(ម៉ារ៉ុក)៖ បន្ទាប់ពីចៅក្រមនៃកម្មវិធីប្រកួតសម្រស់ AI ដំបូងបង្អស់របស់ពិភពលោក បានបង្ហាញពីបេក្ខភាពចុងក្រោយចំនួន ១០នាក់ កាលពីខែមុនមក ពេលនេះបវរកញ្ញា AI រកឃើញអ្នកគ្រងមកុដហើយ។

កញ្ញា Kenza Layli ជារូបភាព AI មកពីប្រទេសម៉ារ៉ុកទើបតែបានក្លាយជាបវរកញ្ញា AI ដំបូងគេនៅលើពិភពលោក។ ដោយមានអ្នកតាមដានជិត ២០០,០០០ នាក់នៅលើ Instagram និងអ្នកតាមដានច្រើនជាង ៤៥,០០០ នាក់នៅលើ TikTok Kenza Layli គឺជាផលិតផលនៃបញ្ញាសិប្បនិមិត្ត (AI) ល្បីល្បាញដោយបង្ហាញនូវសកម្មភាពប្រចាំថ្ងៃដូចជាការស្លៀកពាក់ជាដើម។

ការប្រលងបវរកញ្ញា AI បានបើកដំណើរការកាលពី៣ខែមុន ដោយបានទាក់ទាញការចូលរួមពីអ្នកសរសេរកម្មវិធី AI ប្រហែល ១,៥០០ នាក់ជុំវិញពិភពលោក នេះបើយោងតាមអ្នករៀបចំកម្មវិធី Fanvue ។ Layli ត្រូវបានបង្កើតឡើងដោយ Myriam Bessa ស្ថាបនិកក្រុមហ៊ុន Phoenix AI ដែលនឹងទទួលបានប្រាក់ចំនួន ៥,០០ដុល្លារ។ ជ័យលាភី​លេខ​២​បាន​ទៅ​លើ​បេក្ខនារី AI គឺ Lalina Valina មក​ពី​ប្រទេស​បារាំង និងលេខ៣បានលើ Olivia C សញ្ជាតិ​ព័រទុយហ្គាល់។

មុនពេលប្រកាសអ្នកឈ្នះក្នុងសប្តាហ៍នេះ អ្នករៀបចំការប្រកួតបាននិយាយថា បេក្ខនារីត្រូវបានវិនិច្ឆ័យមិនត្រឹមតែលើរូបរាងរបស់ពួកគេប៉ុណ្ណោះទេ ប៉ុន្តែថែមទាំងលើការប្រើប្រាស់ឧបករណ៍ AI របស់អ្នកបង្កើតរបស់ពួកគេ ក៏ដូចជាឥទ្ធិពលរបស់ពួកគេនៅលើបណ្តាញសង្គមផងដែរ។ បេក្ខនារី AI ត្រូវតែឆ្លើយសំណួរស្រដៀងនឹងការប្រលងសម្រស់មនុស្សពិត។

ទោះជាយ៉ាងណាក៏ដោយ អ្នកជំនាញក៏មានការព្រួយបារម្ភអំពីផលប៉ះពាល់នៃការប្រលងសម្រស់ AI ផងដែរ ពីព្រោះរូបភាពទាន់សម័យដែលបង្កើតឡើងដោយ AI អាចធ្វើដូចគ្នាទៅនឹងស្តង់ដារសម្រស់មនុស្សពិត៕​ ប្រភពCNN