេជោ សង្កត់ធ្ងន់ថា «ទង្វើរបស់រដ្ឋាភិបាលថៃបង្កើតរឿងបែបនេះ និងធ្វើឱ្យអន្តរាយដល់ជំនឿទុកចិត្តរបស់ប្រជាជនកម្ពុជាចំពោះមេដឹកនាំថៃបច្ចុប្បន្ន» ។ បន្ទាប់ពីមានការចាប់ខ្លួនពលរដ្ឋកម្ពុជាម្នាក់រួចមកត្រូវបាននាយករដ្ឋមន្ត្រីថៃអប់ភីស៊ីត និងលោកកាស៊ីត ភិរម្យ រដ្ឋមន្ត្រីការបរទេសថៃធ្វើការចោទប្រកាន់មុនតុលាការរួចស្រាច់ទៅហើយថាជាអ្នកប្រព្រឹត្តចារកម្ម។ ឆ្លើយតបនឹងការលើកឡើងដ៏ខុសឆ្គងបែបនេះ សម្តេចតេជោ ហ៊ុន សែន បានមានប្រសាសន៍ថា «សួរថា រដ្ឋមន្ត្រីការបរទេសថៃ ចេះច្បាប់ដែរឬអត់?… ដរាបណាតុលាការមិនទាន់កាត់ទោស អ្នកនោះនៅតែមិនទាន់មានទោស» ដូច្នេះគ្មានហេតុផលណាមកដោះដូរជនជាតិថៃពីរនាក់ដែលប្រព្រឹត្តបទល្មើសជាក់ស្តែងនៅកម្ពុជាឡើយ ។
សម្តេចតេជោបានដាស់តឿនទៅរដ្ឋាភិបាលអាប់ភីស៊ីតថា «ទុកឲ្យតុលាការថៃធ្វើការសិន ។ តើអ្នកឯងគោរពឯករាជ្យភាពរបស់តុលាការដែររឺទេ? អ្នកឯងមកបំពានទាំងតុលាការថៃ មកបំពានដល់កម្ពុជាទៀត»។ យោងតាមការចេញមកអះអាងរបស់ថ្នាក់ដឹកនាំថៃដោយបំភ្លៃការពិតជាច្រើនបែបនេះ គេអាចទាញសេចក្តីសន្និដ្ឋានបានថា រដ្ឋាភិបាលថៃបច្ចុប្បន្នពុំមានលទ្ធភាពធ្វើជាមេដឹកនាំរដ្ឋាភិបាលនាពេលអនាគតបានឡើយ ។ អំពើភូតកុហក គឺជាការរំលោភលើឆន្ទៈរបស់ប្រជាពលរដ្ឋថៃ និងក៏ជាការរុញច្រានកិត្យានុភាពប្រទេសថៃឱ្យធ្លាក់ចុះដោយសារនាយករដ្ឋមន្ត្រីអាប់ភីស៊ីតមិនទំលាក់ចោលនូវកលល្បិចបោកប្រាស់ប្រជាជនខ្លួនឯង និងអំពើឈ្លានពានមកលើប្រទេសដទៃ ជាពិសេសកម្ពុជា។ ពិភពលោកនេះបានដឹងថា រដ្ឋាភិបាលថៃបានប្រើប្រាស់ផែនទីចោរសម្ងាត់គូសជាឯកតោភាគីពុំមានអន្តរជាតិទទួលស្គាល់យកមកអនុវត្តដើម្បីឈ្លានពានទន្រ្ទានចង់បានទឹកដីកម្ពុជា ។ ទោះជាយ៉ាងណារដ្ឋាភិបាលកម្ពុជាប្តេជ្ញាការពារអធិបតេយ្យរបស់ខ្លួនស្របទៅតាមឯកសារគតិយុត្តិដែលអន្តរជាតិវិនិច្ឆ័យទុកឱ្យ ក្នុងនោះមានសាលដីកាតុលាការយុត្តិធម៌អន្តរជាតិក្រុងឡាអេថ្ងៃទី១៥ មិថុនា ឆ្នាំ១៩៦២ ផែនទីដងរែកឧបសម្ព័ន្ធI អនុសញ្ញាឆ្នាំ១៩០៤ សន្ធិសញ្ញា១៩០៧ និងលិខិតតូបករណ៍ច្បាប់នានាដែលកម្ពុជាបាននិងកំពុងតទល់នៅលើវេទិកាអន្តរជាតិ ។ អ្វីដែលគួរឱ្យកត់សម្គាល់នោះ បើយោងតាមការស្ទង់មតិនាពេលថ្មីៗនេះបានបង្ហាញថា គណបក្សភឿថៃមានការនាំមុខគណបក្សរបស់លោក អាប់ភីស៊ីត ដូច្នេះក្តីសង្ឃឹមសម្រាប់អាប់ភីស៊ីតជានាយករដ្ឋមន្ត្រីបន្ត គឺនៅឆ្ងាយណាស់ ៕
ចែករំលែកព័តមាននេះ