រាជធានីភ្នំពេញ ៖ មនុស្សបានចាប់ផ្តើមប្រើប្រាស់យន្តហោះ ដើម្បីធ្វើសង្គ្រាមតាំងពីពេលចាប់ផ្តើមសង្គ្រាមលោកលើកទី ១ នាឆ្នាំ ១៩១៤ ដោយនៅពេលដំបូងយោធាត្រឹមអាចមានសមត្ថភាពហោះដើម្បីយកការណ៍ពីសត្រូវប៉ុណ្ណោះ ប៉ុន្តែជាង១០០ឆ្នាំមកនេះ យន្តហោះត្រូវបានគេចាត់ទុកថា ជាយុទ្ធោបករណ៍សង្គ្រាមយុទ្ធសាស្ត្រដ៏ចំបាច់បំផុត ។ ដើម្បីរក្សាឧត្តមភាពខាងយោធាមកដល់ពេលនេះប្រទេសមហាអំណាចយោធានានាបានចំណាយទឹកប្រាក់រាប់ពាន់លានដុល្លារ ដើម្បីធ្វើទំនើបកម្មនូវយន្តហោះសង្គ្រាម និងបច្ចេកទេសយុទ្ធសាស្ត្រដើម្បីការពារ ។
នៅក្នុងរយៈពេលជាង ១០០ ឆ្នាំមកនេះ យន្តហោះចម្បាំងរាប់សិបប្រភេទបានត្រូវគេផលិត និងដាក់ឱ្យប្រើប្រាស់ ប៉ុន្តែទោះបីជាយ៉ាងណាក៏ដោយនៅក្នុងចំណោមយន្តហោះចម្បាំងដែលផលិត និងប្រើប្រាស់ដែលថ្លៃជាងគេបំផុតនៅពេលនេះ គឺមានតម្លៃរហូតដល់ទៅជាង ២ពាន់លានដុល្លារ ។ តើមកដល់ពេលនេះយន្តហោះចំបាំងប្រភេទណាខ្លះដែលវាមានតម្លៃខ្លាំងបំផុតទាំង ៥ នៅលើ ពិភពលោក ៖
១. យន្តហោះចម្បាំង Northrop Grumman B-២ Spirit ៖ យន្តហោះទម្លាក់គ្រាប់ Northrop Grumman B-2 Spirit គឺជាយន្តហោះទម្លាក់គ្រាប់បែកបំបាំងកាយវាយប្រហារធ្ងន់ៗរបស់កងទ័ពអាកាសសហរដ្ឋអាមេរិក ដែលបានចាប់ផ្តើមផលិតនៅឆ្នាំ ១៩៨៩ ។ វាគឺជាយន្តហោះ ចម្បាំងដែលថ្លៃបំផុតនៅក្នុងពិភពលោក មានតម្លៃប្រមាណជា ២,១ ពាន់លានដុល្លារ ។ យន្តហោះនេះអាចជ្រៀតចូលទៅក្នុងខែលការពារដែនអាកាសដ៏ស្មុគស្មាញ និងក្រាស់ ខណៈពេលដែលវាមានសមត្ថភាពប្រតិបត្តិការវាយប្រហារគ្រប់រយៈកម្ពស់ ។ តម្លៃដើមរបស់ B-២ មានតម្លៃ ៧៣៧ លានដុល្លារប៉ុណ្ណោះ ប៉ុន្តែដើម្បីពង្រឹងសមត្ថភាពនឹងបំពាក់បច្ចេកវិទ្យាថ្មីៗយន្តហោះនេះត្រូវចំណាយសរុបនៅក្នុងមួយគ្រឿងដល់ទៅ ២,១ ពាន់លានដុល្លារ ។ យន្តហោះនេះអាចហោះបានរយៈចម្ងាយ ១១.១០០ គីឡូម៉ែត្រ និងមានល្បឿនឡើង ៣.០០០ ហ្វីតនៅមួយនាទី ។
២.យន្តហោះចម្បាំង Lockheed Martin F-22 Raptor ៖ យន្តហោះចម្បាំង F-២២ Raptor ត្រូវបានសាងសង់ឡើង ដើម្បីជាយន្តហោះចម្បាំងគ្រប់គ្រងដែនអាកាស ហើយវាមានភាពជឿនលឿនជាងយន្តហោះចម្បាំងដែលមានឧត្តមភាពលើអាកាសដទៃទៀត វាត្រូវបានដាក់ដំណើរ ការដំបូងក្នុងឆ្នាំ ២០០៥ ។ យន្តហោះ F-២២ Raptor មួយគ្រឿងត្រូវបានគេប៉ាន់ប្រមាណថា វាមានតម្លៃ ៣៥០ លានដុល្លារ ។ នៅលើពិភពលោកនេះគេផលិតវាតែ ១៨៧ គ្រឿងប៉ុណ្ណោះ ។
៣.យន្តហោះចម្បាំង Boeing Air Force One (VC-25) ៖ តាមបច្ចេកទេស Air Force One គឺក្បួនយន្តហោះរបស់ត្រកូលប្រធានាធិបតីសហរដ្ឋអាមេរិកគ្រប់ជំនាន់ដែលមានបំពាក់ សភាវុធទំនើបៗ ហើយបានធ្វើបច្ចុប្បន្នជាប្រចាំដើម្បីការពារសុវត្ថិភាពប្រធានាធិបតីសហរដ្ឋ ។ យោងតាម CNN ជាធម្មតាយន្តហោះការពារប្រធានធិបតីនេះមានចំនួន ២ ដូចគ្នាទាំងស្រុង ដោយ ២ គ្រឿងមានតម្លៃប្រមាណជា ៦៦០ លានដុល្លារ ។ ការធ្វើដំណើរត្រូវចំណាយរហូតដល់ ២០៦.០០០ ដុល្លារក្នុងមួយម៉ោងសម្រាប់ហោះហើរ ។ បច្ចុប្បន្នក្រុមហ៊ុន Boeing កំពុងធ្វើការលើយន្តហោះប្រធានាធិបតីជំនួសពីរគ្រឿង ដែលនឹងត្រូវចំណាយអស់ ៣,៩ ពាន់លានដុល្លារ ដែលអាចធ្វើឱ្យពួកវាក្លាយជាយន្តហោះរបស់កងទ័ពអាកាសអាមេរិកថ្លៃបំផុត ។
៤.យន្តហោះចម្បាំង McDonnell Douglas/Boeing C-17 Globemaster III ៖ Globemaster III គឺជាយន្តហោះដឹកជញ្ជូនយោធាដ៏ល្អបំផុត និងធំជាងគេបំផុតរបស់ពិភពលោក និងជាយន្តហោះដែលមានតម្លៃថ្លៃបំផុតទី ៤ នៅក្នុងបញ្ជីនេះ ដោយមួយគ្រឿងមានតម្លៃប្រមាណជា៣២៨ ទៅ ៣៦៨ លានដុល្លារ ។ យន្តហោះដឹកជញ្ជូនយោធាដ៏ល្អបំផុត ត្រូវបានលក់ទៅឱ្យប្រទេសក្រៅសហរដ្ឋអាមេរិក រួមទាំងចក្រភពអង់គ្លេស កាណាដា អូស្ត្រាលី និងឥណ្ឌា ។ ពួកវាត្រូវបានបង្កើតឡើងក្នុងកំឡុងទសវត្សរ៍ឆ្នាំ ១៩៨០ និងឆ្នាំ ១៩៩០ ហើយចុងក្រោយបង្អស់ត្រូវបានផលិតនៅឆ្នាំ ២០១៥ ហើយត្រូវបានបញ្ជូនទៅប្រទេសកាតា ។
៥.យន្តហោះចម្បាំង Boeing P-៨ Poseidon ៖ យន្តហោះចម្បាំង P-8 Poseidon គឺជាកំណែយោធានៃយន្តហោះ Boeing ៧៣៧-៨០០ERX ។ វាត្រូវបានផលិតដោយក្រុមហ៊ុន Boeing សម្រាប់កងទ័ពជើងទឹកអាមេរិក ហើយមានតម្លៃសរុបប្រហែល ២៩០ លានដុល្លារក្នុងគ្រឿង ។
ប្រទេសឥណ្ឌា អូស្ត្រាលី ចក្រភពអង់គ្លេស គឺជាអ្នកប្រើប្រាស់បច្ចុប្បន្ននៃយន្តហោះ P-8A ខណៈដែលកូរ៉េខាងត្បូងបានទិញយន្តហោះចំនួន ៦ គ្រឿងក្នុងខែកញ្ញា ឆ្នាំ ២០១៨ ។ យន្តហោះនេះបានធ្វើការហោះហើរលើកដំបូងរបស់ខ្លួននៅក្នុងខែមេសា ឆ្នាំ ២០០៩ ហើយត្រូវបានណែនាំដល់កងទ័ពជើងទឹកសហរដ្ឋអាមេរិក ក្នុងខែវិច្ឆិកា ឆ្នាំ ២០១៣ ។
យន្តហោះ P-8 វាយប្រហារលើនាវាមុជទឹកដែលមានអទិភាព ហើយមានសមត្ថភាពអនុវត្តវិធានការគាំទ្រអេឡិចត្រូនិក រួមទាំងការការពារខ្លួនពីការព្រមានជាមុន ការរារាំងការដឹកជញ្ជូន និងសង្គ្រាមប្រឆាំងផ្ទៃទឹក ប្រឆាំងនាវាមុជទឹក ។ វាក៏មានបំពាក់នូវកាំជ្រួចបាញ់តាមអាកាសដែលដឹកនាំដោយរ៉ាដាសម្រាប់ការប្រយុទ្ធ ៕
ចែករំលែកព័តមាននេះ